انا هاحكى عن موقف حصللى مع الكلابش..
كان عندى مشوار لحد شارع المناصرة فى باب الخلق .. ونادرا لما كنت اروح هناك .. المكان زحمة جدا وكانت الساعة حوالى 8-9 بعد المغرب تقريبا .. ركنت عربيتى قرب مدخل المناصرة من شارع بورسعيد .. (فى الصف اللى قدام المحكمة) .. ودخلت أسال على الطلب بتاعى .. لمدة 20-25 دقيقة تقريبا ..

ارجع العربية ألاقى العربية مكلبشة .. و دى اول مرة تحصل ليا .. مكنتش عارف اروح فين ولا اعمل ايه !!
لاقيت من بعيد واحد صول ماسك اليوترن اللى قبل مديرية الامن .. قولتلله حصل كذا كذا .. اعمل ايه ؟؟
قاللى: الاول هتروح شارع الازهر تدور على نقطة الشرطة وتدفع غرامه الكلابش .. كام يا عم دى؟؟ .. 131 جم !! .. وتاخد الايصال ، وبعدها تقف ترجع تقف جنب عربيتك لحد ما الونش يعدى عليك يفك الكلابش.
انا جاللى ذهول .. امشى ادور على النقطة .. ادفع 131 وانا حتى مالحقتش اقف بالعربية .. وبعدها استنى لما الونش يعدى!!!!

قولت للصول مافيش حل للغرامة دى والعطلة دى .. دا العملية مش مستاهلة الفيلم الهابط ده ، فرد: هوا ده حلها .. وبعدين قاللى: هاقولك حاجة بس ولا كأنك سمعت حاجة منى!!
قولتله خير؟؟
قاللى: تروح تعمل اى مشوار وتغيب ساعتين تلاته .. قولت: ليه واشمعنى ؟!!
قاللى: هترجع تلاقى الكلابش اتفك
استغربت جدا وكان عندى مشوار فعلا ناحية السيد زينب فركبت تاكسى ورحت من غير العريبة.

وفعلا رجعت وانا ايدى على قلبى احسن ارجع مالقيش العربية خالص
ومن بعيد لاقيت العربية اطمنت .. وفعلا الكلابش اتفك
عرفت بعدها ان الونش ليه ميعاد لازم يعدى يفك الكلابش فى نهايه وقت خدمته ..

و دى كانت تجربتى ومش عارف هوا دا النظام علطول ولا جت معايا كدا!

والحمد لله لما كنت بجدد رخص ماكنش عندى مخالفات.