تاكيهات الشاهين

**فادى** · 19-03-2008 03:01 PM

على ما أعتقد انو سيارتك حديثة نوعا ما و معتقدش انو التاكيهات لحقت. عموما التاكيهات ليها صوت مميز و بتحس انو المحرك أقل فى الأداء و غير متوازن عموما.
بس أنا حاسس انك "موسوس" شوية تجاه سيارتك و ده مطلوب بس حاول تطمئن شوية و العربية مش كمبيوتر ماشية بالمللى ثانية, ديه أجزاء ميكانيكية متفاعلة مع البيئة المحيطة, و ممكن تلاقى العربية فايقة فى يوم, و فى يوم تانى تلاقيها مكتومة, ده طبيعى جدا, و لو فيه حاجة بايظة هتحس انو العربية مش طبيعية تماما, عموما لا بأس انك تروح تكشف على السيارة و فى الكتالوج المفروض انو التاكيهات تكشف عليها كل 10 ألاف كيلو, بس انا عارف انو توكيل النصر بيقفلو الساعة 3 و مش بيشتغلو يوم الجمعة و ده السبب الرئيسى الى خلانى أبطل أروحلهم لأنى بكون فى الشغل كل يوم و اليوم الوحيد الى أقدر أروح فيه هو يوم السبت, و طبعا بفضل النوم:)

**Xpert** · 19-03-2008 03:05 PM

بالعكس .. الشاهين الجديد كله بيجيب تاكيهات .. و الصباب بيتمدد مع الحراره كمان و يقرف الدنيا ...

**sab3aawy** · 19-03-2008 03:13 PM

المشاركة الأصلية كتبت بواسطة Xpert

بالعكس .. الشاهين الجديد كله بيجيب تاكيهات .. و الصباب بيتمدد مع الحراره كمان و يقرف الدنيا ...

PERFECT

الشاهين لازم تتظبط تاكيهاتها مرة واحدة على الأقل بعد ما تكمل 20 ألف كيلومتر، وممكن ما نحتاجش لظبطة اخرى ، لكن الظبطة الأولانية دى مهمة جدا بعد ما التاكيه يكون خد وضعه

وفعلا صبابات الشاهين بتتأثر اوى بالحرارة ولذلك صوت الموتور بيكون عالى جدا والعربية باردة فى الشتاء لحد ما الصباب يتمدد ويظبط نفسه على القاعدة بتاعته ، وكذلك بتكون العربية صعبة فى الحركة لحد ما تسخن

لكن العربيات الشاهين اللى بتعمل عمرات وبيتحط فيها صباب فيرا ايطالى بتتحل فيها المشكلة دى جدا

بس برضه يا بييشو العربيات الشاهين روعة ، صدقنى مش هتعرف طعمها إلا لو عاشرتها، العربية دى ليها جو تانى خالص غير كل عربيتا فئتها، مش عارف اوصفه فنيا، لكن هى لون تانى خالص

**Xpert** · 19-03-2008 03:23 PM

يا مومبيه عندنا 2 بجد مش واحده .. واحده شاهين 2007 تاكسي .. من الزيرو معانا ... 1400 و قلبناها غاز طبيعي .. و التانيه بقي البرنس .. دوجان 1600 موديل 1995 اس ال اكس تركي فول اوبشن معانا من الزيرو برضه ..(انا عن نفسي مش شايف اي اوبشن ... يمكن علشان انا واخد علي البي ام ) .. المهم مانطولش .. الدوجان عمي بيزن و عاوز يبيع .. هيا بني ميتاليك (البني المحروق ده ) .. .. .. لو عاوزها العربيه اضمنها بنفسي (مش هاقولك فابريكه و وجع دماغ .. هيا بتتبااس بس من هنا شويه و من هنا شويه .. بس العربيه مابيبخلش عليها بحاجه ) ;)

**Qamar** · 19-03-2008 03:44 PM

لو ممكن نتقل على الاستاذ سبعاوي و بقية الزملاءو يقولو لنا مزايا الشاهين و ليه هي ليها طعم تاني مختلف؟
بصراحة أنا شوية أحس ان الشاهين دي نعمة و ساعات أبقى عاوز اغيرها بأي حاجة دللوعة شوية. لكن كل معارفي(القليلين) بيقولولي "بلاااااش . ها تندم يا جميييل"
أنتو أيه رأيكم؟
علمابان استخدامي أغلبه سفر(170 كيلو. يوم شغل و يوم لأ)

**Xpert** · 19-03-2008 03:50 PM

باختصار : عربيه عضمها ناشف .. قطع غيارها متوفره و رخيصه .. فانوس اشاره ب 8 جنيه و وش فانوس كبير ب 10 جنيه و ماشي حالك حالك يمشي .... صيانتها رخيصه .. الكفتجي يفهم فيها ... متوسطه الحجم (ضيقه شويه ورا انما ماشي الحال) .. اقتصاديه في البنزين .. ماسكه سعر في البيع و الشراء الحالات النضيفه ...تدعك فيها ماتقولش لاء ..
العيوب : الثبات علي الطريق .. العجل اللي ورا مسخوط جوه العربيه ...عربيه شكلها وحش هههه .. ساعات باحس انها للغيط و المقاولين و اللي محتاجين عربيه حمال قاسيه ..

**فادى** · 19-03-2008 05:09 PM

"الشاهين لازم تتظبط تاكيهاتها مرة واحدة على الأقل بعد ما تكمل 20 ألف كيلومتر، وممكن ما نحتاجش لظبطة اخرى ، لكن الظبطة الأولانية دى مهمة جدا بعد ما التاكيه يكون خد وضعه

وفعلا صبابات الشاهين بتتأثر اوى بالحرارة ولذلك صوت الموتور بيكون عالى جدا والعربية باردة فى الشتاء لحد ما الصباب يتمدد ويظبط نفسه على القاعدة بتاعته ، وكذلك بتكون العربية صعبة فى الحركة لحد ما تسخن

لكن العربيات الشاهين اللى بتعمل عمرات وبيتحط فيها صباب فيرا ايطالى بتتحل فيها المشكلة دى جدا

بس برضه يا بييشو العربيات الشاهين روعة ، صدقنى مش هتعرف طعمها إلا لو عاشرتها، العربية دى ليها جو تانى خالص غير كل عربيتا فئتها، مش عارف اوصفه فنيا، لكن هى لون تانى خالص"

انا كشفت على التاكيهات مرة واحدة عند 10 ألاف تقريبا مع الصيانة و لحد الأن مفيش أى مؤشر يقول انها محتاجة ضبط و انا معدى ال40 ألف.
موضوع صعوبة الحركة و ال"كحة" لما تطلع الصبح عامل مشترك عموما بين سيارات فيات كلها.
و المفروض انك تكشف على التاكيهات كل 10 ألاف فى أى سيارة سواء كانت شاهين أو حتى بى أم زى بتاعة أستاذ اكسبرت و ده الى مكتوب فى الكتالوج فمن الأفضل انك تكشف عليها برضه زيادة فى الاطمئنان.

**Xpert** · 19-03-2008 05:13 PM

.....:D .....

**eldeplomasy** · 20-03-2008 12:18 AM

ضبطها الحمد لله والصوت راح وبقى الموتور ناعم

بس بصراحه مش حاسس بفرق في السحب ولا استهلاك البنزين ولا السخونه كله زي ما هو ماعدا الصوت طبعا

فهل ممكن اعرف هي كده اضبطت ولا لازم يبقى في فرق في كل دول علشان تكون اضبطت وشكرا جزيلا

**eldeplomasy** · 20-03-2008 12:27 AM

انا دلوقتي عامل بيها حوالي 27000 واول مرة اضبط تاكيهات بس انا اغلب سفرياتي بتبقى 140 ل 160 السرعه يعنى على طول بشد بيها وعلى طول بجري بيها ويمكن ده اللى خلى التاكيهات تعلى لكن اعرف ناس لحد 45000 معملش التاكيهات ومش محتاجه هي اكتشفت وهما اكدولي في الشركة انها على حسب الاستخدام وشكرا