الموضوع: اعمل الفرح فين

لو 150 فرد وعايز حاجة في اوتيل 5 نجوم وجامدة جدااااااااا ومنتهى الشياكة وبوفيه refill
عليك وعلى فندق بيراميزا اللي قدام شيراتون القاهرة .. ال 150 فرج ب 25 الف وحاجة تحفة جدا
وفندق سونستا فيه قاعتين .. القاعة الصغيرة اسعارها معقولة جدا والمكان برضه يجنن
بس تاخد 120 بالعافية وبرضه تكلف في حدود ال 25
ونوفوتيل المطار كمان حلو اوي ويتكلف برضه 20 -30

بس قاعة بيراميزا اكبرهم واشيكهم ..


ونادي الشرطة اللي في الجزيرة عندهم قاعتين مناسبين ليك .. قاعة بتاخد 100 فرد وممكن لحد 150
وقاعة بتاخد من 150 لحد 200 او 250
وشيك جدا جدا والمدخل بتاع النادي حلو اوي واكلهم ممتاز ( مختلف تماما عن نادي الشرطة مدينة نصر )
القاعة الصغيرة 17000 شاملة كل حاجة ماعدا كام حاجة صغيرين كده مش هيكملوا 1000 كمان
والقاعة المتوسطة 23000 برضه شاملة كل حاجة

عندك بقى دور الجيش مستويات مختلفة
انا بصنفهم 3 مستويات اسعارهم بتبدأ من 13 الف او اقل شوية لحد 50 الف

لو عايز تفاصيل اكتر انا عندي كل برشورات دور وفنادق مصر

لو عايز بقى حاجة هاي كلاس اوي ..
نظام جراند حياة وسميراميس وكونراد ومينا هاوس
فدول اسعارهم بتكون متوسط 150 فرد ب 45 - 50 الف
والفرد الزيادة 250 - 300 جنيه

انا لسه لافة على كل الاماكن دي من شهرين بالظبط
ولو بس تقولي ميزانيتك كام هقولك على المكان المناسب وهتكون مبسوط انت وعروستك ان شاء الله ..
والف الف مبروك وربنا يتمملك على خير وعقبالي :)

المشاركة الأصلية كتبت بواسطة egyptawy2010

الف شكر لحضرتك للمعلومات المفيدة ده

طيب ممكن حضرتك تعمللهم سكان وتبعتيهم

سوال كمان حضرتك حضرتى فرح فى نادى شرطة الجزيرة وياترى هو احسن ولا دار الهيئة الهندسية

شكرا

اعملهم سكان كلهم صعب اوي ..
انا ممكن اعمل للحاجات المناسبة لميزانية حضرتك وعدد افرادك ..

بالنسبة لنادي الشرطة اللي في الجزيرة انا عملت خطوبتي هناك من شهرين ..
ودار الهيئة اتفرجت على كل قاعاته لكن محضرتش فيه .. ناس حضرت وقالتلي تعليقاتها ..

بصراحة المكانين كويسين .. بس بالنسبة لمدخل النادي او الدار من بره .. مدخل نادي الشرطة تحفة بمعنى الكلمة احلى من مدخل دار الهيئة ..
بالنسبة لمستوى القاعات المكانين حلوين جدااااا
نادي الشرطة القاعتين الصغيرة والمتوسطة شيك اوي .. ودار الهيئة فيه قاعة عايدة ستايل فرعوني وقاعتين تانيين لسه كانوا عاملين فيهم تجديدات وشكلهم ما شاء الله جميل جدا ولسه جداد ..

يعني بصراحة المكانين كويسين اوي .. والاختيار بينهم صعب ..
انا ساعتها كنت مجبرة اعمل في الشرطة عشان مكنش فيه مكان فاضي في الوقت ده ..
انما لو كان في ايدي اختار كان هيبقى صعب جدا لان المكانين كويسين ..
وكده كده ممكن تزود على البوفيه لو قلقان انه مش هيكفي ..
هعملك سكان للبروشورات بتاعتهم ..
ولو سمعت عن اماكن تانية عايز بروشوراتها قولي وانا اعملها سكان لحضرتك ..

وربنا يتمم على خير ان شاء الله ..

صحيح نسيت اقول كمان على دارين حلوين اوي .. بس الميزانية هتعلى شوية عن الشرطة والهيئة الهندسية
عندك دار الامداد والتموين .. ودار الاسلحة والذخيرة ..
هعملك سكان برضه للبروشورات بتاعتهم ان شاء الله ..

ده نادي الشرطة الجزيرة القاعتين الصغيرة والمتوسطة ..

دول دار الهيئة الهندسية .. بس القاعات الجديدة مغيرين اساميها معرفش الاسامي الجديدة ايه .. اللي هما كانوا الخضراء والجريل .. اعتقد بقت الياسمين وحاجة كمان ..

دول الاسلحة والذخيرة
عندهم قاعة قصر الشةق تحفة وجميلة جدا وبيعجبني شو التورتة وبحس انهم منظمين جدا ..