لغز فقر ورفاهيه المصريين فى مصر

**vBulletin** · 27-09-2010 01:22 AM

عندك حق فى بعض الكلام الى قلتة كلة بس تعرف اننا نفتقر بجد لاية ؟ للنظام والانضباط الاسياسى والحضارى
لو الدولة ماشية على اسس سليمة وبقوانين مفيش حد يكسرها يبقى اكيد مصر دية هاتبقى حاجة تانية
انت عندك تقدم التعليم فى مصر معدوم فالبتالى هتلاقى ناس بدور تشتغل وتكبر دماغها
الرشوة فى مصر عينى عينك ودة بيخلى الدنيا كوسة
التقدم الطبى يدوبك ماشى ومعظم الناس المشهورة والى ناجحة بتبقى واخدة تعليمها من برة مصر
دة غير انا فية ناس كتير مش مهتمة لحد وميهمهاش الى نفسها
ـــــــــــــــــــــــــ ـــــــــــــــ
انت اة زى ما قلت ان فية ناس راكبة عربيات بالملايين لكن فية ومازل ناس اكتر مش راكبة اى حاجة وفى ناس مش لاقية العلاج خالص ولا حتى انها تعمل عملية واحدة وتعالى شوف فى المستشفيان بعيد عنك والله اذا كان الانسان فى نعمة يحمد ربنا عليها ويقول الف حمد وشكر ليك يارب ولكن الشكر مش كلمة وخلاص لا دة فعل كمان
والناس يدوبك معظمها مديونين ودة مش كويس وبالنسبة للدروس الخصوصية فى ناس كتير مش بتاخد دروس خصوصية ومع ذلك بيتفوقو نتيجة للحافز بتاعهم
خلاصة الكلام احنا اهدافنا الى بنسعى وراها كلها غلط وان كانت اساسية لانها كلها بتبص للواقع وليس المستقبل وان كانت بتبص للمستقبل فهى نظرة مادية بحتة بالنسبالنا
لو تقراء فى الاقتصاد هتلاقى ان الاحصاء العالمى للناس فى مصر فى ناس عايشة على 7دولار وحاجات كدة تقول ربنا يسترها علينا دة العملة بتاعتنا ملهاش قيمة ونعتبر اقل صرف فى العملة على حد علمى
اما بالنسبة للناس الى بيدعو الفقر والل مش عارف اقول عليهم اية...... يعنى ربنا مديهم النعمة وهما مبيقولوش الحمد لله
ودة ممكن يكون سبب فى الى احنا فية

مش كل حاجة تبقى عربية وعيشة كويسة اهم حاجة راحة البال والعيشة النضيفة فى وسط مجتمع حضارى بيفكر صح مش كل همة ورا البنات و الكورة واللبس بس انا بوضح نقطة مش اكتر

بس فية مقولة بتقولك لو انصلح القائد انصلح الشعب كلة ولو فسد القائد فسد الشعب كلة
الموضوع مش موضوع فلوس بس الموضوع اكبر من كدة بكتير

**Ahmed Anwer** · 27-09-2010 01:24 AM

لا طبعا في فقرا و غلابه و اغلب من الغلب كمان
ودول مش حنشوفهم في الكمبوندز أو مارينا او شارم ... شرم الشيخ سابقا !!
الحسبه بمنتهى البساطه اننا 80 مليون
5% منهم البشوات اللي بنسمع و نقرا عنهم في الجرايد ويقدروا يركبوا طيارات مش عربيات
و5 % طبقه غنيه او ميسوره
دول كده 10 % .. يعني 8 مليون ... مش حنشوفهم الا في مارينا و شارم و كمبوند الصفوه

و30 % طبقه حنقول مجازا متوسطه .. لانها طبقه مطاطه زي الاستك ما بين اللي معاه حته مرسيدس موديل قديم او سي كلاس مثلا .. ولحد اللي معاهم السيراتو و ما فوقها وما تحتها ..
ومن سكان الرحاب و الشروق ومدينه نصر و لحد سكان غمره والمنيب و فيصل
يعني كاتب المقال صاحب الافيو الحقيره لا يمت لطبقه الفقراء بصله ويعتبر من الطبقه المتوسطه
بمعنى اصح دول غالبيه الناس اللي شايفينها راكبه عربياتها في الشارع و بيشتروا اللحمه اللي كانت ب 60 جنيه و بقت ب 100 علشان رمضان وبيدخلو ولادهم مدارس لغات او انترناشيونال
دول كده 40% ... يعني 32 مليون

يتبقى كام ... 60% ... ودول ما تحت الطبقه المتوسطه وانت نازل
60% من 80 مليون يعني 48 مليون ... يا بلااااش !!!
دول بقى ممكن يبتدوا من عند الدش القسط و التوك توك واللي بيركب الميكروباص و في ايده العلبه المارلبور و الحته النوكيا قسط ... او مستعمل ... او مسروق ... أو .... و انت نازل !!!

وعلى فكره الجزم النايكي و الساعات السواتش معموله للطبقه المتوسطه .. و لا مستكترينهم علينا كمان !!

رد علي نفس المقال منقول من منتدي آخر

**KHALED AYMAN** · 27-09-2010 01:27 AM

احنا مش مظبوطين ..
ناس معاها و بتدعى الفقر ..(وعندى امثله حيه كتييييييييييير)
ناس معاها بطريقه فاحشه (بالنسبه لناس تانيه ..مع انه جايبها بالحلال)
ناس فعلا مش معاها ...ومش لاقيه تاكل و ادامها عشرات السنين عشان تصل لخط الفقر مش تعديه حتى ...
فى تضارب فظيييييع
ناس بتجيب حاجات فوق احتيجاتها
ناس بتشترى عشان تبقى زى فلان
ناس بتشترى عشان يبقى احسن من فلان
ربنا يهدينا

**zakiali** · 27-09-2010 01:27 AM

مصر والمصريين تركيبة غريبة متناقضة محدش فعلا يقدر يفهمها ولا يحللها من قمه الانحراف لقمه التدين ومن قمه الفقر لقمة البذخ وسعات كل دول مع بعض .. ومتقدرش تقول مين اللي غالب لأن كلهم كتير أوي .. مصر دي مرض .. متلازمه .. Syndrome محدش يقدر يفهم مكوناته غير اللي خالقه

**medo_2060** · 27-09-2010 01:37 AM

حبيت اوضح نقطه ان الموضوع دا مش فى مصر بس فى دول كتير زى دول امريكا اللاتينيه.. ريو دى جانيرو احياء من المدينه خمس نجوم فى كل حاجه واحياء على بعد كام كيلومتر عشش واكشاك وتلوث.

**أشرف فتحى** · 27-09-2010 01:38 AM

المصريين مش كهنه ولا بيستعبطوا........

المقال شايف مصر القاهره واسكندريه ومارينا وبورتو سخنه ومدينتى والرحاب .......

مصر مش بس شارع فيصل ولا الدقى والقصر العينى.....

لف شويه واتفرج قبل ما تتكلم....

انا نزلت قرى فى المنوفيه والشرقيه معندهومش حتى الميه النظيفه والصرف الصحى...

يادوب ممكن تقول عليهم عايشين......

النهارده وصلت واحد فى طريقى بييجى من قريه من قرى الفيوم كل يوم عشان يشتغل شيال...

يعنى على حد تعبيره رزقه على دراعه ولو تعب يوم مش هيلاقى يأكل عياله..مش يديهم دروس ب 10000 جنيه...

المقال مع احترامى لصاحب الموضوع سطحى جدا....وحسيت ان اللى بيكتبه بيكتبه وهو قاعد فى الشاليه فى مارينا....

إنزل على الارض واتكلم....

اتفرج على الطماطم اللى ب 8 جنيه

وسندوتش الفول اللى 1.75 جنيه..

بيقول مهو على كده وكل البيوت فيها لحمه وكيلو اللحمه ب 70 جنيه...

أنت بتتكلم على انهو بيوت؟؟؟

الراجل اللى مرتبه 600 جنيه ..المحاسب اللى معاه مؤهل عالى.....

عايش ازاى وايجار شقته 250 جنيه والكهرباء والميه 50 جنيه لانه معندوش تكييف

يتبقى من مرتبه 300 جنيه

بيركب الاتوبيس كل يوم رايح جى ب 2 جنيه

يتبقى 250 جنيه

ده أهو اسمه مؤهل عالى وبيشتغل مش عاطل.....هيركب سيراتو إزاى؟؟؟؟؟؟؟؟؟

هو بس أخد اللى على السطح وساب اللى فى الـــقـــــاع......؟!!!!!!

**mahamedaraby** · 27-09-2010 01:40 AM

نظره على مصر اقتصاديا بحسب تقرير عالميه فترتيب مصر اقتصاديا اعلى دوله عربيه اقتصاديا غير مصدره للبترول مصر ترتبيها بعد الامارات عالطول وشوف الامارات فين واحنا فين

مشكلتنا اننا كتير اوى يعنى ممكن فى ساعه واحد تشوف اللى معاه مرسيدس s500 واللى بتشحت منه فى الاشاره و اللى داخل الجامع واللى داخل الديسكو كل ده موجود

**PoweRPassioN** · 27-09-2010 02:01 AM

والله الواحد تعب من كتر التفكير ف البلد العجيبه دي
بس كل اللي ممكن توصله بالعقل كدا ان
((توزيع ثروات البلد فيه ظلم فظييييييييييييع))
ودا السبب مش النتيجه
بمعنى أن تم تسهيل الاستثمار للكبار فكبروا زياده وزادت ثرواتهم ومعاهم ناس قريبه منهم بشكل او بأخر "شرعي او غير شرعي"
والمواطن العامل .. الموظف .. الطبيب .. المهندس .. الخ صاحب الدخل الشبه ثابت تجرع كأس المراره من النتايج المتمثله في الارتفاع الجنوني للاسعار نتيجه زياده الطلب من الناس اللي ارتفع دخلها بشكل غير عادل حتى لو كان شرعي
والموضوع تفاصيله كتيييييييييييييييييير بس دي كانت فكره عامه
وربنا يستر على الجميع