أنا بس إلي كده ؟؟؟

**A7MED_PHARMA** · 01-12-2010 09:34 PM

السلام عليكم

إختصارا للكلام .....
أخوكم أحمد راضي
يبلغ من السن 26 داخل في الــ 27
صيدلي حر ..
مشكلة حياتي الرئيسية .. الملل
روتين اليوم هوا هوا
من كام سنة كان عندي حماس للحياة .. وللإرتباط
فجأة
حسيت إن مفيش شئ فارق في حياتي
يعني مابقاش عندي طموح لأي حاجة
فجأة كده
بقيت كل الي عاوز إن اليوم يعدي .. علشان أروح أحط راسي على المخدة
وأسرح بخيالي في مليون حلم من أحلام اليقظة قبل ماأنام
أحلام مجرد خيالات وذكريات قديمة بتسلى لما أفتكرها
................
مهنتي بتفرض عليا إني أكون إجتماعي
بس أنا إجتماعي مع الناس .. بمعنى إن الإبتسامة دايما مرسومة على وشي
والإبتسامة دي جزئ من شخصيتي قدام الناس
لكن بيني وبين أصحابي أو معارفي..الإبتسامة دي مابتكونش موجودة
مابحبش أختلط بالناس كتير لأسباب كتير
مافيش حد عنده دماغ زي دماغي ...غير إتنين من أصحابي
علشان كده
بحب إني أكون منفرد بنفسي موووت

بعشق الصيد بدرجة خيالية
أيام تلاقوني ماسك سنارة على ترعة كبيرة في نص الليل .. بصطاد سمك
وأيام تلاقوني ماشي وسط الأراضي الزراعية في عز الظلمة .. معايا البندقية والكشاف بصطاد عصافير
الليل بالنسبة ليا مملكة .. أنا سلطانها
مابخرجش مع أصحابي غير بالليل
غالبا مش بروح الصيدلية غير بالليل

بالمنطق
حاسس إن حياتي مش طبيعية
لكن حياتي عاجباني
أهلي بيلحوا عليا في الإرتباط..لكني مش عاوز
مش لسبب معين
لكن مش عاوز حد يشاركني حياتي الغير مألوفة دي

....
إحساسي إني كبرت على حاجات كتير

مش عارف
دي أزمة منتصف العمر .. ولا إيه؟؟؟
أنا بس كده .. ولا حد معايا في نفس الظروف

**remomemo** · 01-12-2010 09:43 PM

ازمة منتصف العمر ؟؟؟؟؟؟ انت صغير اوى على الاحساس ده
بس حالة الملل دى طبيعية كل شعب مصر بيحس بيها مهما كنت مشغول
مش فاهمة المعادلة دى انا نفسى على قد ما فى شغل متاخر على الواحد على قد ما فى ممل

**No Comment** · 01-12-2010 09:55 PM

بدون الدخول فى تفاصيل وكلام كتير .... لا دى حالة بقت للاسف عامة .

**Hussein_Emara** · 01-12-2010 10:07 PM

نفس السن و الحالة النفسية, بس بدفنها في الكتب و المراجع

لو بس الظروف كانت اهدى شوية, كان زماني بناقش الدكتوراه, الحمد لله على كل شيء

مش عارف اقولك إيه, كنت دايما اسمع ان فترة الشباب دي اسعاد ايام الحياة (او على الاقل كانوا اهلي بيوهموني بكدة) بس الواقع بيقول ضغط عصبي رهيب, بردو الحمد لله, حاول تطول في الصيد اكتر, يمكن.

**ahmed-moga** · 01-12-2010 10:40 PM

علي فكره دكتور احمد انا كنت اسوء منك بكثير جدا لما سبت وظيفتي وفتحت مشروعي الخاص دلوقتي الذي ترتب عليه ملل فظيع جدا الموضوع خف شويه لما اتجوزت وحاولت اتأقلم مع الأمر الواقع وهو ان فيه انسانه بقت مسئوله مني واتجوزت بناء عن رغبة اهلي اني اتجوز لأن سني كان وصل ل30 ومكنش فيه اي حاجه الحمد لله وبكرمه نقصاني من اول الشقه حتي التكييف غير الزواج ولكني كنت احب حياة العزله والأنفراد والصيد ولو كان الموبيل القديم موجود قبل مايضيع كنت وريتك اشكال مختلفه من الطيور والتعالب وعلي الرغم اني تزوجت الا وانني مازلت حتي الأن احن للحظة سكون وانفراد مع نفسي فقط للعيش في احلامي التي طالما تمنيتها وذكرياتي السابقه بحلوها ومرها ولكن احاول اتأقلم مع هذه الحياه الجديده
نصيحه اخويه لك اقترب من الله اكثر وتعشم في الله خيرا وتزوج وحاول تتأقلم مع هذه الحياه وضع حول عينيك وامامك هدفان
وهما 1-ابتغاء مرضاة الله في حياتك وعملك
2-السعي الي ان تصل الي ماتصبو اليه ربنا يوفقك ويكرمك قلبت عليا المواجع روح ياشيخ وتعالي بسرعه هههههههههههه ونصيحه مجربه لاتعيش في هذا المود كثيرا حتي لاتصاب بأكتئاب حاد وتفضل تبلبع في مهدئات بتاعة الصيدليه هههههههههههه

**shaddadfalcon1** · 01-12-2010 10:58 PM

يمكن الملل ده عشان رتم الحياه عندك ثابت

علي فكره انا زيك بالظبط بس مش بحب اطلع بره البيت بالليل خالص

ومع اني متزوج وعندي عيل مطلع عين اللي خلفوني ويسلي بلد كامله بس برده ساعات بحس باكتئاب
يمكن عشان مش عارف احقق احلامي في البلد الفقر دي
يمكن ساعات بحس اني مقصر شويه في ديني
يمكن عشان زانق نفسي في الشغل ومش مدي نفسي فرصه اني حتي اشم نفسي
تخيل اني عمري في حياتي ماصيفت ولا اخدت اجازه وانتخت ولا حتي انفسحت كام يوم
من صغير وانا بشتغل وفي ايام لصيف كنت اذاكر للسنه اللي بعديها ودلوقتي اشتغل في البيت عشان اعرف اجيب شقه وواجز عشان اقرا كتب عشان شغلي

حاجه كده تجيب المراره والطحال والقلب والكبد والكلاوي والفشه وكل الحاجات اللي جوه دي