الموضوع: كركرة في موتور السويفت

بالنسبة لموضوع الكركرة ده لو تعنى بيه التسقيف..فده ناتج عن نوع البنزين المستخدم..يعنى لو انت بتحط بنزين 80 او 90 ممكن تلاقى العربية بتسقف مع كل غيار بالذات لو رجلك تقيلة على الاكسيراتير غير ل 92 و ان شاء الله حتلاقى فرق لانى مجرب الموضوع ده فى عربيتى و خلى بالك ممكن اوى اوى من بنزينة للتانية تلاقى ال 90 انضف و شغال زى الفل فنصيحة خلى بنزينك من شركة نضيفة ..لان معظم الشركات التعبانة زى التعاون مثلا ممكن اوى يكونوا بيخلطوا ال90 ده بمواد تكتر كميته ...و الله اعلم
اما موضوع العفشة فإكشف على علبة الدركسيون ممكن تكون محتاجة حشو لانها مهمة جدا فى المطبات بالذات الطرق الخشنة و مزلقنات القطارات و شرايط المترو

الكركره دي من ظبطه الكهربا
انا معايا سويفت بستعمل فيها بنزين 80 و في منتهي النعومه و لا بتسقف و لا بتكركر و لا الكلام دا خالص علشان ضابط الكهربا بتاعتها.
بالنسبه للصوت اللي بتقول عليها ممكن يكون بيض مقصات و ساعتها يا تكبس البيض يا تغير المقصات و من رايي غير المقصات.
لو الصوت عباره عن دردره يبقي اسكترا و هيا عموما عفشه السويفت بطلع اصوات كده.
سؤال لسيادتك كنت جايب الموتور بكام:)

اشكركم يا جماعة جدا, انا فعلا حطيت بنزين 92 و صوت الكركرة قل جدا, بس لسة موجود:)ز
حازم بك , انا كنت جايب الموتور ب 2200 من الوكالة.

هو ايه المقصود بضبط الكهربا؟؟؟ و حد يعرف ميكانيكي و عفشجى كويس قريب من الهرم؟؟؟

الكهربا فى موتور العربية ليها دورة من اول البوبينة و الاسبيراتير و اسلاك البوجيهات و البوجيهات نفسها يعنى لازم كله يبقى سليم فى المجموعة دى و مظبوط بمعنى ميكونش فى تأخير فى الدورة او تقديم يعنى بمعنى ادق شرارة حرق البنزين تبقى طالعة فى وقتها مظبوط و ده طبعا لو البنزين من النوع المناسب للعربية..المشكلة ان كل جزء فى المجموعه ممكن يعمل مشكلة غير التانى بس برضو لازم الاول يكون بنزينك نضيف و اديك شوفت الفرق لما حطيت 92 لو روحت ظبط الكهربا حتلاقى عربية تانية و سحب تانى و نعومة تانية...للاسف انا اعرف واحد مهندس كهرباء بس بعييييد عن الهرم فى جسر السويس

فيه حد عنده سويفت يقولي رايه في العربية ديه؟ انا بجد زهقت منها و الحمد لله

بص يا سامي باشا
انا ظابط العربيه علي بنزين 80 و مافيش منها اي مشاكل كل ما في الامر اني ضبط الكهربا و ظبط الكهربا زي ما الاخ عمر قال بالضبط بتبقي من الاسبراتير و بيقدم او بياخر الشراره و بس.
نصيحه كمان شوف اسلك البوجيهات لو تعبانه غيرها فورا بطقم انجليزي ب 35 جنيه و بيبقي خرافه حيظبط الرجرجه في المكنه و شوشره الراديو و كل دا.
بالنسبه لمميزات السويفت
1.اقتصاديه جدا في البنزين (115 كيلو بيعملو 6 لتر و نص بالضبط علي الطريق)
2.حجمها جميل و واسعه من الجو مقارنه بحجمها الخارجي
3.اعطالها بسيطه و قليله و قليل لو عملت دقه نقص.
4.شكلها جميل و لوحه القياده رائعه .
5.اتزان جيد جدا علي الطرق
6.قليل لما بتحك في مطبات
7.قعدتها مريحه جدا و شبيهه بالعربيات الرياضيه و رغم ان معايا ياريس 2008 لكن بستريح في قعده السويفت اكتر من الياريس بكتير !!!!!
8.جري و شد و سحب خرافي بالنسبه لعمرها و حجم موتورها يعني بامانه الاول و التاني عندي بعدي بيهم اي عربيه
9.من 0 ال 100 كم في 12 ثانيه و لحد انهارده بتجيبهم في الوقت دا .
10.تكييف جميل جدا و قوي فعلا و تاثيره علي الموتور مش قوي
العيوب بقي
1.عفشتها بتتفك بسرعه مقارنه بعربيات كنت راكبها قبل كده زي ال 505 و اال 132
و عفشتها ضعيفه لكن اقوي من الاكسيل و اللانوس
2.في قطع غيار مش موجوده غير استعمال
3.اهم عيوبها البارومه و لو مسكت فيها البارومه و ما اتلحقتش بنضفه قول عليها يا رحمن يا رحيم و بالاخص السقف و خد بلك بعد ما تغسلها دايما ابقي نشف السقف من لجونب من ناحيه الجلد اللي راكب لان الميه بتتجمع و تعمل بارومه في المكان دا و زوايا الشنطه.
و شوف لو احتجت اي مسعده بس قولي و ربنا يسهل اقدر افيدك
.الا صحيح الموتور جايبه بالفتيس و لا من غير :)

حازم باشا. الموتور بالفتيس كمان ايه رايك بأة؟