طبعا كلكم ملاحظين كم الاخطاء الاملائية البشعة اللي ظاهرة في المنتدى هنا وفي النت عموما
بتلاقي الشخص مهندس ولا طبيب ولا لسه طالب جامعي او معهد وعنده اخطاء املائية
وانا بقول اخطاء املائية مش زلة كيبورد لان في فرق طبعا
تصدقوا بالله من وانا في ابتدائي معنديش اخطاء املائية والحمد لله وربنا يديمها نعمة
وتصدقوا بالله كمان مرة ان من كتر ما عيني اتعودت على الاخطاء الاملائية في المنتدى حسيت اني اتعديت
وبقيت اشك في كلمات كتير دي ياترى بالزين ولا الذال !!!!!!!!!!!
اقولكم على سر خطير.. انا بقيت احيانا اعمل سيرش عن الكلمة قبل ما اكتبها لو شكيت فيها ههههههههههههههههههه
والله بجد حاجة تضحك انا بقيت اخاف على نفسي من المنتدى ليجي يوم واكتب زهب بدل ذهب واكتب مدايقة بدل متضايقة واكتب ثوم بدل ثم واكتب استسمار بدل استثمار واكتب محظوف بدل محذوف واكتب لوغة بدل لغة واكتب مزيع بدل مذيع ..............
هو فعلا ملاحظة اني بقيت اغلط احيانا بس الحمد لله غالبا بلحق نفسي قبل مرور ال 10 دقايق للتعديل
بس احب اطمنكم على نفسي المدود الثلاثة لسه شغالة معايا تمام لحد دلوقت والفرق بين الهاء المربوطة والتاء المربوطة تمام عندي وكمان الالف اللينة اخر الكلمة (ى) والفرق بينها وبين الياء (ي) تمام وربنا يستر عليا في المستقبل
طيب الانجليزي عشان مش لغتنا ومفيش ممارسة ممكن نفوت الاخطاء الاملائية لكن العربي ازاي نفوتها