الموضوع: عرسه في العربية

ربنا معاك انت كنت هبيع العربية بسبب العرسة و بعد ما دوختنى و رحت للسروجى و قفل كل الهويات اللى فى العربية و اتاكد ان مفيش بارومة او حتة تخش منها بردو دخلت تانى و بالصدفة الميكانيكى اكتشف ان الكوتشة اللى بين الفتيس و جسم العربية من تحت متاكلة و العرسة بتخش من المكان دهو تخرج من الكونسولة و كانت بتعمل حفلات فى العربية الحمد لله قفلت المكان ده و المشكلة اتحلت الحمد لله

الموضوع دا حصل معايا من كام شهر وفعلا اول لما ركبت العربيه صدمنى رائحه كريهه ومبقتش عارف ايه الريحه دى وبجد احترت الريحه دى جايه منين ..... المهم انى تحركت بالعربيه وبعد ربع ساعه تقريبا وانا ماشى لاقيت اللى خبط فى رجلى و سمعت صوتها الكريه اللى مش قادر انساه ومعرفش بجد انا ركنت ازاى و ايه اللى كان بيحصل وانا بالم العربيه ونزلت من العربيه كما لو مسكتنى الكهربا وطبعا انتو متخيلين كم الرعشه اللى مسكتنى من منظرها والحمد لله كان فى ميكروباس ورايا شافنى وانا نازل اتنطط من العربيه والسواق نزل وجاب معاه مبيد حشرى ورش العربيه وقفلناها وقاللى الريحه حاتطلعها و فعلا شوفناها خارجه من تحت الكبوت و اتضح بعد لما روحت ان فى طبه كاوتش فى صدر العربيه كانت مخلوعه من مكانها وكانت العرسه بتدخل منها و رجعت الطبه مكانها والحمد لله لم يتكرر معى الموضوع مره اخرى

بص يا سيدى .... انا معايا عربية 128 جراند لوكس ( يعنى موديل 87 ) ... اتخلصت من المشكلة دى لان كان فى عرس بتخش ازاااااااااى؟؟؟؟ تحت موتور المساحات او جنبها من تحت حتلاقى فيه فتحات جيب صاج و اقفل الفتحات دى ب لزق سيليكون ....
م /مصطفى حبيبة
اسال الله لى و لكم كل خير و ان يرزقنا و اياكم فى الجنة اشهى لحم طير
اميييييييين،،،

الله انا شوفت سواق تاكسي كان ماشي وفجأه حدف نفسه بالعربيه يمين خالص ونزل من العربيه زي المجنون وبينطط , وياعيني بعدها لقيت عرسه بتنط من جوا رجل بنطلونه (والله زي الافلام الكوميدي) والراجل كان مفزوع بجد :-))

انا كمان حصل معايا نفس الموقف كنت سايق ومره واحدة لقيت حاجة تحت رجلية لولا ستر ربنا كنت عملت كارثة مالهم نزلت جرى وبعدين اكتشفت انها بتخش من مكان كاوتشة عصاية الفتيس

أنا كان عندى 128 من فترة وركنتها شويه كنت فى مأموريه شغل المهم لما رجعت لاقيت فى ريحة كهريه جداً فى العربية عملت البدع علشان تروح مفيش فايده روحت لسروجى فك الكراسى والكنبه والفرش وغسلهم وبرضه مفيش فايده وفى الأخر رحت لكهربائى فك التابلوه كله لاقينا العرسه ماتت فى التابلوه شالها ورشينا كل أنواع المبيدات والمطهرات وسد كل الفتحات الموضوع ده خد حوالى 10 أيام بندور على مصدر الريحه