قبل رمضان روحت بريدجستون ضبط زوايا وراجعت على النيتروجين وطلبت من الفني يراجعلي على العفشه
وسألته هل فيها حاجه ؟؟قالي كله تمام وماشاء الله عربيتك كأنهازيرو من تحت ..

قبل العيد بيومين سمعت صوت طقطقه في العجله اليمين بيروح وييجي وللاسف انا من النوع الوسواس شويه في عربيتي ممكن يجيلي الهسهس بسبب صوت بسيط ..طبعا ماكدبتش خبر لفيت على حوالي 5 عفشجيه كل واحد عنده رأي كما يلي::

الاول:عربيتك زي الفل وانت بس حساس شويتين.

-التاني:احنا لازم نفك العفشه كلها ونشوف العيب منين

-التالت:هي المساعدين عندك حلوه بس افضل اركبلك اتنين استيراد من عندي الاتنين ب 300 جنيه!!!

-الرابع: هي علبة الدركسيون مافيش غيرها هافكهالك ونراجع عليها وبعدها اكيد الصوت هايروح!!!!!!

-الخامس: احنا لوغيرنا العفشه كلها امامي وخلفي اكيد الصوت هايروح!!!!!!!!!!!!!!!!!

طبعا انا اعتبرتهم كلهم زي الدكتور اللي مش عارف التشخيص وعايز يكتب للعيان كل ادوية الصيدليه يمكن في الاخر يخف....

....قررت ان اروح لواحد سادس ودعيت ربنا قبلها انه يلهمه الصواب ويعرف العيب فين لاننا كنا يوم الوقفه ولو الصوت ده مكانش راح.. لايمكن قلبي هايطاوعني اسافر بالعربيه بالاولاد في العيد....وسبحان الله الراجل ركب معايا العربيه وقالي
المساعد اليمين بتاعك ده مفكوك ...وفعلا روحنا عند الورشه وافاجأ ان الصاموله بتاعة المساعد اليمين مهويه وهوده السبب ان الصوت كان بيروح وييجي شويه المساعد يشتغل وشويه يقفش

الراجل قام ربطهالي وانا مذهول اني خلصت بسرعه كده بدون فك عفشه ولا حاجه ....وسألته ايه رأيك العربيه ممكن تسافر الساحل ...قاللي تسافر اسوان
قمت اديته مصنعيته بزياده لانه ماشتغلنيش وعمل من الموضوع قصه

والحمدلله سافرت وجيت بالعربيه بثبات زي الفل والصوت راح خالص

عرفت فعلا ان الواحد لازم يشغل مخه مع الصنايعي ويربط مابين الاحداث .

يارب اكون افدتكم