الموضوع: ارجو المساعدة - الدخول للرجال فقط -

المشاركة الأصلية كتبت بواسطة hossam_hassan

اسف لو كلامى هيضايقك بس مستغرب جدا من محاولة تبريرك للغلط اللى انت بتعمله، معلش جاوبنى على كام سؤال:

- ياترى زوجة حضرتك اللى بتلوم عليها انها مش بتسمعك كلام زى اللى بتسمعه من الحيوانة اللى بتعرفها، ياترى زوجة حضرتك بتسمع منك كلام حلو و بتشوف منك اهتمام فوق الوصف و بتقابله ببرود؟

- لو زوجتك عرفت و رفضت مسامحتك و اصرت على الطلاق، يا ترى هتعرف تعيش بعيد ان اولادك؟

- ايه اللى بيبسطك اكتر، انك تكون مع الحيوانة دى ولا مجرد انك تغمض عينيك و تتخيل وش بنتك او ابنك.

ربنا اكرمك بنعم لا تعد ولا تحصى و انت بتدوس عليها برجليك، كل لحظة بتقضيها بعيد عن بيتك و كل مليم بتصرفه على حد غير ولاد و مراتك بتخسرهم من عمرك و مش هتقدر تعوضهم.

اخيرا، انصحك تتقى ربنا فى بيتك و ياريت تقراء الموضوع ده و حط نفسك مكان صاحب الموضوع علشان تعرف قيمة النعمة اللى انت فيها، متزعلش منى بس انا كمان باعمل كده لما الاقى نفسى هفترى و اتجبر، باكسر نفسى، انت كمان محتاج تعمل كده.

http://www.nilemotors.net/nile/180235-a.html

ربنا يحميك ويباركلك ويبارك فيك ويخليلك بناتك ومراتك ويحفظهملك ويحفظك ليهم يارب ..
ويكرمك في حياتك ويديلك على قد نيتك يارب ..
ما شاء الله .. ياريت كل الرجالة كده ..
ما شاء الله ..

( انا مابردش على صاحب الموضوع احتراما لرغبته .. بس مقدرش امسك نفسي عن ان ادعي للراجل ده دعوة حلوة )

حضرتك بتروح البيت مش بتبقى طايق نفسك صح؟ وبتبص لابنك وتقول انا بعمل كده ازاى؟ طيب ما حضرتك اللى بتحكم بنفسك ان دا مينفعش خالص.
احنا اولا مش ملايكه لازم بنغلط بس يبقى الغلط ليه حتى حدود بمعنى مش ان واحد اكصدامه حك فى عربيتى انزل اخبطه بمطواه هو دا اللى حضرتك بتعمله زوجة حضرتك مع احترامى الشديد ليها غلطت فى انها مبتقدرش تاخد بالها منك كويس خصوصا من اللى فهمته ان حضرتك شخص حنين بتحب انك تدى الحنان وتاخده لكن مش معنى كده ان حضرتك تقتلها وتدور على الحنان دا بره البيت.
حضرتك تقبل ان شخص غريب يتصل على تليفون البيت عندك ولو نمرة غلط ، عيل بيتصل باى نمرة فزوجة حضرتك ردت عليه "مين لا النمرة غلط وقفلت" فالولد المريض دا لما لقى صوت ست هو اللى رد اتصل تانى عشان يعاكسها فهى اكيد هتثور اوى وهتقولك رد على الشخص دا . السؤال دلوقتى حضرتك ممكن تعمل ايه؟
هتقول للولد دا عيب؟ هتحاول تعرفه عشان تأذيه ؟ هتغير رقم تليفون البيت؟ الولد دا اخد حق مش حقه وبيحاول يعاكس زوجتك طب قولى انت لما بتكلم البنت دى بتبقى بتاخد حقك؟ طيب حضرتك حسيت باهانة علشان واحد عاكس زوجتك وهى متضايقة من كده جدا طيب محستش بشعورها وانت مبسوط مع البنت دى؟ طيب هو حضرتك عندك ولد وبكره هيتجوز فى عزك ان شاء الله ووقع فى نفس مشكلتك هتنصحه بايه؟
اكيد حضرتك وانت بتنصحه هتقوله الست اللى انت متجوزها دى ست محترمه وبتحافظ عليك واصبر عليها لانها بتتعب فى شغل البيت وحافظ على اولادك ومش عيله هتضحك عليك.
النقطة الاخيرة حضرتك اكيد عارف ان الشخص اللى بيتأثر كتير بشخصية والدته بيقع فى مشاكل مع زوجته لذلك المفروض الواحد يبقى عارف ان ماما غير الزوجه انا كده بالظبط فى بيتى امى وانا قريبين جدا من بعض دايما تلاقينى نايم فى حضنها واحب اكلها اكتر من اكل اى حد مرتبط بيها جدا لكن مبعملش مقارنة بينها وبين مراتى اصل لو عملت مقارنه هتعب دايما اشوف الحلو بس من الاتنين.
وفى الاخر بقولك اعمل الصح عشان متندمش لان لو الموضوع موقفش دلوقت هتخسر مراتك وبيتك والبنت دى حضرتك مترداش انها تكون البديل لانها مش هتقدر تعوضك

المشاركة الأصلية كتبت بواسطة popupp

اشكركم كلكم يا جماعه علي الردود
انا متباع الموضوع بس من الاكونت التاني
فرصة بقي النهاردة الجمعة
تعرفوا وانا بقرأ ردودكم حصل حاجتين في منتهي الغرابة
مراتي دخلت عليا اودة مكتبي وشافتني قاعد بتصفح المنتدي وهي عارفة اني عضو نشط علي نايل موتورز
ويدوبك خرجت من هنا ولقيت البنت دي بتتصل بي تخيلوا
طبعا انا وشي جاب الوان ومعرفتش اتصرف ازاي خصوصا ان معظم الردود بتقولي مردش عليها تاني ولا اكلمها وجرس التليفون بيرن
رحت عامل التليفون صامت
وراحت بعتالي رسالة اراهان اتخن راجل فيكم ميقدرش يستحمل الكلام الحلو اللي فيها
وطبعا مسحتها لان تليفوني بيخضع لتفتيش مستمر


الناس اللي هنا ردودهم تقريبا واحدة لان اصلا مفيش غير الحل ده اني ابعد عنها والمهم البيت والعيال وكل الكلام ده
بس محدش فيكم قالي وانااااااااااااا ايه مش بني ادم؟؟؟؟؟؟؟؟؟؟؟
مش لي مشاعر واحاسيس
ثم انا لو حاولت بس التلميح لها سواء اني علي علاقة ببنت تانية او انها تغير معاملتها لي حتبقي سنة سودا عليا وعلي العيال

يا جماعه ده انا لما طلبت منها تغير لون شعرها قعدت 3 شهور علي ما غيرته وكأني بقلها حنغير جنسيتنا
ثم انها عصبية جدا ولا تتحمل اي نقاش من اي نوع حتي مصروف البيت لا تتحمل في اي نقصان لاي سبب اي كان ولا يجوز لي الاعتراض او حتي المناقشة
انا برتاح اوي وانا في الشغل او وانا في اودة مكتبي وهي تقريبا منعزلة عن باقي الشقة عشان اعرف اشتغل فيها بعيد عن وش العيال وصوت التلفزيون
فبحس اني مرتاح طول ما انا بعيد عن البيت بكل اللي فيه - عدا اولادي -

حتي لو بعدت عن البنت دي برده مش حبقي مرتاح وهو ده غرضي اصلا اني اكون مرتاح بس

كل الردود اللي جاتلي علي الخاص بشكرها جدا جدا حقيقي انتم اصدقاء فعلا

يا جماعه اللي ايده في المياه مش زي اللي ايده في النار
انا عايز ابعد عنها وعن اي بنت تانية بس عايز حياتي تبقي فيها لمسة حنية بس فقط لاغير
هو انا كدا بطلب طلب صعب وحرام؟؟؟؟؟؟؟؟؟؟
اسف للاطالة وعلي فكرة انا متابع الموضوع من الاكونت الاصلي بتاعي
واشكركم من كل قلبي

يا باشا ما تزعلش من الكلام اللي هاقوله: أنت عايز كل البنات يبقي طبعهم واحد؟ أكيد كل بنت بتتميز عن التانية في جانب معين، وأنا حاسس إنك بدأت تتطلع "القطط الفطسانة" اللي في مراتك علشان تبرر تصرفك ، مع إنك هاتلاقي جوانب تانية حلوة كتير فيها. بص لو قرارك نهائي بإنك تظل على علاقة مع البنت دي يبقي لازم تكون العلاقة دي في النور علشان لما الناس كلها تعرف علاقتك بيها ما فيش حد يقدر يلومك لأنها هاتكون مراتك، علي الأقل من الناحية الشرعية حلال. بس أرجع وأقول لو عايز تتجوز واحدة تانية تحسسك بالحنان والمشاعر الدافئة يبقي مش البنت دي لأنها عارفة إنك متجوز وهاتخرب بيتك وبتقول لك كلام "على حد تعبيرك " يدوّخ وهي مش مراتك ولا خطيبتك ولا أي حاجة يبقي ازاي تخليها في المستقبل أم عيالك، بالمناسبة إيه اللي خلاك ضامن إن البنت دي مش بتقول نفس الكلام لشاب تاني؟؟؟؟؟ أنا شايف المنطقي إن البنت تدوّر علي شاب مش متجوز علشان الجواز وكده، هي عارفة إنك متجوز وبردوا بتحوم حواليك يبقي حاجة من الاتنين وسامحني: إما إنها طمعانة في حاجة عندك" فلوس مثلا" وفي الحالة دي لو أخدت مرادها هاتبيعك --------- أو إنها غلطت غلطة "سامحني" وعايزة تلزقها فيك، وفي الحالة دي مش هاتعرف تتصرف.... أنا آسف على إسلوبي مع حضرتك بس والله كلنا خايفين عليك

اخى العزيز
مشاركاتك الاخيره هى اكبر دليل على ان كل رسايلى ليك على الخاص صحيحه, طبعا انا مبتنبأش الغيب لاكن انا وضحتلك كل حاجه على الخاص
و افتكر ان كل الاعضاء الكرام هنا نصحوك
انت بتقول ان غرضك ترتاح و ان بعدك عنها مفيهوش راحتك
و انا بقول لك الموضوع ببساطه انك اتعودت على حاجه (غلط زى اللى اتعود يشرب سجاير و بيحاول يسبها بتبقى صعبه عليه فى الاول) و انك حتاخد وقت تكون متضايق فيه بس بعد كده هتفتكر الايام دى و تحمد ربنا انها خلصت و الموضوع ماتطورش و اعتبرها خبره و درس ليك فى الحياة
كتر كلام فى الموضوع ده معادش له لازمه
و احنا مهما حاولنا نخليك تعمل حاجه غير اللى انت مقتنع بيها مش هنعرف حتى لو اعدنا نتكلم للسنه الجايه
شوف اللى انت عايز تعمله و اعمله
مات الكلام