الموضوع: محتار و عايز حد يساعدني سريون 1500 أو فيات بونتو إيفو 1400

المشاركة الأصلية كتبت بواسطة juventus

يا جماعة معلش انا عايز اقول وجهة نظر في الموضوع ده
انا لو واحد بفكر اشتري عربية زيرو في مصر اخر حاجة ممكن افكر فيها هي توكيل العربية يا جماعة انا بشتري عربية اسوقها و استمتع بيها انا مالي و مال التوكيل انا بشتري عربية زيييييييييييييييروووووووو ووووووووو يعني يادوب الصيانة بعملها عندهم كل فترة و خلاص او لو استلمت العربية فيها عيب
كل التوكيلات في مصر اسعار قطع غيارها ناااااااااااااار و كلهم ممكن تطلع من عندهم عربيات فيها عيوب و كل الاقسام هنا في المنتدى بلا استثناء فيها شكاوي عن مختلف التوكيلات
و برضو اي توكيل ملزم انه يصلح اي عيب في اي عربية طالما في الضمان
و ارجو ان كلنا نتقبل اراء بعض برحابة صدر و كلنا اخوات في الاخر

إزاي بقى يا باشا آخر حاجة تفكر فيها هي التوكيل؟ هو حد ضامن إيه اللي ممكن يحصل في عربيته من عيوب صناعة؟ ولما تيجي تعمل صيانة أو تصلح عيب, مش يهمك التوكيل يكون فاهم هو بيعمل إيه؟ وفي برده امثله على شغل التوكيلات اللي مش مظبوط وقد إيه الموضوع ده مستفز وبيضيع وقت كتير.

الضمان ده ملوش أي لازمة لو التوكيل مش محترم, ساعتها بقى ولا قانون ولا حماية مستهلك هينفعوك. وفي المنتدى موضوع زي كده مع غبور.

ولو حد رأيه إنه مش فارق معاه التوكيل يبقى المستعمل صفقة أحسن بالنسباله, أو زيرو خليجي.

أنا ولا بشكر في عبد اللطيف جميل ولا باشتم في أوماترا, بس لو هنقارن يبقى عبد اللطيف جميل.

المشاركة الأصلية كتبت بواسطة slim_shika

كان فيه موضوع شامل مقارنة بين السيريون و الايفو. بس اتمسح في الوباء.

والنتيجة كانت كالاتي:

السيريون تتفوق في;
- قوة الموتور
- الواسع الداخلي
- التوكيل (خدمة مابعد البيع)
- قطع غيار ارخص
- اعتمادية أعلى
- 4 إزاز كهربة
- فتح تنك البنزين من الداخل

الايفو تتفوق في;
- الخامات الداخلية أفضل (برده مش فرق شاسع)
- option اعلي - blue&me
- أمان نسبيا أكتر (5 نجوم في ال euro ncap و السيرون 4 نجوم)
- ebd
- زرار ال city
- نظام ال eco



في المختصر السيريون اعتمادية وعملية, الايفو رفاهية.

وكل واحد واحتياجه.




علامة استفهام.

المشاركة الأصلية كتبت بواسطة wael17

ممكن تكون موفرة لو 1300 سي سي لكن صعب شوية السيريون 1500 سي سي تكون موفرة عن الايفو خصوصا ان الايفو فيها start/stop و eco و دي انظمة لتوفير استهلاك البنزين

الايفو بتعمل معايا 15-16 كم باللتر جوه المدينة و ممكن توصل 20 كم باللتر في السفر

المشاركة الأصلية كتبت بواسطة Anti_virus_abdo

هتكلم عن تجربة معايا جراند بونتو مانيوال و 2 صحابي معاهم سيريون ال1500 اوتو
اولا ال 2 فئة ال supermini
موتور : سيريون
ثبات : ايفو
شكل من الداخل و الخارج : (هي ازواق طبعا بس في رأيي ايفو)
اعتمادية : سيريون
امان : ايفو
توكيل و اسعار قطع غيار: سيريون
مساحة داخلية : سيريون
كماليات و اوبشنز و دلع :D : ايفو
استهلاك بنزين : ايفو عشان 1400 بس دا مايمنعش السيريون ممتاازة في الاستهلاك بالنسبة ال 1500
اعتقد بالمقارنة ديه و االمشاركات الي قبل مشاركتي حضرتك دقتر تختار الي عاوزة
صلي استخارة و ربنا يوفقك في اي عربية :)

الناس ديه كده جابت من الأخر و بضمير +1111111111111111 تحياتي ليكم
ياريت صاحب الموضوع يقرا الردود ديه كويس و يحدد هو عايز ايه
و اضيف بس ان شنطة الأيفو اوسع من السيريون و ده اللي مخليها اضيق من السيريون حاجة بسيطة و كمان ان تابلوه السيريون اقصر من الأيفو (و برغم انه قصير فيه ادراج و مساحته كويسة و كل حاجة باينة و مش شايلين منه حاجة)
و ان الأيفو تبقي اقوي لما الموتور المالتي اير ينزل انما لحد دلوقتي السيريون موتور اقوي

المشاركة الأصلية كتبت بواسطة M.Osman

شكوتين كل شهر ؟
هي اوماترا بتبيع كام عربية فيات في الشهر اساساً ؟

=========
هي وجهات نظر و انا شايف انه توكيل فاااااااشل و قلت كدا لناس كتير و غيروا رأيهم قبل الشراء الحمد لله

كمية البونتو كلاسيك اللي ضربت في الشوارع و البونتو ايفو بردو اللي في الشوارع بدون اعلان واحد ديه ايه ؟؟

الحمد لله احسن مثلا من كعبور اللي عمال يعمل دعايا و خلاص و مراكز الصيانة بتاعتو مفهاش مكان اصلا و الناس بتخرج تعملها برة اخر ما بتزهق و تستغني عن الضمان
بالمناسبة
من بعد اخر مرة مريت في بعض اقسام المنتدي قلت الحمد لله علي نعمة فيات و اوماترا مهما كانت ارحم من غيرها
و مش لازم ذكر عناوين المواضيع لأن الحمد لله كل واحد اكيد حافظ مواضيع القسم اللي قاعد فيه كويس

و الناس اللي غيرت رأيها لمجرد كلام دول 0.001% بالنسبة للناس اللي قارنت العربيات و التوكيلات عملي و استقرت انها هتشتري فيات ان شاء الله

كلمة بس عايز اقولها
ياريت الخلافات اللي بين الأعضاء في الأقسام تبقي بينهم و بين بعض مش معني عموما ان واحد مثلا دخل عندنا في قسم فيات و طلع مش مبسوط (مع انها مش من عادتنا اننا نزعل حد الا لما بيكون بسبب همجيته و كلامه بدون علم و عدم اسعداده للمناقشة حتي) يقوم يقول عربيات فيات كذا بنت كذا و توكيل كذا