الموضوع: محتاج رأيكم ضروري ..

طيب ياشباب فيه عربيه ظهرت قدامي من عشر دقايق عايز رأيكم فيها :
فيات 125 ايطالي موديل 1972 حالتها جيده ومعقوله جدا ... صاحبها طالب 12500 جنيه .. ملاكي .. يعني مش متحوله .. رأيكم ايه ؟؟؟

عاجبني جدا تحمسك للسيات وده مخليني أتعلق بيها بس هناك جديد .. أنا كنت تحت من شوية وجربت واحده ... كرشي للأسف عامل مشكله .. هاهاهاهه زانق الدركسيون وبادخل العربيه بقدرة قادر .. أما الخروج مافيهوش مشاكل .. ورحت شفت الـ 125 لقيتها أريح وأوسع وحالتها معقوله جدا .. الحقيقه محتار ياأستاذنا وعين في السيات وعين في الفيات !!!!!! مش عارف أقرر

اهلاً بيك يا أ/ أحمد عضو جديد و أخ جديد ,
بص يا إستاذي ,
مش المقياس في العربية عمرها فقط يعني موديل 80 مش بالضرورة أفضل من موديل 70 ,
المهم الحالة ففي عربيات مو 70 و أفضل من عربية مو 80 لأن صاحبها محافظ عليها و بيصرف عليها و معملتش حادثة ,
يعني الحالة هي الفيصل ,
بالنسبة للـ 125 فدي عربية تمام لو حالتها سليمة , و قطع غيارها متوفرة و رخيصة جداً ,
انا والد صديق لي عنده العربية دي من الزيرو و محافظ عليها و مش عايز يستغى عنها ابداً ,
على العموم خللي واحد سمكري أو ميكانيكي يكون ثقة يشوفها و يقدرها لك , بس أهم حاجة انك ما تستعجلش علشان متندمش , و حاول تصلي استخارة ,
و ربنا يوفقك للإختيار السليم .

أخي الفاضل أ/ أكرم
أشكرك على ترحيبك وأتشرف بأخوتكم جميعا
ماذكرت حقيقه لايختلف عليها اثنين .. وان شاء الله سأذهب باكر ومعي ميكانيكي للكشف عليها .. وان شاء الله سأصلي استخاره وربنا يكرمنا ودعواتكم
أهم من شراء سياره أني وجدتكم .. والتقيت بكم وليتني تعرفت عليكم من زمن .. ونعم الأخوه جزاكم الله كل الخير وبارك الله لكم وفيكم

شوف يا أخى العزيز، انا قريت كل الردود واحترت والله وانا بفكر معاك

بس انا هقترح عليك حاجة حاول تسعى فيها يمكن ربنا يكتب لك فيها خير

العربية ال 126 مناسبة جدا لفردين على عكس ما يعتقد البعض لأن تصميمها موسعها جدا من الأمام على حساب الخلف وعلى حساب الشنطة ، ولذلك هى قد تبدو صغيرة للغاية لكن لو ركبتها هتحس انها معقولة من الأمام

الحاجة التانية، فيه مدينة قريبة منكم اسمها دمياط، يعشق اهلها السيارة ال 126 نظرا لطبيعة العمل فى الأخشاب والموبيليا فى المدينة التى تستلزم المرور فى حوارى ضيقة، لذلك انا متوقع انك لو دعبست شوية فى دمياط ممكن تلاقى 126 بحالة نضيفة جدا لما عرف عن اهل هذة المدينة من الحرص على مقتنياتهم، وانا شخصيا من تجربة سنتين مع ال 126 و عدة تجارب مع السيات اقول لك ان 126 نضيفة برقبة السيات، خصوصا ان ال 126 تبريد هواء ومبتسخنش،

لو مستريحتش فى ال 126 يبقى فكر فى الفيسبا وليس الموتوسيكل الصينى، الفيسبا قعدتها اريح وانسب لمن يعانون صعوبة فى الحركة

وربنا يوفقك لما فيه الخير