الموضوع: كنت هموت النهاردة بس ربنا ستر

النهاردة اتعرضت لموقف موت والحمد لله ربنا ستر وممتش وطلع لسه فى العمر بقية

النهارده وانا رايحة الجامعة من الزقازيق للقاهرة وماشية عادى ومفيش اى حاجة عديت كوبرى بردين ونزلت وبعدها بشويه كان فيه مطب وانا كنت ماشيه حوالى 80 وبهدى قبل المطب اكبس فرامل ملقتش فرامل خاااااااااااالص ولا كأنى بدوس على حاجة فضلت اارفع رجلى واحطها تانى مفيش حاجة وانا داخلة على مطب عالى واودامى عربية وجنبها عربية وفيه مسافة بينهم متعدنيش والعربية هيدروماتيك اول مرة اتحط فى الموقف ده شديت الهاند مفيش فايدة مش راضيه تهدى وسبحان الله العربيتين اللى اودامى بعدوا عن بعض والمسافة وسعت بينهم دخلت بينهم بسرعة جدا وانا على المطب والسرعة لسه مش راضيه تهدى فكرت ادى p على اساس انها تهدى اول ماديته العربية فضلت تطقطق فعملتها على n وحدفت يمين فى الرمل واتشاهدت واستنيت بقى قضايا انى هلبس فى عمود او عربية او انا ونصيبى لحد مالحمد لله العربية فضلت تهدى على الرمل لحد ماوقفت وطبعا مكنتش عارفه اتلم على اعصابى فتحت الكبوت بصيت على زيت الفرامل مفيهوش حاجه والتيل انا لسه مشيكة عليه من يومين جازفت ودورت العربية ومديتش بنزين وعملتها على d مشيت براحه ولاقيت فرامل رجعت بس بتهرب مشيت بالراحة جدا لحد بلبيس ووديتها عند واحد بتاع فرامل قالى ان ماستر الفرامل فيه مشكله والجلد بتاكل واودامى حل من اتنين يااما اشترى ماستر اصلى ب 250 جنيه وده مش من بلبيس اروح اجيبه من الزقازيق يااما يركبلى جلد يابانى للماستر طبعا الحل اللى كان اودامى فى ساعتها الجلد .ركبهولى وجربلى العربية بس انا حسيت ان الفرامل بعيدة خاصة ان فراملى كانت قويه الله يرحمها بقى وقلتله قاللى لا ده كده عدلها وجامده وكلام من ده . طلعت بيها من بلبيس للجامعه وطبعا وانا اعصابى بايظة وكل شوية بتأكد من الفرامل انها موجوده . لما وصلت الجامعه اتنين زمايلى قالولى تعالى هنوديكى لواحد حلو اوى فى الحرفيين وودونى لواحد هناك بيتعاملوا معاه ظبطلى الفرامل فى العجل اللى ورا وقاللى مادام الراجل حطلك جلد هيمشوا معاكى سنة .. وطلعنا جربناها بقت اقوى بكتير بس مش زى الاول قالى بالمرة نغيرلك تيل عشان التانى قرب يخلص وفعلا اشترينا واحد ب 90 جنيه وقالى ان النوع ده حلو وركبناه بس حسيت ان الفرامل ضعفت عن ساعة ماجربناها قالى ده عشان التيل جديد ولسه هيطبع معرفش الكلام ده صح وللا ايه

فيه واحد زميلى قالى المفروض ساعة مالفرامل سابت كنتى تدى تالت وسنة بنزين وبعدين تانى وسنة بنزين وبعدين اول معرفش الكلام ده ايه نظامه

وياترى ازاى ممكن اجنب نفسى التعرض للموقف ده تانى ازاى خاصة ان الفرامل بتاعتى كانت كويسة جدا لحد ثوانى قبل ماتهرب كده

وربنا يستر طريقنا كلنا

حمد الله على سلامتك
لازم تغيري الماستر وسيبك من موضوع الجلد دا لأن دا يعتبر ( مسكن قوي ) والمفروض وإنتي في الحرفيين كان ركبلك ماستر إستيراد تكون حالته نظيفة ودواسة الفرامل هتفضل واطية مش هتعلى غير لما تركبي ماستر جديد أو استيراد وبعدين إنتي من النوع اللي بيدوس فرامل جامد ولا عادي حسب الطريق ؟؟؟؟؟ وعربيتك عاملة كام كيلو
ومرة تانية حمدالله على سلامتك