الموضوع: عن تجربة سنتين يونايتد جروب لأ لأ لأ - السبع يكسب يكسب

زي ما سيادتك وضحت في كلامك هو فعلا ممكن تفرق بين شخص لأخر

و انا عمري ما احب اعيب علي شخص او ازم فيه و فعلا المهندس مختار راجل زي الفل و مش بتتريق قبل ما حد يفهم غلط
و حعتبر موضوع انه يقوللي انت خابط في طوبة او رصيف و مخدتش بالك ده كان اوفر لوود عليه في اليوم ده و مأخدش باله هو بيقول ايه
و حعتبر المهندس التاني بس للأسف مش فاكر اسمه اللي وقف مع صنايعي الزوايا و وضحلي الخطأ اللي في العربية مبيفهمش هو كمان
لكن حرجع لأساس الموضوع ان بقالي سنتين بتعامل مع يونايتد
و ممكن تسأل عن مهندس محمود دوجلاس في الأستقبال أو المهندس مختار نفسه
و أتحدي لو حد فيه اشار لأي تصرف سيء صدر عن حتي و أنا صاحب حق
و فكر المهندس مختار كام مرة انا رجعتله بالعربية بعد ما استلمتها فيها عيب من عندهم و بقابلهم بالأبتسامة و بعمل نفسي عبيط و هما فعلا بيصلحو العيب اللي انا راجع به
لكن لازم تاخد وقفة كدة مع نفسك و ننسي العامل الشخصي بالموضوع و اعدلك الأخطاء اللي كنت بستلم العربية بها و برجعلهم عشانها

المشكلة عند المهندس مختار انه معتمد علي المهندسين اللي معاه بطريقة مبالغ بها يعني يكلف الصنايعي بشغل و من غير ما يشوف التفاصيل يفترض انه تم
- الحادثة الأولي استلمت العربية الزوايا بايظة و رفضوا يعيدو ضبطها و لما اعادوه ادوني العربية زوايا تمام بس الدريكسيون نفسه معووج و لما طلبت عدله قاللي المهندس سعيد اللي مشي من المركز بابتسامة انت حتتدلع علينا طب خليها وقت تاني و رحت ضبطه في بريدجستون عمارات العبور
- لون الرفرف و الكبوت اللي اترشو مفارق همسة بسيطة و المهندس مختار قاللي ساعتها ده عشان جديد بس
- الحادثة الثانية الباب اترش 4 مرات لأنه بيتفك و يدخل يترش و يركب مكانه بس محدش بيشيك علي التقفيل النهائي فمحدش شاف فرق اللون الواضح جدا و اللي مهندس من الاستقبال عندهم ساعتها قاللي انت رشيت عربيتك في الحرفيين ولا ايه و كل اللي شاف العربية مصدقش اني راششها في التوكيل و مع ذلك صبرت و تعاملت مع المركز بمنتهي الهدوء و ابتسمت لهم
- الحادثة التالتة انا واخد العربية شكلها متقفل و مشيت و بعدين اتضح ان الأنوار مش راكبة في مكانها و رجعت قالولي بسيطة و ركبوها و انا واقف
- العربية اتضح انها مكنتش مدهونة من جوا و المهندس مختار مكنش مصدق و لما فتح و بص اتفاجيء ( يعني مكنش شييك علي العربية ولا راحعها اخدها من الصنايعي ادهالي )
- و قبل موضوع الزوايا انا مذكرتش موضوع الفتيس اللي كان العصاية بتاعته بتحك في المجري و اتجمع عدد من المهندسين مع مهندس مختار و قعدوا يدورو لحد ما اتضح ان الصنايعي اللي ركب الموتور مكانه مكنش مركبه علي قاعدته صح ( محدش بص علي شغله ) و فضلت مستي الصنايعي نفسه عشان يفك و يعدل من جديد ( برضه و انا مبتسم )
- و اخيرا موضوع الزوايا اللي خلاني وقفت مع نفسي و نويت متعاملش معاهم تاني و برضه انا مش بعرف اكون قليل الأدب يعني حتي ردي علي المهندس مختار كان محترم لكن بحدة

و السبب الواضح جدا اني شايف ان مفيش رقابة علي الأداء او التقفيل النهائي قبل ما استلم عربيتي يعني في خلال سنتين و كل التعاملات دي مش معقول كل مرة يكون فيه حاجة ناقصة

- و كمان انا شفت بعيني يوم ما دخلت عند العربية عشان الزوايا اخر مرة اتنين صنايعية بيغلسوا علي بعض بعربيات الزبائن و ده امام مهندسين الأستقبال و المهندس الكبير ابو دقن اللي بيستلم منهم العربية بعد ما يخلصوها و محدش اتكلم
- ده و انا برضه حفكرك بمهندس الصالة اللي ابقي اسأل محمود دوجلاس عنه لأني مش فاكر اسمه بس هو طويل و لابس نظارة اللي لما طلبت موضوع الكلاكس يشوفو فيه ايه عشان لمبة البطارية نورت كمان اصلا لطعني و مكنش عاوز يكشف علي العربية و برضه كان عاوز يدفعني كشف علي الرغم انه بشهادتهم مش انا اللي قلت عيب صناعة
- زيد علي كده اسلوبه المستفز جدا لما يقول لمحمود دوجلاس هاتلي صياناته كاملة و حتي محمود من احراجه قاله الأستاذ حسام زبونا من زمان رد عليه قاله اطبعلي صياناته لحد اخر صيانة باسلوب بايخ
- و كمان رفضه باسلوب بايخ جدا جدا و برضه اسأل محمود دوجلاس لأنه هو اللي كان بيتكلم معاه اني اكشف علي التكييف اللي قالولي انه بيفصل في الحر و ده الطبيعي
- المهنسين الجداد اللي في الأستقبال مع محمود دوجلاس بيتكلمو اكتر ما بيعملو و متبعين اسلوب زحلق الزبون و هو مبسوط و احد منهم هو اللي شرحلي طريقة عمل التكييف اللي انا عبيط و مبفهمش عشان اشغله في الحر !
- و برضه هو نفسه ساعة الزوايا مكنش عاوزني ادخل صالة الصيانة ابص علي عربيتي و لما سألني ايه المطلوب و حكيتله علي الحادثة و الزوايا و الفيلم التعبان قالي حضرتك ليك يومين بس لو فيه حاجة في الزوايا بعد ما تستلم العربية
- و قدامي فضلو لاطعين واحد حاجز ميعاد لعربيته الساعة 10 استلموها الساعة 12 تقريبا لما بقي قليل الأدب
- في النهاية احب اوضحلك ان برضه المهندس مختار راجل زي الفل و كل حادثة كان بيدخل عربيتي علي طول و مكنش بيتأخر عليا بس واضح انه زهق من كتر ما برجعلهم بعيوب في استلام العربية
- علما اني في اقرب وقت حكون فيه عند والدي حروح اسلم عليه
لأن مشكلته الأساسية من وجهة نظري هي ثقة عمياء في اللي شغالين تحت ايده بيتكلم علي اساسها مع الزبائن بمنتهي الثقة

بس برضه مش حعمل عربيتي في يونايتد تاني لأن اللي مايشوفش من الغربال يبقي أعمي و أنا شفت كتير معنديش استعداد اشوف تاني لأن بعد كل اللي انا كتبته عن تجربة فعلية مش حد حكالي

- مع ملاحظة اني من وجهة نظري انه كل ما تزيد الزحمة يتدني مستوي الخدمة و ده اللي حاصل في يونايتد