الموضوع: و اخرتها ...... الهم ارحمنا ؟!

المشاركة الأصلية كتبت بواسطة mahmoud_afifi

الواحد يشيل معاه في العربيه شومه

معايا بس واللهِ بأبقى هستعملها خلاص وفي الآخر يصعب عليَّ

المشاركة الأصلية كتبت بواسطة mahmoud_afifi

اسلم حل.... شغل الكاسيت وعليه على الاخر وامشي في الشارع عشان ماتسمعش الي يبرطم والي يشتم والي يزمر.
اياكش يولعوا يا شيخ :)))

+++++++1

فعلا السواقة بقت زي الزفت و بالذات قلي بخاف منهم (الستات و الشباب 18و 19 سنة و الناس المسنة)
انا من كام يوم حصل معايا موقف و ضرب واحد و كانت ليله
ماشي بالعربيه علي الكورنيش في اسكندرية و السكة واقفه و في واحد ورا شغال بيقلب نور و يضرب سارينه و انا مش فاهم هوا عايز ايه كده كده السكه واقفه و كبرت دماغي راح معلق علي السارينه و فاتح العالي و هوا مركب زبنون اتعاميت رحت نازل من العربيه متنرفز جدا لقيته شاب صغير 18-17 سنه و معاه صاحبته قلتلوا اطفي السارينه و النور قلي انا حر انت مالك و راح ضاحك كده لصحيته رحت شده من العربيه و مديه علي وشه و علي قفاه و الناس اتلمت و كانت ليله و طبعا قلي انا ابويا فلان الفلاني و الكلام دا
الناس غربيه تقلي كل واحد همه يجري و خلاص حاجة تقرف لما بسافر بره مصر و بشوف الناس بتسوق ازاي و الاحترام و الاشارة لما تقفل تلاقي كل العربيات علي خط واحد اما هنا تلاقي دا مدخل وش العربيه كده و دا زانق دا عشان اول ما الاشارة تفتح يطلع الاول
اهم حاجة حول تتمالك اعصابك و ماتنفعلش عشان متوعش نفسك في مشاكل انت في غني عنها

يا راجل تمالك اعصابك انت الأول :d

المشاركة الأصلية كتبت بواسطة wael17

فعلا الموضوع زاد عن حده و الواحد لو هاجر بره مصر هاتكون تعاملات الناس هنا السبب الرئيسي للهجرة
انا كنت بانفعل كتير بسبب تصرفات الناس في الشارع و وصلت اني مره من سنه نزلت مسكت في واحد راكب فيليشيا و الحمد لله الناس حاشت قبل الموضوع ما يوصل للضرب...هو زقني و انا زقيته وبعدين الناس حاشت
بصراحة الواحد و هو سايق بتبقي روحه في مناخيره و ممكن موقف بسيط يتطور لخناقه كبيره لا يعلم غير الله نتائجها و التي قد تغير مسار حياتك تماما...بس بعد الواحد ما يهدي و يفكر في سبب الخناقه و يقارنه بالنتائج اللي ممكن تترتب عليها هيوصل للاتي...مافيش حاجة تستاهل انك تشتم...او تنزل من عربيتك....او تتخانق...او حتي مجرد انك تتنرفز بينك و بين نفسك
و بعدين الناس اللي بتقول انزل اضرب و اتخانق...انتو مش بتقروا جرايد؟؟ ماسمعتوش عن الناس اللي بتموت في خناقات بسيطة لمجراد احتكاكات بسيطة اثناء القيادة...طب ماسمعتوش عن وكيل الوزارة الي وقف ميكروباص في شارع احمد عرابي عشان خبطه راح السواق فرمه تحت العربية و اتكررت نفس الحادثة علي الدائري....يا تري ايه يستاهل و انا أب لطفلين اني أموت و انا رايح او راجع من الشغل...لا عربيتي و لا عربية غيري و لا اي حد في الشارع او في مصر كلها يستاهل ان أموت بسببه...تخيل انك تموت في خناقة بسبب ان فانوس عربيتك اتكسر!!!! في داهية الفانوس علي العربية علي اللي ماشيين علي الطريق كلهم!!!

تعامل مع الاخرين و كأنهم أشياء تمر بجوارك و ليسوا بني ادميين (انا اسف اني اقول كده)...يعني لو ماشي بالعربية و شفت حمار (اسف بشده علي التشبيه) او حصان او خروف...اي حاجة بتمشي بس مش بني ادم و الحاجة دي جت جنب عربيتك و حكتها...يا تري هاتشتمها؟؟؟ طبعا لأ...طب لو الحاجة دي نظرت لك و هي ماشية هاتحس باستفزاز او اهانة...طبعا لأ...و هو ده الحل السحري اللي بقالي فترة ماشي عليه و الحمدلله مافيش اي انفعالات وانا سايق...اول لما انزل الصبح من البيت و اركب العربية عشان اروح الشغل ...اقوم لابس النضارة الشمس و اطلع بالعربية و اعتبر اني انا البني ادم الوحيد الي علي الطريق و جميع من حولي اشياء غير عاقلة...واحد يدينني كلاكس و او فلاشر عشان يعدي من الشمال و انا اصلا ماشي علي اقصي سرعة مسموح بيها....ولا الهوا....يجي جنبي يبصلي....ولا الهوا....يقول اي حاجة...مش هاسمعها عشان قافل الازاز و مشغل الكاسيت...ممكن ابصله بدافع الفضول مش اكتر و طبعا مفيش اي انفعالات علي وشي و ده بيجننه اكتر (مش عارف ليه) ....يعني البرود القاتل افضل وسيلة بس لازم فعلا تقنع نفسك تماما انك انت البني ادم الوحيد و مفيش حد يستاهل انك حتي تنفعل بينك و بين نفسك...و لو فكرت هتلاقي ان احسن انتقام تقدر تعمله هو انك تتجاهله تماما و تحسسه انه شيء لا يرقي لمستوي انه يثير اي انفعال لديك..هو بقي هاينفعل و مزاجه يتعكر و يشتم و ياخد سيئات و انت تاخد حسناته و هايحس باهانه لانك حسيسته انه شيء...يعني هاتنتقم منه و بدون اي خسائر عليك

أتفق مع كلام حضرتك. الكلام ده لازم يبقى المبدا اللى كلنا نمشى بيه

المشاركة الأصلية كتبت بواسطة m.osman

يا راجل تمالك اعصابك انت الأول :d

ماهو انا كده تمالكت نفسي لان دي عيل رزل و كان لازم يضرب عشان يحترم الناس و يبطل يلعب بالعربيه
لو انت مكاني كنت عملت ايه

المشاركة الأصلية كتبت بواسطة mbhead

ماهو انا كده تمالكت نفسي لان دي عيل رزل و كان لازم يضرب عشان يحترم الناس و يبطل يلعب بالعربيه
لو انت مكاني كنت عملت ايه

مع احترامي لحضرتك....بس واضح ان حضرتك ممكن تكون بدنيا أقوي من الشاب ده...طب لو الشاب ده كان جسمه قد حضرتك مرتين...بلاش...طب لو راكب معاه اتنين اصحابه هاتقدر تضرب تلاته؟!....بلاش..حضرتك شفته لوحده مع بنت و ضربته و طلعت العربية اللي وراه راكب فيها 4 شباب اصحابه او قرايبه و شافوك بتضربه هاتعمل ايه؟ هاتقولهم بضربه عشان قالي "وانت مالك".....سيبك من كل ده..الواد جسمه قله و لوحده و حضرتك ضامن ان ماحدش هايدخل ضدك....تضمن منين ان الواد مش مبرشم ولا ضارب بانجو و شايل معاه مطوة او حتي مسدس او العصاية الكهربا و تكون نهايتك علي ايده!!.....حضرتك انفعلت و احنا كلنا بننفعل بس كون ربنا سترها معاك مش معنا كده ان التصرف ده صح....يعني لو كل واحد استفزني او قل ادبه هانزل الّطشله في الشارع يبقي كده الشارع هايتحول لغابة (هو مش ناقص اساسا) و طبعا الاقوي هو اللي هاينزل يضرب و الضعيف هايضرب و شكرا علي كده

يا جماعة والله العظيم ما في حاجة مستاهلة ان الواحد ينزل من عربيته و يعلي صوته و يمد ايده علي حد. لو كل واحد قليل الادب هانزل اضربه مش هانخلص

مساء الخير يا جماعة

اسمحولى اختلف شوية مع الاخوة الى بتنصح بالهدوء التام فى التعامل مع البهايم الى بنشفهم فى الشارع ( و انا اسف انى باسىء للبهايم لما بشبههم بالعالم دى )

الاختلاف فى انك ممكن تبقى هادى و تتحكم فى اعصابك لو حصل معاك موقف او اتنين او حتى يا عم 3 مواقف غلسة من عالم معدومة الاحساس و الضمير - لكن يا اخوانا دا كل شوية - كل شوية يقابلك بهيم بيبرطع يمين و شمال - يا دوب تفادى واحد بيحدف عليك تلاقى صاروخ معدى من جنبك يادوبك تلم نفسك علشان ميلطكش تلاقى واحد قدامك مسهم ماسك شمال تعدى منة تلاقى واحد بيحرق و بيحاول يعدى منك من اليمين و يموت نفسة انة يعدى دا الى اخرة

قلى بقى امسك اعصايى ازاى - دا انا محتاج على كدة زراعة اعصاب كل 3 ايم

مع انك لو سافرت اى بلد اوروبى و عندنا فى افرقيا مثلا ( المغرب ) تلاقى السواقة ليها شكل تانى - احترام و هدوء و امان

دا انا يا جماعة قعدت فى بلد اوروبى حوالى شهر و نص تبع شغلى و مشفتش حادثة واحدة

و الله احاول انى اطنش بس انا عارف ان بعد تالت او رابع غلاسة حشوفها فى طريقى حفقد هدوئى و ارجع احرق فى دمى

يالا ربنا يعنا على ما بلانا