الموضوع: صيانه الـ 1000 كم و.....احذرو المفاجات !!!

الحمد لله عملت صيانه الـ 1000 كم وبصراحه انا كنت بحاول اخلص اول الف كم بسرعه علشان اظبط العربيه ... والحمد ونتيجه للسمعه الكويسه للسبع فى زهراء المعادى قررت انى اعمل الصيانه عندهم وفعلا اتصلت بيهم وحجزت معاد ليه ولزميلى بس هو كان صيانه ال 50000 ... المهم انا حجزت فى معاد رايق الصبح الساعه 9 ...انا قلت اروح بدرى علشان الناس تهتم بالعربيه شويه قبل الزحمه...ولما رحت على طول مهندس الاستقبال اخد بيناتى وبينات العربيه والرخصه ...خلى بالكم ياجماعه لكل اللى اشترو العربيه جديده لان لازم تتصل ب 16244 علشان تاخد كود تفعيل الضمان قبل ما تروح الصيانه ...مهندس الاستقبال قالى اتصل بيهم دولقتى وانا بخلص الورق وفعلا ناس زوق جدا واخدت الكود وطلعت الاستراحه ... وطبعا الشكل البانورامى انك قاعد قدام الزجاج والعربيات كلها تحت وانت شايفها منظر حلو وكمان فى شاشه كمبيوتر كبيره بينزل فيها اسم العميل وعربيته بيحصل فيها ايه دلوقتى... يعنى هى فى الصيانه ولا الغسيل ولا التجربه ....الخ ... النسكافيه والشاى مجانى على فكره وفى لاب توب ونت للى عاوز يستخدمهم.... المهم على الساعه 11 لاحظت ان اسمى اتكتب قدامه ان العربيه خلصت ونزلت ادفع الحساب ... على فكره الصيانه كانت عباره عن تربيط العربيه بالكامل وتغير الزيت والفلتر ومراجعه العربيه بالكامل من كل حاجه... بالنسبه للفاتوره كانت كالتالى 15.04 جنيه اجمالى مصنعيات (عسيل خارجى + هوفر) و 50 جنيه اجمالى قطع الغيار (فلتر الهواء) و194.9 اجمالى اجمالى خدمات (زيت شيل الترا + مياه مقطره) و25.99 اجمالى ضريبه المبيعات ...يعنى الاجمالى كله 285.93 وبعد ما دفعت الفطوره واستلمت اذن الاستلام واخدت المفتاح حصلت المفاجأه الغير متوقعه ... زميلى لان عنده خبره قالى لازم تشيك على العربيه من جوه والشنطه وفعلا شيكت عليهم ولاقيت كل حاجه والحمد لله لكن انا لاحظت ان فى طرطشه زيت على الاكصدام الامامى والشبكه للعربيه .. بصراحه انا قلت عادى يمكن من باقى الزيت او حاجه..لكن زميلى قالى لا افتح واتاكد بنفسك كبوت العربيه ... ولما فتحت الكبوت زهلت من اللى حصل ... الغطاء بتاع الزيت اللى فى المتور مكان ما اتحط الزيت مكانش موجود وطرطشه الزيت دى حصلت لما العربيه طلعت من جوه لحد بره ... ولاقيت غطاء الزيت محطوط على جنب مكان ما اللى فكه سابه فى الاول...انا بصراحه اتخضيت وجريت على المهندس ولما شف الوضع كده بصراحه الراجل اتصدم وكميه اسف واعتذارات مافيش كده وجاب الفنى المسؤل وكلمه وطبعا كالعاده الفنى قال انا قفلته والله معرفش ايه اللى حصل...المهم المهندس قالى مالكش دعوه وحنا هانتصرف ودخلو العربيه تانى وزودو زيت مكان اللى نقص واتعملها غسيل من المتور مكان الزيت اللى طرطش... وبعدها المهندس بص على العربيه تانى واتاكد انا الغطى اتقفل كويس وادانى هديه بسيطه اعتذار منه عن اللى حصل...علشان كده يا جماعه خلى بالكو وراجعو العربيه حته حته بعد الاستلام وقبل ما تدور حته العربيه وربنا يسترها معانا ومعاكو.