الموضوع: فلاش باك

بعت عربيتى ، وعايز اشترى عربية جديدة ، وحيران ، شوفت الجين تو ، ومحتار....دورت على النت ، ولاقيت نايل موتورز ، دخلت ، سجلت ، تابعت ، انبهرت......

مانبهرتش بالعربية على قد مانبهرت بالجو العام فى قسم بروتون ، من كتر اللى الواحد بيشوفه يوميا فى الشارع والشغل , مكنتش مصدق او مستوعب ان لسة فى ناس بتساعد بعض لوجه الله...انا عارف فى ناس بتحب الخير، وموجودين لسة فى كل مكان ، بس مش بالكترة دى

أسأل سؤال ، كذا واحد يرد ، وبموضوعية ، وحيادية ، وبيقولولى العيوب قبل المميزات ، بيختلفوا ، لكن عمر ماحد بيغلط فى حد


مفيش حاجة اسمها شخصنة ، يعنى ايه شخصنة


يعنى كلهم بيتكلموا عن العربية ، العربية وبس ، العربية فيها عيوب ، أكيد ، دى شئ من صنع البشر ، لكن كلهم كانوا بيتكلموا عن العربية ....ويس


التوكيل حلو.....كويس , التوكيل وحش.....برده كويس....هو مش بتاعهم


العربية كويسة......حلو ، العربية وحشة.....برده حلو


الحياة بسيطة وسهلة.......والاحلى من كده.....ممتعة ، لان فيه روح عائلية جميلة فى المنتدى ، فى ثقة بين الاعضاء ، في خير ، فى أداب حوار ، فى تفاهم ، فى ناس بتسمع ناس


ده كان الحال من سنة .....سنة ونص

الحال بقى دلوقت ايه؟

أكيد زى مانا استفدت من اخوانى اللى سبقونى واشتروا العربية.....أنا كمان جه عليا الدور....لأنى شايف انهم مضحكوش عليا فى أى شئ....والعربية ...والحمد لله ...زى ماقلولى بالضبط....العيوب اللى قالولى عليها.....والمميزات....وكل شئ كما هو متوقع


جوايا احساس انى لازم افيد الناس الجداد....عرافانا بالجميل اللى أخوانى الاكثر منى خبرة فى العربية عملوه فيا.....طيب ابتدى اعمل زييهم بقى


أقول للناس على العربية....اشكر فى مميزاتها...وأقول عيوبها بمنتهى الصراحة


طيب....انا مطلعش معايا مشاكل.....أعمل ايه......أخترع شوية مشاكل علشان أقولها......!!!....لأ طبعا....هاقول اللى حصل معايا.......طب ايه النتيجة؟؟؟


اتهامات بالتضليل...والخداع....والعمل بالتوكيل


والله ياجماعة انا مش مضطر اقولكم انى بشتغل، ومش فى التوكيل.....والحمد لله....مستورة ....ومش باخد حاجة من حد....ولا ليا مصحلة فى انى اضحك على حد والبسه فى عربية


بس أنا واحد اشتريت عربية والحمد لله ربنا باركلى فيها....وبروح التوكيل.....بيعاملونى كويس ومن غير مايعرفوا انا مين ولا بشكر ولا بشتم فى العربية...,بيعملوا اللى بطلبه منهم


طيب....أقول على كده ولا أسكت علشان غيرى قابلته مشكلة فى العربية والتوكيل.....


بصراحة ....أنا كنت مقرر انى ماشركش فى المنتدى ....وأتابع بس....بس للاسف حتى المتابعة بقت تحرق الدم


ليه بقى كل ده.....ليه لما يكون حد عنده مشكلة فى العربية لازم تبقى فى كل العربيات او فى اكتر من عربية


ليه لما حد يقول لا مفيش المشكلة دى يبقى بيحابى للعربية و وبيقبض من التوكيل


ليه أعمم ......التعميم بأن كل العربيات فيها مشكلة معينة لازمله معلومات دقيقة ومؤكده....مش موجوده مع أى حد هنا


ليه الشخصنة.....والاتهامات لكل اللى نصحوا بشراء العربية والدعاء عليهم......همة ذنبهم ان عربيتك طلع فيها مشكلة....والله اعلم بسببها ايه......


واللى يطلع عنده مشكلة فى العربية.....يتنرفز على الناس ويحسبن عليهم ويتهمهم علشان متعصب.....دى مشكلة فى عربية....والحياة فيها مشاكل مؤلمة أكتر من مشاكل فى العربية الف مليون مرة.....,ادعوا ربى ان كل مشاكل حياتى تبقى فى العربية.....ساعتها يبقى ده فضل من ربنا مابعده فضل


دى عربية.....لازم تتحط فى وضعها الطبيعى


ومشاكلها لازم تتحط فى وضعها الطبيعى


ولازم الكل يعرف ان احنا بنخش هنا لاسباب تانية اهم واكبر واسمى من العربية.....لان دى مش اول ولا اخر عربية انا اشترتها.....ولا انت كمان


الناس بتخش هنا لاسباب كتيرة , اولها التواصل الاجتماعى المحترم ، فعل الخير , رد الجميل لناس افادوا ، حبا فى اصحاب العربية ...الناس اللى الواحد اكل معاهم عيش وملح ، وفى الاخر خالص ....بتيجى العربية.....حتة الحديدة اللى احنا راكبنها وبتوصلنا وبتجيبنا


الموضوع بسيط جدا


العربية عجباك خليها معاك واحمد ربنا عليها...واشكر الناس اللى دلوك عليها....وفيد اخوانك زى مافادوك


العربية مش عاجباك


ارضى بنصيبك....وبعها...وقول رأيك فيها بأمانه...وتأكد ان مفيش حد كان ليه مصلحة انه يخدعك.....وربنا هايوفقك لغيرها


أرجوكم....مفيش داعى للأتهامات.......لأن بالطريقة دى الكل هايحس انه فى مكان مفيهوش التزام بادنى اداب الحوار ....وبالتالى القسم هايفضى ......


وسيبوا الناس تعمل خير فبعضيها ......وقول رأيك زى مانت عايز فى العربية.....وسيب الناس فى حالها ...عندك كلمة كويسة فحق زميل قولها.....معندكش.....اسكت


ارجوكم التزموا بأداب الحوار.....مفيش داعى لسب شخص ما...حتى لو مش موجود معانا .....لأن أنا محبش أكون موجود فى مكان بيحصل فيه كده.....ولو حد قال للشخص اللى بيشتم (عيب هل انت ترضى ان حد يشتم والدك أو اخوك او اختك) بيترد عليه حتى من قبل مايكتب الجمله


هل ممكن يوصل بينا الحال لكده...ان الناس تغلط وتشتم بدون ما حد يرد علشان لو رد هايبقى بيحابى وبيضلل....ايه المستوى اللى احنا بقينا فيه ده؟

باشمهندس احمد فتحى......انت صح فى كل اللى قولته

أيمن......انت حاولت كتير تظبط المنتدى ده.....بس الظاهر ان مفيش فايده

كل اخوانى وزمايلى....محدش يزعل من كلامى....بس الظاهر ان الواقع المؤلم اللى احنا بنعيشه فبلدنا....وصل عندنا فى القسم خلاص......


اسف للاطالة......وتحياتى ليكو كلكم

تحياتي لك اخي وبشدة على صراحتك المتناهية ولكن كنت اريد منك فضلا انك تبقى تشاركنا بالجديد عندك لعلو وعسى تكون عندك فكرة نستفيد بيها شئ جديد اكتشفته في السيارة اشياء من هذا القبيل وتحياتي لك اخي على موضوع المتناهي في التميز ودعني ارفع لك القبعة ..