الموضوع: أنا بس إلي كده ؟؟؟

ا[size="5"]لسلام عليكم ورحمة الله وبركاته
انا اخوكم حسام عندي 35 سنة متزوج وعندي بنتين وولد
مهندس اتصالات
اسمحولي احكلكم عن تجربتي البسيطة في الحياة الي احنا بنعيشها
اولا الحالة الي حضراتكم بتتكلمو عليها مررت عليا انا كمان
ولو مكنتش عملت الي هحكلكم عليه ده يمكن كنت وصلت لمرحلة من الاكتئاب الله وحده يعلم بماذا كانت ستنتهي
والحمد لله استطعت اني اتغلب عليها كثيرا مع اني في بعض الاوقات بتمر عليا الحالة ديه حتي الان ولكن بسيطرعليها
لا انكر اني كل مرة بتاخد مني وقت مختلف عن المرة الاخري بمعني ساعات تاخد يوم ساعات تاخد يومين او اكثر وساعات بتاخد ساعات محدودة والحمد لله كل مرة بتعدي الف حمد وشكر ليك يارب
الموضوع بمنتهي البساطة ان دي عبارة عن حالة من اليأس او عدم احساس باهمية الحياة او باهمية الي بنعمله في حياتنا اليومية
اهم شيء اقترب من الله بقدر ما تستطيع من قوة اكثرمن الصلاة والاستغفار
اولا – ابعد تماما عن اي شخص كئيب وشايف بكرة اسود والعياذ بالله ابعد عنهم تماما لان النوع ده من الناس هيخليك دايما كئيب وهيزيد من الحالة ديه عندك
ثانيا – لا تتحدث لنفسك بهذه الافكار لان الشيطان هيجد مدخله للوسوسة ليك بالي لا يمكن تتوقعه من اشياء تخليك تنتحر مش تكتئب بس دائما اكثر من الاستغفار والاستعاذة بالله من الشيطان الرجيم
ثالثا – حب الي انت بتعمله لازم تحب شغلك بيتك عربيتك اهلك شارعك هدومك ولادك كل ده طبعا بعد اهم حب في حياتنا كلنا وهو حب الله سبحانه وتعالي الحب اجمل شيء في الوجود بيخليك حاسس ان ليك قيمة في الحياة
• افعل لدنياك كأنك تعيش ابدا واعمل لاخرتك كأنك تموت غدا
• اذا لم تسطتيع ان تفعل ما تحب فحب ما تفعل
حكمتين جمدييييييييييييين جدااااااااااااااااااااااا ا ياريت كلنا ناخد بيها وصدقوني وعن تجربة الحكمة ديه جميلة جدا
مع الاخذ في الاعتبار انك لازم كل فترة تغير الي انت بتعمله وتغير الاماكن الي انت بتروحها
عارفين ايه الفرق بنا وبين الغرب ان احنا علي طول بنشتغل مافيش حد فينا بياخد اجازة بمعني الاجازة
انا بتعامل مع اجانب كتير امريكان وايطالي وصيني وفرنساويين وكان ليا اصدقاء من كندا كانو ساعة الشغل شغل وساعة الراحة راحة بمعني الكلمة لا يمكن يتكلم في الشغل في وقت الراحة او يوم الاجازة بل الاكثر من ذلك بيقفل التليفون تماما ولا يمكن يفتح الميل الخاص بالعمل كل تفكيره انه يتمتع بالاجازة او وقت الراحة فقط لا غير وده بيخليه يرجع شغله نشيط جدا ومستعد للعمل اكتر من الاول
رابعا - لازم تكون متفائل انا عارف ان ناس كتير هتقول وايه الي يخلينا نتفائل صدقوني فيه كتير لو كل واحد منا بص للاقل منه حالا او مالا او صحة او مستوي اجتماعي او.............................. حاجات كتير تخليك تحس انك احسن وانك مميز عن غيرك
خامسا – لازم يكون ليك اهتمامات واهداف عاوز توصل ليها والا فعلا حياتك هتكون من غير معني مرتبة وعارف اذاي توصل لاهدافك ومرتب ليها ممكن لا تتحقك بس المحاولة في حد ذاتها هتعجبك وهتعلي عندك احساسك باهمية الي انت بتعمله
وكل اما توصل لهدف اسعي لهدف اخر او اكبر عشان تملي الفراغ الي في حياتك بقدر الامكان
ولازم تكون عارف انك بتعمل شيء مهم ومفيد ليك ولغيرك مهما كان صغير او كبير
لو كل واحد فينا فكر شوية مع نفسه هيجد انه بيعمل اشياء كثيرة مهمة وجميلة في نفس الوقت
تعالوا نتخيل ان الصيدليات اغلقو بكرة الصبح تفتكرو ايه الي ممكن يحصل
تعالو نتخيل وده حصل فعلا السادة جامعي القمامة بطلو شغل ايه الي ممكن يحصل
اذا كل واحد فينا اكيد بيعمل حاجة مهمة سواء ليه او لغيره فأرجوكم اشعرو بأهمية حياتكم
فالنفرض ان جالك حالة من الملل روح لهواياتك
روح مع اصحابك واتكلمه في اي شيء غير الشغل ومشاكل الشغل
انا واثق ان معظمنا لما يقعد مع اصحابه بيحكي عن الشغل والمواقف الي بتحصله فيه سواء حلوة او مرة
مثلا ايه المشكلة انك تفكر في حياتك عاوز توصل لايه في شغلك في حياتك الاجتماعية
مثلا يبقي عندك صيدلية واتنين وتلاتة ومليون ايه المشكلة احلم وحاول تحقق حلمك
احلم انك تتجوز وتبني بيت مبني علي التقوي والاخلاص وتجيب عيال وتحاول تربيهم كويس عشان يكونو سندك لما تكبر
بأمانة اجمل لحظات حياتي وانا بلعب مع ولادي وسأل اي حد عنده اولاد
في مثل بيقول ان كان همك كبير حط قدامك صغير
كل واحد فينا بيعيش مرحلة وبعدين ينتقل لمرحلة اخري ثم اخري وهكذا هي ديه سنة الحياة لا يمكن شيء يبقي علي حاله ابدا
مثلا الاب كان في يوم طفل ثم شاب ثم اب ثم جد لاحفاد
وكلنا كنا في الابتدائي ثم الاعدادي ثم الثانوي ثم الجامعة ثم الشغل ثم الزواج ثم انجاب اطفال ونبقي اب او ام ثم جد وهكذا
املا الفراغ الي موجود في حياتك الي احنا كلنا فيه ده سببه الفراغ وعدم وجود هدف واضح وعدم ترتيب افكارك واهدافك
انا عارف اني طول عليكم كتير بس كنت بحاول بس يارب اكون قدرت اوصلكم الي جوايا والي نفسيه اوصلهلكم
واخيرا انا اسف للاسلوب انا مش بعرف اكتب مواضيع بس حاولت انقل ليكم بعض من خبراتي المتواضعة والقليلة جدا في هذه الدنيا

اخوكم حسام من ام الدنيا

[/size]