الموضوع: اشتري JETTA ، OCtavica ،Civic؟

المشاركة الأصلية كتبت بواسطة hosam2010

أولا أنا حابب اعلق على بعض النقط اللي اعتقد انها ممكن تفيدنا كلنا في مسألة مقارنة سيارتين من أي نوع .
أول حاجة أنا ملاحظها إن في تحيز كبير من كتير من اللي في المنتدى لنوع سيارتهم أو بلد المنشأ إلى اخره ، ثاني حاجة في كثير من الأحكام المطلقة مثلا إن كل السيارات الأروبية أفضل مين اليابانية وده طبعا مش صح على كدة مثلا ممكن نقول إن رينو رانبو موديل 98 أفضل من كرولا 97 بس عشان هيا أروبية ، محدش يفهم كلامي غلط على فكرة أنا من عشاق السيارات الأروبية وعربيتي أصلا أروبية لكن أنا ضد التعميم و المفاهيم المطلقة .
برضو من الناحية الأخرى نلاقي ملاك السيارات اليابانية بيتكلمو عن ندرة الأعطال كأنها شئ ثابت في كل السيارات اليابانية وده برضو كلام مش سليم أه اكيد في بعد الموديلات اليابانية بتتصدار احصائيات زي jdpower مثلا بس برضو في موديلات ياباني بتتزيلها يعني مثلا الكرولا الجنوب أفريقي لو اتعمل عنها إحصائية اكيد مش هتخد مركز كويس نظرا لعدد الشكاوي الكبير منها سواء اتفقنا عليها أو لا

تاني حاجة أحب اتكلم فيها هيا التوب سبيد والتسارع عامتا : أه كلنا بنحب السرعة ولها متعتها لكن عمر ما السرعة تبقى هيا المقياس الوحيد ولا الاهم خصوصا في مصر ليه؟ لان الشوراع عندنا مابتسمحش أصلا بكدة ده غير سوء حالة الطرق والزحمة الرهيبة يعني لو حسبناها بجد هتلاقي إنك ماستعملتش إمكانيات موتور عربيتك إلا بنسبة 10 % من إجمالي استخدامك ليها، لو مش مصدقين ياريت كل واحد يشوف متوسط سرعته من ساعة مجاب سيارته أنا مثلا عندي 55kmh مع اني سافرت كتير وعديت 180 كتير !!!!

طيب نختار على أساس ايه ؟ أول حاجة لازم كل واحد يرتب أولوياته ويشوف ايه اللي أكتر حاجة بتحاققهالو، يعني مثلا بالنسبة لي أنا كنت محتار بين فورد فوكاس-سكودا فانتزيا - هوندا سيفيك
طيب ايه كانت أولوياتي :
-الأمان : لقيت إن الفوكس وخدا أعلى تقييم في الامان بتقييم euro ncap
-الراحة ومتعة القيادة :الفوكس و السكودا كان مستواهم قريب من بعض السيفيك ماعجبتنيش قعدتها تماما لأني مش بحب أبقى قاعد تحت اوي كدة غير أبعادها حست انها صعبة .على فكرة أنا مش بعيب فيها يعني ممكن واحد تاني يقولك شعر فيها من الاخر هيا مسألة أذواق فانت جرب كل واحدا وشوف مين اللي مريحاك أكتر لأن في الاخر أنت اللي هاتسوق مش هتجيب سواق
- توافقها مع الطرق المصرية :أنت هاتسوق في أسوء طرق في العالم بلا فخر فمينفعش أجيب عربية عفشتها ناشفة تتعبلي ظهري وماتريحش اللي بيركبو معايا عشان كدة أنا استبعدت السيفيك تماما ورسيت على الفوكاس لأنها أكتر واحدة حاققتلي أولوياتي

من الاخر التلات عربيات اللي أنت متردد فيهم كويسين بدليل اقتناع ملاكها التام بها أنا لو مكانك هاختار السكودا ده على حسب أولوياتي أنا لكن شوف أنت ايه أولوياتك ورتبهم وشوف مين أكتر وحدة فيهم حتحققها
والسلام عليكم

أحلى كلام
فعلا الأولويات واحتياجاتك هي المقياس
للعلم أنا من عشاق السيفيك وياما عشت في أحلام السفيك ومنظر العدادات والشكل الإنسيابي لكني اقتنعت وبعد بحث على مدار ما يقارب العام في المنتدى والنت أن الأنسب لحياتي ولظروفي هي الفانتازيا
ولو هجيب هجيبب الفانتازيا علشان عارف أن السيفيك مش هتحققلي احتياجاتي
وربنا يوفقك لما في الخير

بالظبط هو ده اللي بتكلم فيه ترتيب الأوليات اللي بتفرق من شخص لشخص