المشاركة الأصلية كتبت بواسطة د.أحمد السعيد
اولا عمر اللى بيحصل فى المستشفيات ما بيحصل فى العيادات
يعنى بيكون عندى فى المستشفى ييجى 100 حالة كشف على اطفال و ده مطلوب يكون فى خلال 3 ساعات و الناس اصلا بتبقى مستعجله و اللى يقول انا سايب شغلى و اللى يتخانق مع الممرضه و اللى يقول انا من طرف فلان زى حضرتك
يعنى بالكتير الحاله مش هتاخد اكتر من 2 دقيقه بس!! (انا فى عيادتى مش بكشف فى اقل من 10 دقائق) و دا طبعا مش مخالفة ضمير لان الناس هى اللى مش بتدينى فرصه و كله مستعجل
و لكن طبعا بيكون فيه حالات محتاجه فحص طويل و دى مش بتزيد على حالتين فى اليوم
يعني في النقطة دي انا مقدرة انها خارجة عن ارادة الطبيب وده عيب نظام مش عيب طبيب
انا بتكلم في نقطة تانية
ان الطبيب يكون قاعد يهزر ويضحك مع زمايلة والناس قاعدة مستنية نظرة عطف من اي طبيب واكيد حضرتك بتشوف من ده كتير من زمايلك
او في العيادة تبع المستشفى الطبيب اللي جاي الساعة 11 واعتقد مواعيد المستشفى 9 ؟؟ او 8ونص
انما لو عيادته الخاصة الدكتور بيبقه حريص ميضيعش وقت لان ضياع الوقت معناه ضياع فلوس
ودي سمة موجودة في اي موظف حكومي في مصر مش بس الطبيب لكن بردو مش هعمم لان في الكويس وفي العكس
و للاسف موضوع الكشف فى المستشفيات العامه مأساه لان 70 % من اللى بييجو يكشفوا بيبقوا كويسين و كانو فى مشوار و قالوا نعدى نكشف بالمره!! و نصرف علاج ينفع لوقت شده و طبعا الطفل بيكون كويس فلا داعى لكتابه مضاد حيوى تلاقى والدته بتتخانق معاك ليه و ليه و اشمعنى مكتبتلوش .....
و على فكره الممرضات اللى زى الغفر اللى بتقولى عليهم دول موجودين فى كل مكان و كلمه زى الغفر دى طبعا ظلم ليهم لانك لو كنتى مكان اى واحده فيهم و تعرضتى لموقف شتم او اهانه من المرضى كنت كرهت حياتك و سبتى الشغل و على فكره كل التمريض بيتشتم و يتهان من المرضى فى اليوم مرات و مرات حتى المحترم منهم و الله ... دا فيه مرضى كتير بتغلط فى الدكاتره و تسب و تلعن فيهم عينى عينك و كام مره يصر الدكتور على عمل محضر و يتصل بالنجده و تيجى النجده و تقول لازم الطرفان يباتوا فى القسم لغاية الصبح اما يتعرضوا على النيابه !!! (شوفتو الاسستهبال و عدم حماية الجهات الطبيه وصل الى ايه )
فبالتالى بتنتهى القصه بالصلح او صرف النجده و طبعا المريض يروح لاهله يحكى انا شتمت و سبيت ال...... اللى فى المستشفى مما يجرأ الناس على الدكاترة مش التمريض؟؟؟
اوك انا مع حضرتك ان المرضى مش ملايكة وفيهم ناس جاية من اسوأ البيئات بس انا والله تعليقي مش على النوعية دي
انا شوفت بنفسي ناس غلابة ضعيفي الشخصية والممرضة بالنسبة لهم حاجة ياما هنا ياماهناك وميقدرش يفتح فيها ولا يرد ولا يمنع عن نفسه التهزيء والشتيمة
والله والله والله كان في واحدة ممرضة كبيرة في السن كانت بتقول ياشر اشطر على كل الناس
وكانت هتعملها معايا انا كمان عشان بسألها ينفع جوزي يدخل معايا انا لميت الموضوع عشان مقلش قيمتي معاها
وكل واحدة تمسك فيها تقولها مش هرد عليكي عشان انتي اد امي
لما في الاخر جات واحدة مسحت بيها الارض وكانت الممرضة هي اللي غلطانة والدكاترة طلعوا ونصروا المريضة عليها
وغيرها كتير مش بيستخدموا غير اسلوب الشخط والنطر بطريقة مستفزة
لكن في نفس الوقت شوفت رئيسة ممرضات هزأت ممرضة عشان مش راضية توصل حلق سابته مريضة على جهاز السونار وبتقولها ده فالصوا هزأتها وقالت لها برضو سلميه لاهلها
و فى النهايه اللى بييجى غلبان لازم هياخد دوره لغايه اما يكشف لان كلهم مش معاهم واسطه و للأسف هى دى امكانيات المستشفيات الحكوميه ( يعنى انا عندى فى المستشفى مكان الكشف 3 غرف و بالكتير بياخدوا 6 دكاتره لدرجه ان الواحد يروح العياده الخارجيه علشان يكشف على المرضى ملاقيش مكان اكشف فيه و احيانا الاقى مكان و الاقى الكراسى مكسره!!!
و ربنا يكون فى عون الغلابه و يكفيهم و يكفينا شر الامراض
و آسف للأطاله