الموضوع: سؤال للسيدات في المنتدى ..... انتوا بتعملوا كده ليه ؟!!!!

اللي فعلا بيعمل مشاكل هو ان الزوج أو الزوجة يكونوا يخرجوا أسرار حياتهم برة بيتهم. مفيش حاجة أسمها أمي بحكي لها كل حاجة لا للزوج و لا للزوجة. و لا فيه حاجة أسمها متضايق أفضفض مع واحد صاحبي و لا واحدة صاحبتي.

ربنا سبحانه و تعالى بيقول "هن لباس لكم و أنتم لباس لهن". أنتوا ستر و غطا على بعض, و أي حاجة بتحصل جوة البيت ماتطلعش براه أبداااااااااا.

المشاركة الأصلية كتبت بواسطة mazagangee

طيب أحكيلكم بقى سبب اني عملت الموضوع ده

واحد صديقي أعرفه من زمان و متجوز و ساكن في مصر و شغله في بلد في الجنوب عشان هوه مهندس مواقع زي حالاتي كده و دايما بيسافر
المهم الراجل ده حظه جاله في موقع في المحافظة اللي هوه منها و دي احنا بنعتبرها ميزة جامدة جدا لأن كده ممكن يقعد مع والده ووالدته و الراجل وحيد على بنتين واحدة متجوزة في مصر و التانية قاعدة مع أبوها عشان جوزها مسافر بره
كمان مراته وحيدة ووالدها متوفي و همه ساكنين في نفس العمارة اللي والدتها ساكنة فيها و ده طبعا ميزة كويسة للاتنين هيه تبقى جنب والدتها و هوه مسافر و هوه يبقى مطمن انها مش لوحدها .....
أقولكم بقى بيت أبو المهندس ده عبارة عن فيلا كبيرة 3 أدوار في الريف و طبعا اللي ساكنين فيها الراجل الكبير ( اتوفى السنة اللي فاتت ) و الست الكبيرة و أخت المهندس و أولادها الاتنين صغيرين ...

كويس لحد كده ؟؟
طبعا دي تفاصيل عرفتها بحكم صداقتي للراجل الأول ووالده بعد كده و العيلة كلها لأني كنت في الموقع ده معاه و مشيت من فترة كده ...
نيجي بقى للمشاكل ::
أولا : مراته كانت بتيجي بلدهم كل شهرين تلاتة و تقعد أسبوع 10 أيام و الدنيا جميلة و زي الفل , صاحبي متخيل ان حماته خافت لبنتها تقعد و تتقل في البلد فابتدت تكرهها في السفر و ان كده تعب و تفسر مواقف عادية جدا زي اللي قالت عليه آيس هارت كده تفسيرات عجيبة لحد ما البنت كرهت تروح عندهم و بدئت حساسية غريبة تظهر ....
ثانيا : كل مرة يطلب منها تيجي تقعد شوية ترفض تماما و تتحجج بأي سبب حتى لو كان هايف لحد ما قالتله بصراحة كده انها مش هتروح عشان امه و اخته بيكرهوها و بيضايقوها و هوه حاول يصلح الأمور و يهديها لكن هيه رفضت رفض غريب جدا .. و طبعا والدتها كانت طول الوقت بتطلب منه يدور على شغل في مصر حتى لو كان بنص مرتبه و ده طبعا كلام مش معقول يعني واحد بتاع مواقع هيقعد في القاهرة ازاي و احنا بعتمد على البدلات بتاعة الاغتراب و حتى لو كان ليه يسيب شغله يعني ؟؟؟!!!!
ثالثا : مراته و حماته بيطالبوه بسكن خاص في عاصمة المحافظة بتاعته مع ان الراجل عنده فيلا 3 أدوار و عمارة جنبها و عرض عليهم السكن في دور في الفيلا لوحديهم أو السكن في شقة في عمارته و رفضوا العرضين !!! طيب ليه يحمل نفسه ايجار أو شرا شقة هوه في غنى عنها و عنده حاجات تانية محتاجينها أهم من كده .... و برضه الراجل راح قدم في اسكان مبارك و مستني لما يستلم شقته بس الله اعلم امتى ...
رابعا : نيجي بقى لحتة أمه و اخته و تعاملهم مع مراته , الراجل مش ناكر ان اخته عملت كام موقف كده مالهومش أي لازمة في الدنيا بس هيه ( على كلامه هوه ) دي طبيعتها انها متسرعة و احيانا ممكن تغلط من غير سبب ... و بالنسبة لوالدته ممكن يكون عندها شوية غيرة لكنها ( برضه على كلامه و من مقابلتي ليها على السريع كده ) ست عاقلة و كانت مديرة مدرسة و شيخة عرب يعني من الناس اللي تعرف كويس ازاي تتعامل مع البشر كويس لكن برضه مش هننكر حقيقة انها غيرانة من مراة ابنها شوية لأنه اللي حيلتها على رأيها و مالهاش غيره ( و دي مصيبة الابن الوحيد أو البنت الوحيدة ) .. أما اخته التانية العلاقة معقولة بينها و بين مراته ....
لما اتناقشنا مع بعض في المواقف اللي حصلت لقينا انه كلام عيال و تافه و ممكن بسهولة مراته تكبر دماغها و تمشي الأمور و لا كانها سمعت حاجة و مع الوقت العلاقات هتتظبط و الدنيا ترجع تمام و فل الفل زي ما كانت في الأول ...
خامسا : نيجي بقى لعلاقته مع حماته ( و ده على كلامه برضه عشان ما نظلمش حد ) الراجل بيعامل الست كانها والدته و مش بيتأخر عنها في أي حاجة و حتى لما بتناقشه في شغله و تضغط عليه انه يدور على شغل تاني أو لما تسمعه كلمتين مالهومش لازمة زي بنتي زهقانة و لازم تخرجها و تفسحها ... انت لازم توديها مصيف .... يعني حاجات كده مش المفروض انها تتدخل فيها لكن الراجل مقدر انها بنت وحيدة و الست بتحب بنتها زيادة عن اللزوم شوية و حشرية شوية ... لكن ردوده عليها لا تخرج عن ( حاضر يا ماما ربنا يسهل , اللي فيه الخير بنا يعمله .... ان شاء الله .... ربنا يسهل ..... و كده ) من غير ما يرد عليها بردود بايخة أو كلام مالوش لازمة ممكن تحصل منه مشكلة لأنه شايف انها طيبة و بتحبه بس هيه شخصيتها كده و متحملها و حريص انه مايزعلهاش ........ و كمان بيراعي الواجبات العائلية ناحية أهل مراته لو فيه مناسبات و لا عزومات الراجل مش بيتأخر و بيروح و بياخد معاه دايما زيارة غالية و عمره ما يروح فاضي عشان خاطرهم ..
سادسا : العلاقة بينه و بين مراته آخر حب و سعادة الاجازات اللي بيكون معندوش حاجة و لا مشاوير فيها تلاقيه قاعد في البيت جنبها و لا ينزل و لا يطلع و لا يروح في حتة من غيرها الا لو رايح لسمكري و لا ميكانيكي .....

طبعا ده كلام صاحبي و أنا حضرت معاه بعض المواقف اللي بتأكد انه كلامه صحيح .....
و رأينا أنا و هوه زي ما قلت .,, بس عايز آخد رأيكم لأن الحل ده مش نافع و بصراحة احترنا في الست و بنتها يعملهم ايه ؟؟!!!

طبعا دي قصة لواحد من عدد من الزملاء اللي عندهم مشاكل برضه قريبة من كده بس مش بنفس حجم المشكلة دي ......

مبدئيا الكلام ده مختلف خالص عن الكلام اللي في الموضوع الأساسي.

يعني واضح ان مراته كانت بتيجي تقعد عندهم عادي خالص و بعدين ابتدوا يغلسوا عليها بالكلام و عشان كدة مش عايزة تقعد معاهم في نفس البيت. طيب هو ليه مش عايز ينفذلها طلبها و ياخدلها شقة لوحدها؟؟ يعني هو نفسه بيقول انه اخته فعلا عملت مواقف بايخة و ان أمه بتغير منها, يبقى ليه عايز يخليها تقعد معاهم و ينغص عليها حياتها؟؟

المشاركة الأصلية كتبت بواسطة mazagangee

ده كان أحد الحلول المطروحة
طيب الراجل عرض عليها شقة 250 متر في العمارة بتاعته لكن عشان الشقة في بلدهم مش في عاصمة المحافظة حماته رفضت بلسان مراته في ظنه ...
زي ما كان فيه حل انها تقعد في دور لوحدها في الفيلا بتاعتهم و الدور ده مجهز بكل حاجة من مطبخ و أجهزة من جميعه ( ربنا يوسع عليهم )
لكن برضه رفضت

و برضه قدم على شقة بس لسه قدامها سنتين تلاتة على ما يستلمها
يعملهم ايه بقى ؟؟؟؟؟

هي النقطة دي مش مفهومة قوي. هل هي رافضة الشقة عشان جنبهم ولا عشان عايزة تعيش في عاصمة المحافظة؟؟ أصل طبيعي يعني ان اللي اتعود يعيش في القاهرة صعب عليه انه يعيش في بلد صغيرة. و بعدين الأيجار الجديد دلوقتي بقى سهل, فايه المشكلة عنده بالظبط مش فاهمة؟؟

و بعدين ليه حضرتك كنت في الأول بتتكلم عن غيرة الزوجة من حماتها و أخت جوزها مع ان من كلامك في موضوع صاحبك ده ان هما اللي بيغيروا منها و بيعاملوها وحش؟؟