أهلك هايساعدوك فى الشقةوالعفش.طيب هاتصرف منين بعد الزواج!مرتبك هايكفى؟انا قلقان.

**Sherlock** · 08-09-2010 08:41 PM

توكل على الله وتزوج , 1000 جنيه فى بدايه الزواج + بعض الاعانات الاسريه و صدقنى هتعيش مستريح جدا .

**zalpany2000** · 08-09-2010 09:21 PM

السلام عليكم

انا عايز ابدأ كلامي بحديث النبي
لو توكلتم علي الله حق توكله لرزقكم كما يرزق الطير تغدوا خماصا -بمعدة فارغة- وتعود بطانا -ممتلائة المعدة بالطعام-
الموضوع وما فيه ان بالذات موضوع الجواز ده مايتحسبش بمعايير دنياوية بحتة كده ، و حديث آخر: ثلاثة حق على الله عز وجل عونهم: المكاتب يريد الأداء، والمتزوج يريد العفاف، والمجاهد في سبيل الله رواه أهل السنن

طيب فين المشكلة - المشكلة في نقطتين اولهما ان واحدة من اهم الذرائع اللي العالم بيدسها في عقول الشباب صعوبات الزواج علشان الشباب تبعد عن فكرة الزواج و طبعا ده يترتب عليه بلاوي لا حصر لها

المشكلة التانية اننا طماعين شوية ومش عايزين نتعب او نشيل مسئولية، وعادة كمان بنغلط في اختيارتنا

والله لو الزوجة بنت اصول هاتبقي باذن الله سبب في زيادة رزقك اصلا ... وتعينك علي حياتك

والله والله انا شوفت بعينيا ناس كتيييير و اولهم اخويا قاصد العفة والزواج وماكنش يملك اللي يعيشه لواحدة، وبعد ما خطب ربنا فتحله ابواب رزق ماتتصوروهاش
وبعدين معلش يعني الشباب لو عايش لنفسك ولو بتقبض 10000 في الشهر مش هاتعرف تشيل منهم مليم لان للاسف بيبقي مافيش هدف وبتلاقيهم بيروحو في تفاهات ، وبرضو ساعتا هاتحس انك مش معاك اللي يكفيك تتجوز

الخلاصة، من كان رزقه علي الله فلا يحزن
اختار صح
وتوكل علي الله، و البنت مش بالشكل ولا اللبس ولا الدلع والضحك ،، البنت بالاصل والدين والجدعنة ، اختار حياتك

تحياتي

**love7amada** · 08-09-2010 09:27 PM

نفس اللي قلقان منه
انا ف اخر سنه ف هندسه
و مفروض اخطب
عندي الشقه
بس بجد خايف من بكره جدا
مش عارف اعمل ايه
ساعات بكون عصبي
و متوتر
و مش عايز اكمل ف الطريق ده
و ساعات تانيه بقول ربنا يرزق
هااااااا
هنوصل لايه ؟؟

**A7MED_PHARMA** · 08-09-2010 09:30 PM

كل إلي عنده حماس للجواز..حماسه بيضيع مع أول 100 جنيه يستلفها من واحد صاحبه أو من أبوه
وبالذات في الأيام السودا إلي إحنا عايشينها دي
أنا كمان قررت تأجيل الجواز لأجل غير مسمى

وحسبي الله ونعم الوكيل في إلي كان السبب

**SHNORY** · 08-09-2010 09:48 PM

واحد جاري ربنا يرزقه ويباركله
متجوز من سنتين وهو سنه صغير
والده ساعده وجابله الشقه
بيقولي انا مرتبي 750 جنيه
وباكل وبشرب وبلبس وبتفسح
وربنا بيبارك في القليل
وقالي انا عايش احسن عيشه
بجانب ان عنده مولوده لسه صغيره
المهم البركه يا جماعه
زي بركه الاكل كده في رمضان بتجيب اكل يكفي نفرين وبياكله 6 وبيشبعوا وبيفيض منه كمان

**chato_eg** · 08-09-2010 10:02 PM

القلق ده دليل على فهم لحجم المسئولية..المفروض..المفروض ..إنه يكون علامة إيجابية تدل الوعى...حاول ما تخليهوش يبقى قلق مرضى يتحول فى جزء منه إلى عدم ثقة بالله.....
هو أى نعم إعقلها و توكيل و إزاى 10 قروش مكفيين 1 بطوله فى بيت أهله بالعافية يكفوا أسرة فى بيتها...بس أنا هأقول حاجة...لو بتأخد 500 جنيه...هيبقى آخر الشهر بالنسبة لك زى لو بتأخد 5000 جنيه...نفس الوضع و نفس اللهفة على المرتب و كل حاجة..و ده أنا شفته فى أصدقائى كلهم و فى نفسى كمان...
حاجات الإنسان تنمو و تتعدد...دى أهم قواعد علم الاقتصاد...
لو متجوز...مصاريفك بتكون موجهة لخدمة هدف..
لو عازب...هتلاقى مصادر إنفاق شرعية تماما برضه...
هى الفلوس كده كده مصروفة..المهم بتروح فين...
و كده كده رزقك على إللى خلقك...

و غالبا مش هتتفتح لك بوابة العبور إلى الثراء الحلال بالشكل إللى متخيله غير لو اتجوزت...ما هو إنت لازم تقدم السبت علشان ربنا يديلك الأحد..أمال يعنى يحدف عليك فلوس و إنت ماعندكش مسئوليات ...يبقى كده بيفتنك بالفلوس و ده اختبار صعب جدا جدا..غالبا هتسقط فيه...ادعى ربنا إنك ما تمتحنش فى اللجنة دى

**i_Am_Legend** · 08-09-2010 10:07 PM

طيب..حاجة تانية واحد صاحبى.
بيصرف من والدة ووالدتة-راكب جولف من الزيرو وهو فى 2 ثانوى-واهلة مرتاحين جدا-بقولة اتجوز يابنى بقى انت احسن من غيرك-بيقولى يابنى هاصرف عليها منين- دة مرتبى يا دوب سجاير وبنزين-هايبقى شكلى ايه قدامها-وقدام اهلها- دلوقتى هو 27 سنة.وعندة شقة محترمة .

**maka** · 08-09-2010 10:14 PM

انا قعدت افكر فى الموضوع ده مرارا و تكرارا و معظم زمايلى المتجوزين بيقلولى اتوكل على الله احنا عايشين بنفس مرتبك اللى انت عايش بيه بطولك بس العملية عاوزة جرعة شجاعة كبيرة لان الواحد كل ما بيحسبها بالعقل يلاقيها مقفولة و هبهدل اللى هخدها و هبهدل نفسى بسلف و اقساط وواجع دماغ ان فى غنى عنه - و انتم عارفين الدين هم بالليل و مزلة بالنهار - و طبعا اى قرار هاخده بخصوص الشغل بعد الجواز هقعد افكر الف مرة عكس دلوقتى لان فيه بنى ادمة فى رقابتى

المشاركة الأصلية كتبت بواسطة i_am_legend

دة المرتب يادوب بيقضىينى انا والعربية

هو مكفينى بس مش مكفى العربية للاسف

المشاركة الأصلية كتبت بواسطة lamboz

انا شايف إذا في حد أهله يقدروا يسعدوه يتوكل على الله ومفيش حاجة اسمها حبهدل حد معايا

المشكلة كلها انى مش هحس انى فاتح بيت لما اقعد كل شوية استلف من اهلى , معرفش نظرة مراتى لي هتبقى ايه

كمان اللى مش متعود على السلف زى حالاتى هتبقى العملية صعبة شوية

-

-

الموضوع: أهلك هايساعدوك فى الشقةوالعفش.طيب هاتصرف منين بعد الزواج!مرتبك هايكفى؟انا قلقان.

LinkBack

أدوات الموضوع

عرض

-

-

-

-

-

-

المواضيع المتشابهه

لما تقبض مرتبك بتعمل ايه

النتائج المترتبة على الزواج الثاني ردا على موضوع منافع الزواج الثاني

لسة بتاخد مساعدات مادية من أهلك؟

قسط السيارة كم % من مرتبك

الكلمات الدلالية لهذا الموضوع

المفضلات

المفضلات

ضوابط المشاركة