الموضوع: سؤال للسيدات في المنتدى ..... انتوا بتعملوا كده ليه ؟!!!!

اولا كل سنه وانتم طيبين بمناسبه العيد
ثانيا ...القصه مالهاش علاقه بالكلام اللي انت قايله في اول الموضوع
صاحبك اولا غلط لانه سمح لكل امه لااله الا الله انها تدخل في حياته.....
سمح لامه واخته ....
سمح لحماته....
وسمح حتي لصحابه.....
الواحده لما بتتجوز بتبقي عايزه تحس انها عايشه في بيتها مع راجل هو ستر وغطي عليه
لكن ده مش حاصل هنا ...هو قاعد مع مامته وهي قاعده مع اهلها ...فين الجواز هنا
ولما بتروح البلد عند مامته مهما قالو وعادوا البيت مش بيتها ....طول الوقت هي ضيفه حتي لو واخده دور لوحدها مش حتحس
ابدا بانه مملكتها ....وسيان حتي لو عماره جنب البيت.....لان حتفضل برده ضيفه عند حماتها الشوره شوره حماتها
والكلام اللي صاحبك بيقول عليه تافهة ومش مشكله اللي امه واخته بيعملوه.....ده بيعملوه وهي قاعدلها كام يوم امال لو عشت معاهم .....حيشوف ايام سوده
وفي حاجه كمان تخيل انك كل يوم الصبح داخل شغلك واحد صاحبك طيب وابن ناس واخلاق بس فيه عيب كل ميشوفك يقولك ازيك يااهبل ويهزر هزار تقيل ....وانت عارف انه بيهزر ...حتعدي الكلام علي طول ولا حتيجي فيوم وطلع زعابيب امشير عليه
.................
نفس الحال هنا كلام اخته التقيل ...وغيره مامته .....ممكن يعدو مره اتنين ....بس مش علي طول
...................
الحل ايه هنا ...انه يتجوز صح ....يعني ايه ....يعني يفتح بيت ليه ولمراته وتبقي حياتهم فيه وسرهم مع بعض
.............
والبيت يبقي بعيد ....
وبعدين منفترض يعني ان الموقع كان في محافظه تانيه بعيده عن امه ......كان ساعتها حيعمل ايه حيقاطع امه ولا كل فتره ياخد مراته ويروح يزورها وتبقي زياره حلوه وخفيفه وبدون مشاكل
صاحبك للاسف اخل بحقوقه وواجبته تجاه نفسه وتجاه مراته ......وعمره ماحيستريح الا لو ظبط كفه الميزان

والله ابدا .. على فكره زى ما فيه ستات بتعمل كده فيه ستات الحمد لله كويسين جدا و مهما ازواجهم عملوا بيستحملوهم و يشيلوهم فوق راسهم و دول انا شوفت منهم كتير والله الحمد لله
بس المشكله ان فى اى حاجه فى الدنيا الشىء الوحش هو اللى بيبقى الضوء عليه لكن الشىء الحلو مش بيظهر اوى
لان الناس بتركز مع الحاجه السيئه

أما حل المشكله دى فالراجل فعلا من حقه انه يتضايق لان حتى لو ده عيب فيه فممكن يكون غصب عنه تربيته كده و الطبع بيغلب التطبع .. فاكيد مش عايز يحس ان مراته ماسكاهاله نقطه ضعف و كل شويه تديله كلمتين .. الراجل بيحب يحس انه أسد البيت
بس ممكن الراجل لو عرف انه مراته من النوع ده يبدأ يقلل الكلام على مامته و اخواته قدامها .. و يناقش القرارات معاها الاول حتى لو هو اصلا مقرر حاجه من جواه او بالاتفاق مع مامته .. بس يحسسها او يوهمها انه هو اللى اخد القرار

الست بقى المفروض تتعامل مع اهل جوزها من مبدأ حب لاخيك ما تحب لنفسك .. يعنى هى اكيد تحب ان ولادها ياخدوا رأيها و يستشيروها فى كل حاجه .. ليه تستكتر على حماتها كده ...
و بعدين يا جماعه ما الراجل ده قبل ما يتجوز كان ليه أهل مش معقول اول ما يتجوز خلاص ابوه و اموه يروحوا ينتحروا علشان هو يعيش مستقل .. يمكن بعض الستات بتفهم ان استقلال الراجل ده انه خلاص ابوه و امه دول للزياره و بس .. طب ليه ما يستفدش بخبرتهم
و حتى لو هو ضعيف اوى قدامهم هى مش لازم تحسسه اصلا باى عيب فيه .. المفروض تديله برستيجه فى البيت و بره البيت

و اكيد اكيد اللى بيزرع حب هيلاقى حب .. مافيش حاجه بتمشى بالسيطره و النرفزه و العياط
الست ممكن تاخد قلب و عقل الراجل بالكلمه الحلوه و الذكاء .. لكن انا استغبى اوى الستات اللى بتعيط على طول عمال على بطال و اللى بتتخانق و تزعق .. طب ماهو هيطفش و اكيد هيلاقى احسن منك .. لان الدنيا مش بتقف على حد مهما كان

يعنى انا باحس ان العلاقات الزوجيه دى محتاجه ذكاء و صبر من الطرفين و يكون فعلا عندهم رغبه انهم يكملوا مهما شافوا فى عيوب بعض اكيد هيقدروا يغيروها بس بالحب و التفاهم و تطبيق الدين و زى ما قولت لو الاتنين مشيوا مع بعض بمبدأ ان حط نفسك مكان اللى قدامك و حبله اللى تحبه لنفسك كل واحد هيلاقى نفسه بيعذر التانى

انا والله مش باقول كلام انشا لكتن دى حقيقه انا شفتها فى بيوت كتير زى ما شقت بيوت كتير اتخربت و حصل فيها طلاقات و مشاكل بسبب برضه الغباء فى التعامل

و يا ريت كلنا ندعى الدعاء ده دايما "ربنا هب لنا من ازواجنا و ذرياتنا قرة اعين و اجعلنا للمتقين اماما"