الموضوع: للإفادة - كار كير جيد جدا

النهاردة نزلت الصبح بصيت علي العربية كده معجبتنيش..كلها تراب..المهم وأنا راجع من مشواري في أكتوبر في إتجاهي للبيت لقيت بعد كايرو مول إعلان كبييييير في محطة موبيل عن الغسيل الكيميائي ومكتوب علي الإعلان هنخليهالك زيرو..قولت طيب كده كده العربية معفنة أدخل أسأل مش هخسر حاجة..

إيه يا عم الحاج اللي بيتم هنا..

1- نفخ الصالون بضغط الهواء كويس.
2- كنس الصالون بالفاكيوم وتصبينه وغسله بالفوم ونفخه بضغط الهوا مرة أخري.
3- غسيل فرش الشنطة والإستبن ونفخ حوض الشنطة بالهوا وكنسها.
4- رفع العربية علي الكوريك وغسيل الشاسيه ورشه بالجاز وتزييت أسفل السيارة بالكامل ورش wd40 علي العفشة ومفصلات الأبواب والكابوت والشنطة.
5- نفخ الموتور بالهوا ثم غسيله بالفوم ثم رشه بسبراي فوم تلميع فيبر.
6- غسيل جسم العربية من الخارج بالماء والصابون والفوم وبعدين دخولها في صالة الغسيل بالكمبيوتر من الخارج.
7- تنشيف السيارة جيدا من الداخل والخارج.

8- هنا بقي دور الصالة.وبيتم فيها الآتي :

1- تنظيف فرش السقف بسبراي فوم GUNK وكذلك فرش القوايم وأرضية السيارة.
2- تنظيف الطابلوه بسبراي مط وليس ملمع وكذلك بطانة الأبواب والكنسول.
3- تنظيف الفرش الجلد وجلد الأبواب وكل ما هو جلد في صالون السيارة بسبراي مخصوص مط وليس ملمع.
4- تلميع باغة العدادات والأبانوس والحليات النيكل بكريم يشبه الفازلين الطبي بالظبط ( تقريبا هو )
5- مسح الصالوت بالكامل بـ WHIPES مط وليس ملمع.
6- وضع معطر GLADE ( مزيل الروائح الكريهة من صالون السيارة.

7- توزيع طبقة من البوليش علي جسم العربية كله وتركه 10 دقائق.
8- مسح البوليش بالساروخ الكهربة.
9- توزيع طبقة من WAX GUNK بنفس طريقة البوليش ومسحها بالساروخ الكهربة.
10- توزيع طبقة بوليش بسيطة علي الفوانيس الأمامية والخلفية ومسحها بقوة بقطعة قماش فائقة النعومة ثم توزيع طبقة شمع ومسحها بالساروخ.
11- تلميع الفريم النيكل اللي حول الأبواب بالمادة اللي شبه الفازلين دي وكذلك الشبكة النيكل الأمامية.

12- وضع علبة معطر GLADE في الشنطة ( علبة كده لونها أزرق ليها فتحات كتير تخرج منه رائحة المعطر ).

النتيجة مذهلة بمعني الكلمة. أول ما خرجت من الصالة قولت دي مش عربيتي.

التكلفة 180 جنيه وبصراحة أنا شايفهم مش حاجة بالنسبة للي عملوه..طبعا التكلفة مش شاملة البقشيش.

بس بجد بقيت مروح بالعربية وأنا في غاية السعادة..حاسس كده بريحة الفبريكة فيها.وبقيت خايف لحد يحسدها وركنتها تحت البيت ومضيتش أغطيها عشان الغطا كله تراب.هرفعلكم الصور قريب إن شاء الله..معذرة للإطالة.