الموضوع: و اعلنت الحرب على استيكرات المعارض

المشاركة الأصلية كتبت بواسطة ahmedateya

من فترة رحت استلم انا و واحد صاحبي عربية لانسر من معرض شهير في مدينة نصر..
و رحنا دفعنا باقي المبلغ (العربية كاش) و استلمنا الورق و كل شيء و العربية واقفة خارج المعرض
قمت واخد المفتاح و رايح اشييك على العربية لأنني موسوس من كل شيء من اللي الواحد بيسمعه كل يوم
و الاقيلك واد من العيال بتوع المعرض بيجري على العربية و بيلزق عليها استيكر المعرض قمت قافش فيه و حصل الآتي:
-انت بتعمل ايه يابني؟

-بلزقلك الاستيكر ياباشا...(و بيبصيلي كأنه بيقول انه مش بيعمل حاجة غلط)

-انا طلبت منك استيكر ولا زفت؟ و بعدين مش تستأذن؟ هية عربيتكم دلوقتي ولا عربيتنا؟

-مش العربية قسط برضه؟ (و مش فاهم ايه اللي بيدي الحق للمعرض لو العربية قسط انه يعمل كده!)

- و حتى لو قسط انا مش بدفع فايدة ؟ ولا هوة اي كلام و خلاص؟ ولا انتوا عايزين تعملوا دعاية على قفايا؟ ....و لقيت مدير المعرض و صاحبي خرجوا لما شافوني ماسك في الواد و صاحبي بيهديني

-صاحب المعرض قال: خلاص يا بيه متزعلش نفسك....مع اننا معملناش حاجة وحشة معاكم...شيل يا ابني دي مش قسط!!

-انا:وحشة ولا حلوة...تعمل لنفسك دعاية على علابية مش بتاعتك ليه؟

يا باشا مش دعاية ولا حاجة...هوة حضرتك مش عايز تنفعنا ولا ايه؟

انا: يبقى تعملنا خصم او تنزل 3تلاف جنيه مقابل الدعاية و ان احنا هنصيتك بالاستيكر بتاعك اللي على العربية...

-خلاص حقك عليا...متركبش حاجة يا ابني خلاص....البهوات خلاص مش طايقينا...

و قبل ان اكمل الانفجار...سحبني صاحبي من دراعي و رماني في العربية و طلعنا نلعب بيها شوية و كان مستغرب اني عملت كده و ان مكانش فيه داعي ابدا لكل الهيصة دي ...و انا شايف ان انا على حق

و من ساعتها و انا معلن الحرب دي في اي عربية اشوف حد يخصني بيستلمها زيرو

و رحت من اسبوع استلمت مع جوز اختي سيفيك من الفطيم و خليتهم يشيلو "الفطيم" المكتوبة على الشنطة ورا....بالرغم من علامات التعجب العديدة الا انهم كانوا اكثر احتراما و شالوها من غير ليه...


و اول ما استلمت عربيتي شلت اسم المعرض و علامة موبيل 1 اللي على الازاز...لدرجة اني كنت هشيل علامة دايو و كلمة لانوس من عليها:d:d:d:d

انا شايف ان مش من حق اي معرض يعمل لنفسه دعاية على عربيتي تحت اي سبب الا لو كان هيدفعلي مقابل مادي او هيعملي خصم خاص

انتوا رأيكوا ايه؟

+10

انا اتفق معاك

ياجماعة دول وكلاء جشعين و مموزعين اجشع
لو جيت تفاصله في 10 جنيه حيقولك لآ !

طب و الدعايا الي انت عاملها لنفسك علي سيارتي دي ايه ؟؟

انا شلت ستيكر AutoMicho اول ماستلمت السيارة - و كل مرة اروح التوكيل يرزعولي استيكر OMATRA بأرقام تليفونات ! بشيله برده ! دي سيارتي وانا حر فيها - ومفيش حد يحطلي اي ستيكر انا مش عايزه عليها ( انا سايب ستيكرات المصنع عليالزجاج الامامي ) .

الا اذا انا فعلا انبسطت من المعرض او التوكيل ده في حاجة و عايز انا اعلمه دعايا .. لكن مش بالعافية .