الموضوع: تغيير اويل سيل البوبينة لأوبل كورسا سيدان - بالصور-

السلام عليكم

من كام يوم لاحظت وجود ترشيح زيت بسيط عند البوبينة كده .. و مرشح على الموتور شويه .. حاجه بسيطه جدا كده .. المهم رحت للميكانيكى قال لى هات أستك بوبينة .. قلت له ده ايه الأستك ده؟ قال لى أويل سيل بس هو اسمه أستك بوبينة .. المهم رحت للنجار اشتريته ب 15 جنيه .. قلت له غالى .. قالى ده الأصلى و بتاع و فى بخمسة جنيه .. قلت يا خلينى فى المضمون و جبته و رحت للميكانيكى و غيره كالاتى.

أولا : الزيت كان بيرشح من المكان ده .. هو كان بسيط .. بس المشكلة انه كان بيلم تراب فبيخلى المنظر مش ظريف.



ثانيا : مهم جدا تستنى لحد ما العربية تبرد .. عشان لو فكيت و هى سخنه .. ممكن يقفع و تضطر تغيره .. و الكلام ده فى وش التكهات برضه.

ثالثا : هتفك البوبينة .. هتلاقى الغطا اللى فيه الاويل سيل .. أو أستك البوبينة زى ده كده.



رابعا : هتفكه وتطلع الاويل سيل القديم .. المفروض تلاقيه ناشف .. و تغسل الوش كويس و تركب الاويل سيل الجديد زى كده.



خامسا: تركب الوش و تركب البوبينه و تربط كل حاجه زى الأول.

بعد كده تغسل الموتور غسلة كويسه .. عشان لو فى حاجه تبان .

ملحوظه حصلت معايا: بعد ما ركبت الاويل سيل .. لاحظت ان فى تسريب تانى .. رحت للميكانيكى قالى ازاى و بتاع .. المهم اكتشفت ان الاويل سيل اللى أنا جبته (ب 15 جنيه) أرفع من بتاعها .. و رحت جبت واحد تانى من الزقازيق ب 5 جنيه أحسن منه .. و الحمد لله زى الفل .. طبعا دى غلطة الميكانيكى عشان كان المفوض يتأكد قبل ما يركب الاولانى .. و غلطة اللى باع لى برضه .. فاللى هيغير حاجه قبل ما يركب الجديدة يتأكد انها زى القديمة بالضبط.

مبروك ياباشا
المهم خلي بالك من اللصنايعيه مره تانيه