صيف ساخن جداً مع الـ العربية 128

**aliabutaleb** · 22-03-2008 09:58 AM

السلام عليكم ورحمة الله وبركاته
عربيتي 128 موديل 1986 (زمانكم حفظتوها خلاص :))
من ساعة ما اضطريت أعمل عمرة موتور بعد ما جبتها بـ 3 شهور بس وانا بقيت موسوس على الاخر
آخر الصيف اللي فات بعد العمرة وملاحظة سخونية العربية الزايدة غيرت ترموستات المروحة والمفروض إنها بقت بتشتغل على 80 بدل 90
ولكن لا زلت مش حاسس بأي فرق بالعكس ساعات باحس انها مش راضية تشتغل بالرغم من زيادة الحرارة جداً واضطراري اشغلها يدوي
اليومين دول مع بداية ظهور مقدمات الصيف بقيت لازم وانا راجع من الشغل أشغل المروحة يدوي ومع ذلك العربية سخونيتها بتعدي نص المؤشر في آخر المشوار
سمعت كلام هنا عن تغيير المروحة واستبدالها بألومنيوم وحركات كدة بتتعمل عشان تقلل السخونية لأن من الواضح إن الصيف الجاي ان شاء الله صيف ساخن جداً

أي نصائح او مقترحات تقدروا تفيدوني بيها؟؟؟؟

**YaSSerwIN** · 22-03-2008 10:09 AM

وأتأكد من أن الريتداتير كويس

**sab3aawy** · 22-03-2008 10:30 AM

عدم عمل المروحة برغم ارتفاع الحرارة معناه ان المية ناقصة فى منظومة التبريد ، فتأكد ان المية مش بتنقص ولو بتقص شوب بتنقص منين

كون المروحة بتشتغل وبرضو العربية مش بتبرد يبقى ده معناه ان إما التاكيهات او الأدفانس او الشكمان عندك فيهم مشاكل تستلزم المراجعة او ان عندك ازمة ردياتير تستلزم تغيير المذكور ، راجع الحاجات دى الأول ولو مالقيتش مشكلة فيهم يبقى عليك بالردياتير

**aliabutaleb** · 22-03-2008 01:09 PM

الرادياتير كان قبل كدة بيسرب مية
رحت عملته ومن يومها مش بيسرب
وابتديت بعد ما ظبطته واتنضف كويس اني احط المية الخضرا
مية الرادياتير بتنقص فعلاً بس مش تسريب
الاول كانت كل مشوار لازم أزودها
دلوقتي ممكن كل 5 أيام بازودها
المروحة لما بتشتغل بتقلل الحرارة إنما انا مش شايفها كما يجب
لأن انا لو مشغلتش المروحة الحرارة بتعدي نص المؤشر ببكتير لدرجة اني باقف بالعربية لغاية ما تهدى
إنما لما باشغل المروحة بتقف بعد نص المؤشر بشوية

هاشوف بقى موضوع التاكيهات والشكمان ده ان شاء الله لما اروح اسكندرية المرة الجاية

شكراً على الردود

**hesham_tawfiq** · 22-03-2008 01:19 PM

السلام عليكم
انا كان عندى نفس مشكلة حضرتك بس طلعت المشكله فى طلمبه الميه وحاجه تانيه فيها اسمها قلاب الميه او حاجه زى كده.بصراحه مش فاكر اسمها ايه بس لما الميكانيكى فكها وكاننت مصديه ودايبه من جوا اوى وهو دا اللى كان بيخللى الميه تقل ومن ساعة ما غيرت طقم التبريد دا كلله العربيه بقت كويسه
بس اهم حاجه تتاكد ان الرادياتير سليم

**aliabutaleb** · 22-03-2008 01:53 PM

المشاركة الأصلية كتبت بواسطة hesham_tawfiq

السلام عليكم
انا كان عندى نفس مشكلة حضرتك بس طلعت المشكله فى طلمبه الميه وحاجه تانيه فيها اسمها قلاب الميه او حاجه زى كده.بصراحه مش فاكر اسمها ايه بس لما الميكانيكى فكها وكاننت مصديه ودايبه من جوا اوى وهو دا اللى كان بيخللى الميه تقل ومن ساعة ما غيرت طقم التبريد دا كلله العربيه بقت كويسه
بس اهم حاجه تتاكد ان الرادياتير سليم

الرادياتير في حالة كويسة جداً على حسب ما قاللي بتاع الرادياتيرات
نضيف برضة موضوع طلمبة المية والقلاب للاحتمالات
شكراً يا هشام