الموضوع: برجاء المساعده في اختيار نيو اكسنت او كيا ريو 2011

المشاركة الأصلية كتبت بواسطة Most_H

كاشكل، الريو (رأى شخصى)
كا أنتشار الأكسنت
الاتنين تقريبا واحد، الفرق فى الأسم والشكل بس

فعلا انا بعشق شكل الريو تحس و كأنها ليها شخصيه شبابيه انسيابيه رشيقه
اما الاكسنت فمش بيعجبني شكلها من بره انما من جوه حلوه
ده بالنسبه للشكل

المشاركة الأصلية كتبت بواسطة kdosoki

انا معايا الريو ال 1600 اتوماتيك
عربية ممتازة
ومفيش مانع تبص على الصنى هى كمان بنفس السعر

انت بتسلمه للصني و اهل الصني و بتبعده عن الريو؟!!
مش مسأله ان الصني احسن من الريو بس في عوامل تانيه طبعا و ياريت تستفيض في المعلومات و تفيدنا لو عندك حاجه تقولها لينا يبقي كتر الف خيرك

المشاركة الأصلية كتبت بواسطة hamadafawzy

انا فعلا فكرت في الصني بس ناس قالولي ان فيه مشكله في ضفيره العربيه وبتحتاج تتغير ده غير استهلاكها العالي للبنزين
انا كنت بفكر في حاجه 1400 عشان استهلاك البنيزن عمتا مش بتفرق برضه ولا اللي فهموني فهموني غلط وشكرا يا جماعه بجدا ما كل ما مدي بتساعدوني اختار الصح

المشاركة الأصلية كتبت بواسطة sonasteel

مشكلة الضفيرة ديه كانت في الموديلات القديمة والشركة غيرتها من ساعتها (تقريبا من موديلات 2005)
واستهلاكها للبنزين عاااادي اوي زي اي عربية 1600 .... وممكن تسأل عليه (انا لسه بصراحة مش قادر احكم عليها قبل ال5000 كيلو) ان شاء الله
وطبعا لو عايز تجربها مفيش مشكلة .... ولو عايز تجرب الاتوماتيك ممكن اي حد من اعضاء نيسان يساعدوك
بصراحة كلهم متأخروش عني خالص ووالله (ا/امير) قالي لو عايز تيجي تجربها دلوقتي تعالي مفيش مشكلة
انا ان شاء الله لو هاخترلك تجيب عربية ................ ارشحلك الصني ABS EX
(اتوماتيك ولا مانويل) ديه بقي تصليلها استخارة وتشوف انت ميال لايه)
وانا تحت امرك في اي حاجة تعوزها .......... ان شاء الله

ههههه

مشكله الضفيره و من واقع تواجدي في المنتدي وقت ظهورها ظهرت في عربيتين او تلاته تقريبا سوبر صالون موديل 2007

و التوكيل تعامل مع المشكله دي بتغيير الضفيره علي حسابه و دون اي تحمل من الملاك و بواحده ياباني و ليست مصري كمان

و دي نقطه تحسب لصالح التوكيل جدا مقارنه بتوكيلات بتتهرب اصلا من تقديم خدمه عاديه لعملائها

و لعلمك كان في مشكله في دهان ظهرت في عربيه صني او سوبر صالون و كانت واحده بس لو الذاكره مش خايناني و تم التعامل مع الموضوع من طرف التوكيل و مالك العربيه اتعوض في الموضوع ده

انا بقول الكلام ده علشان اطمنك مش اقلقك
ازاي بقي؟!
دي الحالات اللي ظهر فيها مشاكل , و طبيعي ان ممكن يكون في مشاكل لاي عربيه بيتباع منها الاف لكن الغير طبيعي انك تلاقي توكيل بيحافظ علي رضاء عملائه
و دي نقطه مخلياني متمسك بالصني و بنيسان عموما لاني لمستها منهم قبل كده في مشكله عندي
و كنت مضايق و مخنوق منهم لدرجه كبيره و وصل بيا الحال اني فرغت يوم و قلت انا رايح اعاتب الناس هناك لاني كعميل مقصرتش في حاجه و كان في تقصير في مره من مرات الصيانه الدوريه
و رحت و قعدت و اتكلمت لقيت اللي مفضي نفسه و سايب شغله و قاعد يسمعلي و قصتي مكنتش 5 دقايق دي كانت كبيره
و لما خلصت الكلام كله ملقيتش تهرب ولا محاولات رمي الغلط عليا
بالعكس لقيت موقف مسئول و محترف
انا كعميل ليا كل الحقوق مع انهم الخصم و الحكم كتوكيل
و انا مش من هواه الزعيق و الصوت العالي بالعكس الكلام كله مع اني كنت محروق كان باسلوب عادي و مكنتش ساعتها مستني ارضاء ليا او اي حاجه انا كنت رايح اعاتب مكان وثقت فيه و خذلني

و رد الفعل بتاعهم خلاني مش بس ثقتي فيهم ترجع ده انا بقيت عميل مخلص ليهم بالذات السبع زهراء المعادي و بنصح اقرابي و اصحابي بشراء سيارات نيسان علشان يحظو بخدمه عملا و توكيل قمه في الاحترام

و بخصوص استهلاك البنزين فشوف المواضيع الخاصه بيه في القسم و قدر بنفسك هل استهلاك الصني يختلف عن اي عربيه 1600 ولا لأ و النتيجه هتصدمك
متوسط الاستهلاك جوه البلد للاوتوماتك 200 كيلو في الصفيحه طوالي ممكن يعمل اكتر من كده بكتر و وصلت معايا في بعض الاحيان ل 250 (+ or - 10) في الصفيحه

انا مش بقولك اشتري صني دي احسن عربيه لا
انا بوضح بس حاجات و من الحاجات اللي تحطها في اعتبارك ان مسافه الاقدام للركاب اللي ورا ضيقه لو انت بترجع الكرسي لورا و انت سايق او اللي راكب جنبك اللي قاعدين ورا مش هيكونو مستريحين فشوف دي نقطه تفرق معاك من عدمه

و طبعا المانيوال هو السواقه بجد و واحشني فعلا بس الزحمه بتفكرني بالنعمه اللي في ايدي فالحمد لله طبعا

و لو حابب تجرب العربيه انا تحت امرك انا معايا اوتوماتك 2007 الشكل القديم و مظنش ان حد من اخواتنا هنا معاه اوتوماتك الشكل الجديد هيبخل عليك بتجربه عربيته بس انت امر

و لو فكرت فطبعا هاتها بالabs بينفع و ليه اوقاته اكيد

و اي استفسار او حاجه اسئل علي طول و خد جوله في اقسام العربيات اللي بتفكر فيها و انزل شوفهم برضو في المعارض المختلفه و لو حبيت تجرب سواقتهم اتفضل اطلب