الموضوع: ما رايكم فى احياء حملة المقاطعه رد على حرق المصحف

المشاركة الأصلية كتبت بواسطة ahmed samy

يا استاذي الفاضل
انا قاطعت أيام المقاطعة
ولو حصل تاني هاقاطع

بس أنا عارف و ظهر بالدليل انه مش سلاح

الموضوع أبسط من الكلام فيه

الصانع اللي بيبيع هو الطرف الأقوى و الأطول نفسا
و الـ"زبون" اللي بيشتري هو الطرف الضعف و الأقصر نفسا

بضائع المقاطعة مش بس الكولا و مارلبورو

المقاطعة فيها بضائع أساسية منها شحن المراكب مثلا
أجهزة التشخيص بالأشعة
منها أدوية كمان

بكل خزي
و أسف
ووداني مدلدلة
بقولك
مش هانستحمل نقاطع بجد

و خد المنطلق التاني

هاتقاطع مين ولا مين

فرنسا ولا ألمانيا و لا الدانمارك ولا هولندا لنشر الرسوم (ودي عملة لا تسقط بالتقادم ولا اعتذروا عنها)
أمريكا و بريطانيا و استراليا لاحتلالهم العراق أو مشاركتهم فيه
تقدر تقاطع الصين ؟
طب و الله أنا شفت مقالات مضحكة للأسف تدعو لمقاطعة الصين ايام احداث تركستان الشرقية أو شينجيانج كما يسمونها
شعب الإيجور المسلم تعرض للتنكيل اللي ما حدش حتى قدر ينقله من قوة الدولة الصينية

و تفتكر -لو قدرت- و قاطعت الصين هاتخاف و تعتبر ؟؟؟؟

بس اقلب الأية

لو الصين قررت تقاطعك

أو الدول اللي فوق دي قررت تعمل كده

دي بقى ممكن تعرفك معنى المقاطعة

ومش هانفرق و قتها عن غزة أو عراق الحصار كتير

مقاطعتنا أضراب
و مقاطعتهم عقوبات



و القزم اللي يقول أنا جدع

يبقى مسطول

من رائيك نعمل ايه
نقف نتفرج
و بعدين ما و انا و انت و كلنا مسئولين
لازم تكون هناك صحوه و رجوع للدين و للقران
و لازم نقف موقف تجاه المنافقين اللى بقوا فى كل مكان بينا
بينخرو فى عظام الامه زى السوس

المشاركة الأصلية كتبت بواسطة waleed_fathy

من رائيك نعمل ايه
نقف نتفرج
و بعدين ما و انا و انت و كلنا مسئولين
لازم تكون هناك صحوه و رجوع للدين و للقران
و لازم نقف موقف تجاه المنافقين اللى بقوا فى كل مكان بينا
بينخرو فى عظام الامه زى السوس

لأ طبعا مانتفرجش
نعلم ولادنا احنا ايه
نزرع فيهم الكرامة و الحرية
و نخلي الدين جواهم و نوريهم اخواتهم اتعمل فيهم ايه
انا كنت في مدرسة في السعودية
كانوا بياخدونا في حصص ينزلونا المكتبه يورونا برامج وثائقية عن مذابح البوسنة
عمري ما هانسى
ما كانوش بيعلمونا التطرف
كانوا بيعلمونا ان اللي مالوش دراع ياكل على وشه

مافيش قدامك تقابل بيه ربنا غير انك تحاول تنشئ جيل يقدر

على اللي احنا مش قادرين عليه

استغفر الله العظيم يارب

المشاركة الأصلية كتبت بواسطة dr-mohamed

انا معاك تماما في ان هذا الجيل انتهي للاسف وما فيه امل
والمهم الجيل الجديد بس الكارثة ان الجيل ده هو اللى بيربي الجيل الجديد ولو ربوهم يبقي عليه العوض ومنه العوض

اما موضو ع السعودية فاللاسف لم يكن يتم عن ايمان وصدق وانما كله شغل سياسة من يتكلم الان عما يتعرض له المسلمين من مذابح في اي مكان في العالم يكون مكانه المعتقلات
كان يتم تشجيع المجاهدين للقتال في افانستان حين كانت امريكا تريد ذلك
والان انقلبوا عليهم
المجاهدين الذين يريدون الجهاد في العراق يلقي القبض عليهم ويلقون في المعتقلات

عارف طبعا

انا مش باشكر في السعودية قد ما باشكر الحدث نفسه

سواء حصل بدافع سياسي أو بدافع ديني غيور

النتيجة اني كبرت و جوايا حاجة
هاديها لأولادي

يمكن هم يعملو بيها اللي انا ماقدرتش اعمله

كنا في المدرسة عندنا زي اوبيريت اسمه جراح سراييفو
كنت كل ما اجي اقوله اعيط

و لحد النهاردة لما باسمع جزء معين منه

باعيط و هو هو نفس الجزء

ممكن تبحثوا عن اغنية جراح سراييفو

وده مطلعها

سراييفو تقول لكم ثيابي
.......................ممزقة و جدراني ثقوب
محاريبي تئن وقد تهاوى
......................على أركانها القصف الرهيب
و أوردتي تقطع لا لأني
.....................جنيت ولا لأني لا أتوب
ولكني رفعت شعار دين
......................يضيق بصدق مبدئه الكذوب

المشاركة الأصلية كتبت بواسطة muslima

فعلا موضوع المقاطعة أسهل حاجة متاحة للجميع

قاطع منتجاً ، تنقذ مسلماً !!!

فعلا أسهل حاجة
لا تعب ولا تفكير ولا فايدة حتى