الموضوع: انا محبط جدا جدا ..................................

المشاركة الأصلية كتبت بواسطة Foxoo7

أهم حاجة بلاش تزنق نفسك وتحط فلوسك كلها فى عربية
حتى لو كانت مرسيدس.
فأنا رأيي توكل على الله واحجز الإيفو،

كلام سليم وانا كنت قررت كده امبارح
لحد ما نزلت الصبح وانا رايح الشغل شفت واحد سايق برافو سودا ام جنط 17 دي وماشي جنبي
لاقيت نفسي رجعت في كلامي والحيرة رجعت تاني

المشاركة الأصلية كتبت بواسطة foxoo7

طيب مفكرتش كمان فى الميجان 3؟
أعتقد سعرها حنين شوية في حدود 135
أنا شوفتها فى توكيل رينو تحفة بجد ولو إني بموت فى شكل البرافو،

الفول اوبشن ب 143000
والاوتو ب 133000
لو حضرتك تعرف الفرق ياريت تقولنا
ولو اني عارف ان اكيد فيه فرق كبير بين الفول اوبشن والعادي

المشاركة الأصلية كتبت بواسطة mahmoudawad247

بص يا باشا


ربنا معاك و يفوقك تختار عربية كويسة الموضوع صعب قوى بس سيبك من الشكل خالص و اللى انت عاوزه بس لللى يمشى معاك فى البلد و مع العيلة فركز فى الحاجت دى

بالنسبة ليك العربيات اللى ممكن تختار منها
اليابانى ( هوندا سيتى - تويتا يارس - نيسان تيدا- دايهتسون تريوس )
الأوروبى ( بونتو - سيات - بيجو 207 - رينو )
الكورى ( سيراتو - شيفروليه )

اليابانى أنا احبذه أكثر من غيره للتالى
1- صيانته احسن من الباقى
2- تكييف ياخد خمس نجوم عن البافى
3- موفر فى البنزين عن الباقى
4- عربية عمليه ( شنطة معقولة - تاخد ناس مستريحة و اسرية شوية )
5- سحبها ميه ميه

من وجه نظرى اختار هوندا سيتى الموتور 1600 ( النيسان 1600 برده ) بس الهوندا vs تيدا و انت تختار و اليارس نزله 1500 و ميه ميه

التريوس
الميزة بتاعتها انها عالية عن الأرض بس باقى عيوبها او مميزاتها معرفش بس يتهيألى مش زى الباقى ممكن أقل منهم شوية

الأوربى
بونتو ( توكيل اوماترا مش قد كده و ممكن ميرحشكش العربية الايطالى تحفة بس البونتو و البرافو عاوزه توكيل علشان الكهرباء و الكمبوتر الى فيها

سيات ( عربية كويسة و توكيل الناس بتشكر فيه )
البيجو ( عربية تحفه و التوكيل يعنى معقول مش كويس اقوى و سوقها حلو فى مصر )
الرينو ( تقفيل تركى - و التوكيل الناس بتشكر فيه )

الكورى
فى ظل وجود الأختيارات الأخرى يبقى
الهونداى بلاش
السيراتو بلاش
الشيفروليه بلاش


و انت و احتياجك فكر كويس

1- سيبك من رغبتك شوف المناسب للبلد و لأسرتك
2- التكييف ده مهم فوق ما تتصور
3- علاقتك بالتوكيل و الصيانة هتبقى مدة طويلة لغاية ما تببع العربية
5- ما دام دى هتكون عربية واحده عندك يبقى الوسع مهم لانه هينفع فى وقت نفسك فى وسع بشكل لا تتصوره
6- فى ظل الغلاء اللى احنا فيه و البنزين ممكن يغلى كمان شوية فالتوفير ده مهم
7- سعر وسرعة إعادة البيع ده هتحتاجه لما تكون عاوز تخلص منها بسرعة و ده عامل مهم برده

بص حضرتك المشكله اني مش مقتنعاني ادفع كتير في حاجه مش عجباني اوي مع ان كلام حضرتك صح ان الواحد يجيب حاجه تمشي في البلد وليها سوق
بس برضه حرام ادفع كل ده وما ارضيش نفسي. صح؟

و انا عندي تحفظ على بعض العربيات

التيدا زي ماقولت شكلها من جوه مش عاجبني وهيه في الاخر هاتش باك
طب ما اجيب الايفو وخلاص . مع اني عارف ان التيدا اوسع بس الفرق كتيير
في سبيل الوسع وبالمقابل الجمال الداخلي والخارجي للايفو (مع الوضع في الاعتبار اني شاب عندي 25 سنه وعاوز حاجه شكلها سبور شويه)

هوندا سيتي كانت عاجباني وكنت نازل اشوفها امبارح قالولي مش موجوده في السوق وهتنزل اول السنه اغلى 3 او 6 الاف جنيه

ياريس مابحبهاش دا غير انتشارها وانا بحب التميز على قدر الامكان
التريوس برضه من جوه فاضيااااااااااااااااااااا اااااااااا
وسمعت عن مشاكل فيها مش فاكر كان عن الثبات باين

الابيزا حلوه بس انا مستكتر 120000 على عربيه في الحجم ده + انها من جوه صفر كبير في الشكل
بيجو 207 حلوه بس حاسس برضه انها صغيره اوي وكتير عليها تمنها + اني خايف منها ومن قطع غيارها

رينو - ياريت حضرتك تقولي تقصد انهي رينو

سيراتو - انا كنت حاببها قبل ما ابتدي ادور وافتح عيني عن العربيات
بس اولا انا مش ميال للكوري
ثانيا انتشارها الفظييييييييييييييع يخليني ابعد عنها تماما

الكروز حاسس انها شكل وبس
يعني فار لابس لبس اسد
وكمان لما شفت الانتريور في الصور اتوهمت
روحت شوفته في الطبيعه حطيت ايدي عليه مش عاوز اقولك
خامات تعبانه وكلها بلستيك وتتقشر بسهوله
والتابلوه قماش وممكن يتوسخ بسهوله جداااااااا

وبس


شكرا ليك

المشاركة الأصلية كتبت بواسطة mohamedhfz

بعد اذنكم يا جماعه انا ليا رأي مختلف ممكن يضيع حيرتك دي و يحقق كل اللي في بالك
بما انك نفسك في البرافو و هتزنق نفسك علشانها
او الايفو و تروش نفسك بالباقي
فالحل كالأتي:
ليه متدورش علي برافو كسر زيرو يبقي منك ركبت العربيه اللي انت عايزها ووفرت فرق فلوس هينفعك علشان الزنقه و في نفس الوقت تفاديت الخساره الكبيره الأولي بتاعت الزيرو

انا هشتري تقسيط
فمش هيبقى معايا فلوس الكسر زيرو كاش

المشاركة الأصلية كتبت بواسطة foxoo7

لو حضرتك معاك تمن الايفو كاش تبقى أحسن كتير من انك تداين نفسك عشان عربية
صدقني هتتعب بعد كده من مصاريف التشغيل والصيانة،
إذا كان ولابد حاول تخليه في أضيق الحدود.

الفرق هيبقى 10400 زياده في المقدم + الايفو 2250 في الشهر البرافو 2600 في الشهر + الايفو 4 سنين البرافو 5 سنين

على فكرة انت دماغك حلوة ونظيفه.. انت عاوز تمتع نفسك وتركب عربيه مميزة ومش هاتقتنع الا بكلام نفسك فى النهايه واراهنك..
انت مش هاتركب غير اوروبى وقدامك الايفو والبرافو والابيزا والميجان (بخلاف الكورسا و فييستا ماحبيتش اقوللك عليهم بس)
وعلى فكرة انا برجح الفيات اكتر بس برضه الميجان عربيه ممتازة فعلا وفيه البيجو 308 بس بصراحه مش عارف سعرها فى الرنج ولا لا
موضوع بقى الايفو ولا البرافو دة محدش يقدر يقوولك عليه غيرك لان الطبيعى ان طبعا البرافو احسن من الايفو من حيث السعه والحجم وكل حاجه.. دى فئه ودى فئه
انت بس توكل على الله واحسبها مع نفسك وشوف انت تقدر على انهو واحدة بالظبط
وعلى فكرة انا دماغى زيك بالظبط وبحب اكون مميز ونفسى اجيب الفاروميو 156 موديل فوق 2003