الموضوع: الي مالكي فيات جراند بونتو الرجاء الدخول رأيك يهمنا

المشاركة الأصلية كتبت بواسطة allinone

أنا فكرت أعمل الموضوع ده عشان أي حد معاه العربية دي أو كانت معاه ..
يا ريت يشارك برأيه فيها ..
يعني مثلا :
1-موديل سنة كام ؟
بونتو ايفو 2011 ال1400 77حصان
2-ايه هي العيوب من وجهة نظرك ؟
العربية مع التكييف بتريح ومش عارف ايه العلاقة بس لما التكييف بيشتغل الدواسات بتعلى.. ممكن اصورهالك فيديو لو عايز.. والفرامل بتبقى عاملة زي البالونة... الstart stop بتاع البنزين مش عملي ف مصر وانا علاطول قافله حفاظاً على المارش لأنه بيبان مش زي ما الناس في التوكيل بتقولك انك مش بتحس انه العربية فصلت وقامت.. ولما بتفصل التكيف بيفصل وده مش صح... مساحة الازاز فيها كبيرة اوي لدرجة انها بتبقى جهنم في الشمس والتكييف مش بيقدر عليها... والتكييف في الايام ام 43 في الشمس دي مش بيقول اوي.. وسعرها مبالغ فيه شويه... السقف طري لو كلب طلع علية بيطبق كأنه صفيح... ومفيهاش ولاعة ولا طفاية سجاير وانا عملت خناقة في التوكيل وجابولي من ايطاليا ولاعة وطفاية سجاير ليها

غير حاجة كمان بقى.. الكبوت مزنوق شوية.. والتعديل فيها صعب عشان الكمبيوتة ماسكها كلها بإيد من حديد.. خايف العب في اي حاجة فيها... التابلوه اللونين مش موجود في كل الالوان ودي كانت مفاجأة غير سارة وانا بستلم.. انا اخترت النبيتي عشان الفرش احمر.. طلع الفرش الاحمر والتابلوه الاجمر في الابيض والاسود بس والتابلوه عندي رمادي
3-ايه هي المشاكل الي قابلتك وعالجتها ازاي؟
الحمد لله العربية ماشية تمام كما هو متوقع من عربية معموله بالكامل في اطاليا البلد
4-ايه اكتر المميزات انت شايفها في عربيتك ؟
شكلها متميز جداً لكن في المعرض.. اول ما تنزل بيها الشارع فعلاً بتحس انك راكب عربية صغيرة... استهلاك البنزين خرافي... 2 او 3 لتر في ال100 كيلو.. فعلاً كنت بنسى انا اخر مرة حطيتلها بنزين كان امتى.. حتى والتكيف شغال... الكمبيوتر بتاعها مليااااان اوبشنز.. تحب تلعب فيها فعلاً... موضوع انه الفوج بينور في الاتجاه اللي انت بتلف فيه عشان ينورلك... الترخيص مش بيكلفك كتير عشان 1400.. الجنوط تحفة
5-ايه اكتر حاجة شدتك في العربية دي عشان تشتريها؟
انها ايطالي بالكامل واشيك عربية في فئتها وقعدتها من جوة تحفة والعدادات شكلها كلاسيك سبور كده كأنك راكب مازيراتي
6- ايه رأيك في التوكيل مريحك ولا لأ ؟
التوكيل مقرف في الاستلام ولسه متعاملتش معاهم في الضمان بس في ميزة حلوة انك لو مأمن في قناة السويس تبع التوكيل.. بتروح مركز الخدمة بتاع الهرم وتصلح وتمشي وهما بيتعاملو مع شركة التأمين... لحد دلوقتي مخدتش المفتاح الريموت وقالولي دي نواقص وهييجي ولسه مجاش وانا ماشي بالمفتاح الاضافي اللي مش ريموت.. الورق اتأخر اسبوع وكنت ماشي من غير نمر بس الحمد لله محدش وقفني
7- ايه رأيك في أسعار قطع الغيار ؟
مجربتش لسه اشتريلها قطع غيار

أرجو المشاركة من الجميع ..

المشاركة الأصلية كتبت بواسطة allinone

أنا فكرت أعمل الموضوع ده عشان أي حد معاه العربية دي أو كانت معاه ..
يا ريت يشارك برأيه فيها ..
يعني مثلا :
1-موديل سنة كام ؟
ايفو موديل 2011 مانيوال - باكديج 1
2-ايه هي العيوب من وجهة نظرك ؟
باب تنك البنزين بيفتح من بره - الصاج تطري ( بس بياخد و يدي معاك ) - الابواب ( لازم ترزعها علشان تقفل ) - عفشتها ناشفة ( في المطبات مقرفة )
3-ايه هي المشاكل الي قابلتك وعالجتها ازاي؟
قبل كده سمعت صوت عالي من تحت العربية ( العربية حكت في طوبه كبيره من تحت ) - قولت اكيد حاجة اتخرمت من تحت الموتور و بصت لقيت ( الحمد الله ) طلع في كساحة تحت الموتور كبيرة ( العربية مش مصفحة من تحت ) و هي اللي خبطت في الطوبة ( و دي ميزه مش عيب )

4-ايه اكتر المميزات انت شايفها في عربيتك ؟
سواقتها ممتعة اووي ( بس الواحد بيسوق باحترام علشان خايف عليها برده ) - مميزه اووووووووووي ( الاقي ناس بتسيب عربيتها و تبص علي العربية و تبرق في اسم الماركة ) - سوند سستم خرافة و مميز
5-ايه اكتر حاجة شدتك في العربية دي عشان تشتريها؟
في غيرها في الفئة السعرية مافيهاش غير موتور و بدي - ايطالي ( كان نفسي في ايطالي او اسباني ( سيات ابيزا ))
6- ايه رأيك في التوكيل مريحك ولا لأ ؟
هو لغاية دلوقتي محترم اووي
7- ايه رأيك في أسعار قطع الغيار ؟
لســـــــــــــــــــــــ ـــــــــــــــــــــــــ ــــــــه

أرجو المشاركة من الجميع ..