كيا تعدل نظام التعليق لسورنتو بناء على شكاوى العملاء

**sayedkamal** · 19-09-2010 01:20 PM

السلام عليكم ورحمة الله وبركاته

يبدو أن ما انفقته كيا من الوقت والجهد والأبحاث على تطوير الجيل الجديد من سورنتو لم يكن على القدر الكافى لتحقيق رغبات العملاء خاصة فى السوق الامريكية والذى يعد من أهم الاسواق لتلك السيارة وللشركة بشكل عام .
فقد تلقت الشركة بعد إطلاقها السيارة فى الاسواق العالمية العديد من الشكاوى حول قساوة نظام التعليق فى السيارة بشكل عام وعدم تجاوبها مع الطرقات العادية بشكل مريح للركاب خاصة بإعتمادها على الجانب العائلى بشكل كبير فى حملتها التسويقية مما دفع كيا الى إعلان خطط جديدة لتوفير المزيد من الكماليات فى السيارة مع اعتماد تعديل جديد على نظام التعليق بتغيير أذرع امتصاص الصدمات ( المساعدين ) بأخرى مزدوجة تم تطويرها حديثا لتوفر اداء جيد على الطرق الوعرة وفى القيادة الرياضية وتعمل بكل سلاسة فى القيادة على الطرقات العادية والسفر لمسافات طويلة مما يجعل سورنتو سيارة مثالية لقطاع اكبر من الباحثين عن سيارة دفع رباعى عائلية .
يذكر ان الشركة بدأت فى استخدام تلك القطع الجديدة على خطوط انتاج سيارتها منذ بداية شهر سبتمبر من العام الحالى لتتوفر الطرازات المعدلة فى الاسواق بداية من الاشهر القليلة القادمة

الخبر ده انا قرأته على احد المواقع وليه سؤالين لخبراء المنتدى

الاول: هل شركة كيا ممكن تقوم بتعديل المساعدين اللى فى السيراتو برده ولا ده ممكن ده يكون مقتصر على السورينتو بس؟

ثانيا: وده الاهم هل لو غيرت كيا المساعدين فى السيراتو كمان يمكن لاصحاب السيراتو الحاليين " واللى انا منهم " تغيير المساعدين القدام بالمساعدين الجداد و الا ده مش ممكن؟

انا على فكره معايا كيا سيراتو 2011 بس مش خبير اوى فى السيارات فسامحونى فى استفسارى ده

والف شكر لرجال المنتدى

**ابو ليلى** · 19-09-2010 03:28 PM

من وجه نظرى الشركة يهمها فى المقام الاول هى الاسواق الامريكية لان غرضها منافسة الاسواق الاوربية وبالتالى تجد الاولوية لسماع وجه نظر المستهلك الامريكى وتعديل اى شى من اجل رضائه عن السيارة ...
ومن الاساس هذا الموديل موجه للاسواق الامريكية .

اما السيراتو صعب جدا ان يتم تعديل فى اى شى اساسى لانه اثبت نجاحه .
وايضا الاتجاه العام حاليا فى السيارات السيدان هو نفس هذا التعليق على حسب معلوماتى .
وبالتالى مستحيل يكلف نفسه ويغير المساعدين لانه لم يثبت عيب صناعه فى السيارة
ولاازم تعرف ان فى فارق شاسع بين اوربا عموما وامريكا بالخاص والشرق الاوسط عموما ومصر بالخاص .فى كل شى .....ولنا الله

**sayedkamal** · 20-09-2010 08:48 AM

المشاركة الأصلية كتبت بواسطة abouleila

من وجه نظرى الشركة يهمها فى المقام الاول هى الاسواق الامريكية لان غرضها منافسة الاسواق الاوربية وبالتالى تجد الاولوية لسماع وجه نظر المستهلك الامريكى وتعديل اى شى من اجل رضائه عن السيارة ...
ومن الاساس هذا الموديل موجه للاسواق الامريكية .

اما السيراتو صعب جدا ان يتم تعديل فى اى شى اساسى لانه اثبت نجاحه .
وايضا الاتجاه العام حاليا فى السيارات السيدان هو نفس هذا التعليق على حسب معلوماتى .
وبالتالى مستحيل يكلف نفسه ويغير المساعدين لانه لم يثبت عيب صناعه فى السيارة
ولاازم تعرف ان فى فارق شاسع بين اوربا عموما وامريكا بالخاص والشرق الاوسط عموما ومصر بالخاص .فى كل شى .....ولنا الله

كلام حضرتك مظبوط 100 فى 100...... ربنا معانا

**sayedkamal** · 20-09-2010 08:52 AM

المشاركة الأصلية كتبت بواسطة normal

دا لو أفترضنا ان المساعدين أول المتهمين فى نشوفيه عفشتها!

والله انا حسب معلوماتى الضعيفه ان المساعدين (نظام التعليق) بيبقى هوه السبب فى نشوفية العفشة ولا فيه حاجة تانيه؟ ياريت لو حضرتك تفدنى اكتر فى الموضوع ده!!!

وألف شكر

**NoRmAl** · 20-09-2010 06:09 PM

المشاركة الأصلية كتبت بواسطة sayedkamal

والله انا حسب معلوماتى الضعيفه ان المساعدين (نظام التعليق) بيبقى هوه السبب فى نشوفية العفشة ولا فيه حاجة تانيه؟ ياريت لو حضرتك تفدنى اكتر فى الموضوع ده!!!

وألف شكر

نشوفيه العفشه فى السيراتو من تركيبه فى حد ذاتها تنشف أى عفشه
جنط 17 و مساعدين غاز و نظام تعليق خلفى متصل
فبردو منقدرش نقول لو غيرنا المساعدين العفشه هتنعم لأننا منقدرش نتجاهل العاملين التنين
أنا شايف بصراحه أنهم التلاته يتقاسموا نشوفيه العفشه بالتساوى بجد
ياما عربيات عافشتها ناعمه وبتنشف جدا مع تغير الجنط لقطر أكبر بدايه من 17 مثلا
وعربيات تانيه بنظام تعليق متصل وجنوط 13 و مساعدين زيت وبردو ناشفه علشان التعليق
فالسيراتو مش هتنعم بتغيير حاجه من التلاته من وجهه نظرى
وأنا شايف إن ذات التركيبه مدينها ثبات ممتاز على سرعات كبيره
وأعتقد ثبتها يشفع لها كثيرا مقابل نشوفيه عفشتها

**ALSHARIEF** · 20-09-2010 06:57 PM

والله يا جماعة ممكن زى مانورمال بيقول إن النشوفية ناتج من تداخل 3 عوامل و بالتالى لما هيحبوا يعالجوا العفشة أكيد مش هيغيروا المساعد بس أو الجنط أو حتى نظام التعليق الخلفى المتصل بس أكيد هيتغيروهم كلهم - بس هنا نعومية العفشة هتبقى على حساب ثبات العربية و هنا هل هنرضى بقلة الثبات و لا هنقول دا عيب فى العربية و إحنا ملناش دعوة عفشة ناشفة ناشفة بس الثبات لا غنى عنه .

أو ممكن يطلعوا أجدع مننا و يظبطوا العفشة و كذلك تبقى العربية ثابتة زى ماهيه