الموضوع: انطباعى الكامل من خلال 25000 كم مع البرسونا 2009

السلام عليكم جميعا

انتظرت كثيرا لابداء رأيى وانطباعى عن السياره لكى يكون الانطباع حقيقى غير متسرع

الشكل :

ممتاز 9/10
شكل العربيه جميل جدا يحسسك بالقوه والفخامه جدا
اللى مايعرفهاش بيفتكرها من السيارات الغاليه جدا

المحرك :

جيد 7/10
محركها قوى ولكن مبقاش مميز بعد محركات gamma و vvti فعلا
يعنى كان افضل نزولها بمحرك cps ليجارى سوق السيارات الشبابيه ذات الطابع الرياضى
ولكنه طبعا مش بيكتف ولكن لو من هواة الشد والمنافسه ممكن تخسر قدام النترا او سيراتو او كورولا او سيفيك

الثبات :

ممتاز 10/10
اكبر ميزه فى العربيه ثباتها الخرافى على كل السرعات بشرط تربيط العفشه كل 5000 كم
غرز قاسيه على 160 و180 وملفات طريق السخنه كلها على 180 باستثناء ملف واحد كده بخاف منه حتى لو راكب فيرارى
ودى نقطه تميز فى الشد والمنافسه طبعا

العفشه :

جيد جدا 8/10
عفشه رياضيه ناشفه شويه مش اوى
يعنى انعم من اللانسر السبورت مثلا
وطبعا دى مميزاتها عدم هبوط السياره عند ركوب 5 افراد و الثبات الرائع
يعنى تحس شكل العربيه انها قريبه من الارض ولكن صعب تحك فى المطبات

وضعية جلوس :

ممتازه 10/10
تحسها عربية سباق بسبب الكراسى الهابطه و طارة الدريكسيون الرياضيه ونور العدادات الاحمر وشكلها
الوسع الداخلى : قدام واسعه جدا جدا
الكنبه ضيقه نسبيا لكن ارحم من الصنى والاكسينت كتيير

خامات الصالون:

مقبوله 6/10
خامات معمره ولكنها ليست انيقه
يعنى التابلوه ناشف فعلا لكن مش بيبوظ وكذلك فرش الابواب
خامة طارة القياده سيئه وحلها وضع جراب

العزل الخارجى :

العزل الصوتى جيد جدا 8/10 : العزل كويس لكن يوجد عيب فى مثلثات الشباك يظهر صوت هواء بعد سرعة 100
العزل الحرارى مقبول 6/10 : فى الحر التكييف بيطلع تلج لكن العربيه مش بتسقع بنفس الدرجه
ملحوظه : العزل الحرارى للبرسونا افضل من الجين تو
عشان الجين تو باب الشنطه فيه جزء معدن باين من داخل السياره وبيبئى سخن جدا فى الحر وبكده بينقل الحراره بتاعة صاج السياره الخارجى للداخل

الرؤيه الخلفيه :

ضعيفه 5/10
المرايه الوسطى السياره عاليه من الخلف وده بيعيق الرؤيه فيها
المرايه الشمال : سيئه مش محدبه نهائيا وده بيخليك تشوف مساحه صغيره جدا
يعنى لو ظابطها على ااخر جسم العربيه يبئى لو فى عربيه وراك عالشمال بينك وبينها 3 متر مش هاتجيلك فى المرايه ودى بتبئى عائق فى الغرز القاسيه وومكن تعمل مصيبه
يعنى شايف الحاره اللى جانبك ورا لكن مش شايف الحاره اللى بعديها
المرايه اليمنى جيده جدا
محدبه بالفعل ومكتوب عليها الابعاد غير حقيقيه وده اللى المفروض كان يبئى فى الشمال بردو

التكييف :

جيد 8/10
تبريده ممتاز ولكن العزل يضيع جزء منه بالاخص فى الكنبه الخلفيه

التوكيل :

مقبول 6/10
يعيبه الورشه وعدم توافر بعض قطع الغيار
ويميزه مهندسين الاستقبال و حسن المعامله ومحاولة م. امر للتحسين وارضاء العملاء

قيمه مقابل سعر :

ممتاز 10/10
سعر العربيه اقل من قيمتها بكتيير
وده كلام مالك لانسر ساق عربيتى كتير وحسها المفروض تبئا اغلى من عربيته السبورت خليجى اللى ب130 الف جنيه

مشاكل قابلتنى :

1- صوت خبطة علبة الدريكسيون المشهور وفى انتظار تعميم الحل من التوكيل
2- طنابير امامى تم تغييرها فى الضمان
3- مانيفولد : عيب صناعه فى موديل 2009 فقط وتم تغييره فى الضمان

مميزات حسيتها فى بروتون بس :

1- اكسراتير رياضى جميل :
تلمس بنزين تلاقيا بتطير اكنك كابس جامد
ووانت واقف اخف لمسه تخلى الrpm عند 25 مثلا
2- دبرياج : مدى الدبرياج قصير جدا وده بيبئى مريح جدا فى الزحمه ومسعف جدا فى الشد والتسارع
3- فتيس رياضى : نفس الغيار طويل يعنى ممكن توصل بالاول ل 60 وبالتانى ل105 والتالت 155 والرابع 190 بس حرام
4- صوت المحرك رياضى جدا : بمجرد ماتكبس الدواسه عالاخر تسمع صوت اشبه بالفلتر السبور
5- الشنطه عملاقه فعلا ويمكن طى الكنبه واستخدامها كسياره نص نقل فعلا

فى النهايه احب انصح اى واحد بيحب الجرى والثبات والاحساس الرياضى يشترى بروتون جين تو او برسونا
لكن لو سواقه هاديه ومطبات كتير وعايز راحه ووسع وكده بلاش يشتريها ويخليه فى النترا او ياريس او اكسينت

وطبعا ده انطباعى الشخصى ممكن يختلف مع انطباعات اخرى او يتفق
عملته باللهجه العاميه لتوصيل مشاعرى كامله من خلال ألفاظى العاديه
شكرا للجميع ومنتظر ردودكم

المشاركة الأصلية كتبت بواسطة felix

صحيح يا محمد ايه حكاية عيب المنيفولد وممكن يجي عليا الدور ولا عيب فردي؟

كل شىء جائز
بس لا تقلق مشكله سهلة الحل فى التوكيل فى اى وقت
المشكله تتمثل فى صوت الموتور بيبئى معاه زى صفاره كده بتلاحظها بقوه فى جراج مثلا من ناحية اليمين فى الكابوت

المشاركة الأصلية كتبت بواسطة eslamkasem

ربنا يبارك فيها بس عندي ملاحظه الانسر انعم من الواجا ومن الجين تو انا مركبتش برسونا

اللانسر المصرى فعلا انعم لكن الخليجى ناشفه اوى اوى

المشاركة الأصلية كتبت بواسطة wekabika

ايه صحيح مشكله المانيفولد انا معايا البرسونا برده 2009 بس مش حاسس بحاجة ؟؟؟

مش لازم تحصل مع كل الناس
لكن حدوثها جائز وحلها موجود فى التوكيل

شكرا للجميع