الموضوع: البنزين مرة كمان وكمان

الإخوة الأفاضل جميعا
السلام عليكم ورحمة الله وبركاته
كنت أود أن أعلق على بعض الموضوعات المثيرة فى المنتدى خلال الأيام الماضية خصوصا تلك التى تتعرض لمشكلة إستهلاك البنزين ولكن للأسف الشديد حالت الظروف دون ذلك لظروف بعضها صحية وبعضها أسرية..

المهم قمت بتجربة بسيطة بناء على نصيحة أحد الإخوة هنا وهى بخصوص تجربة بنزين 90 بدلا من بنزين 92 .. أنا أعلم فعلا أن الأخير أسرع إحتراقا وإستهلاكا من الأول وربما يزيد الإستهلاك لذلك ولكن يقابل ذلك ضعف فى الإداء إلى حد ما وربما برجلة الموتور مع بنزين 90 وده كان سبب رئيسى فى ترددى لتجربة بنزين 90..

منذ حوالى إسبوع قررت أن أخوض المخاطرة ولكن بطريقة أقل مجازفة بعد أن أستبد بى الغيظ من الفلوس اللى بدفعها فى البنزين.. أنا بدفع حوالى 500 جنيه شهريا.. طبعا خراب بيوت مستعجل.. المهم قبل ما التانك يخلص بشوية وتقريبا كان فيه 7-10 لتر على ما أعتقد قمت حطيت 20 لتر 90 وقلت أجرب وربنا يستر ويبقى الخليط حاجة كده بين 90 و 92 يعنى تقريبا 91 لو جاز حساب الأمر بهذا الشكل.. المهم رجعت من الشغل للبيت ومركز جدا مع العربية علشان لو سمعت أى صوت أو أى برجلة أو أى شئ غير طبيعى هاتوقف على طول وأفضى اللى فيها بأى طريقة وأرجع 92 زى ما كان .. المهم .. مشيت 40 كم ومفيش حاجة خالص ولا الهوا.. قلت أصبر لتانى يوم وأركز تانى .. برضه مفيش أى حاجة وكان عندى شبه شك إن السحب تحسن بنسبة طفيفة أوى بس برضه مش متأكد.. المهم كملت لحد ما التانك فضى ومفيش مشاكل خالص.. دخلت على البنزينة وتوكلت على الله وفولت بنزين 90.. وبعد كده مشيت إمبارح والنهارده حوالى 250 كم منهم حوالى 100 كم بمفردى و150 والعربية حمولة كاملة أنا وأربع اشخاص أخرين .. المفاجأة يا سادة يا كرام ... سحب العربية معايا وانا لوحدى كنت طاير على الأرض وجبت 160 كم/ساعة بمنتهى السهولة والعربية لسه فيها لو عايز أجيب 200 كم كمان.. والعربية ثبات رهيب على الأرض وماكنتش بقف إلا لما أنا خفت لأنى أصلا متعود على 90 - 100 بس برضه تعمدت امشى على سرعات عالية يعنى مشيت حوالى تقريبا نص المسافة اللى أنا مشيتها على سرعات من 120-160 .. والباقى على 80-90.. المفاجأة الأخرى إن سحب العربية لم يتأثر بتاتا بالحمولة .. يعنى العربية لا كانت بتنتع ولا بتسحف ولا بتسقف ولا أى حاجة خالص ولو كنت عايز أجرى بيها على 160 وهى كاملة الحمولة كنت هجرى بس طبعا يبقى إنتحار رسمى لإن القصور الذاتى هيبقى رهيب وأنا مضمنش الطريق ولا المخابيل اللى عليه ممكن يعملو إيه بس مشيت فترات بسيطة جدا على 120 بدون أى مشاكل .. المفاجأة الأخيرة وهى الأهم وخلوا بالكم منها كويس قوى قوى لإن ده بيأكد لى إن أجهزة الشركة فيها شئ مش مظبوط.. إيه هى المفاجأة .. أقول لحضراتكم.. كنت بلغت فى صيانة الألف والخمس ألاف على أن العربية لو سخنت منى سحبها بيقل وبتسقف على خفيف.. فى المرتين قالوا لى مفيش مشكلة فى الموتور ولا الكهرباء لأن الجهاز بيقول إن مفيش حاجة غير طبيعية.. طبعا هنا لا يمكن نلوم صنايعى أو مهندس لإن هو بيقول إللى بيطلع على الكمبيوتر.. المهم ساعات بيبقى فى كمائن لطيفة كده على الدائرى عند الأكاديمية كده علشان الحزام .. وبرضه ساعات الطريق بيقف علشان حادثة من إياهم بتوع مساطيل النقل وساعات بسبب سفلتة طريق السويس .. كنت كل ماقف الاقى العربية تسخن والمروحة تشتغل فتبرد وبعدين تسخن وتشتغل وهكذا ورا بعض دون توقف.. بعد ما أطلع من الزنقة دى ألاقى العربية بتسقف على خفيف والسحب أضعف كتير مع إنى لوحدى فى العربية وبالكتير زوجتى معايا.. أما بقى لو حصل الكلام ده ومعايا الآولاد كمان وهم على فكرة كلهم على بعض مايكملوش 130 كجم.. بلاقى السحب قل جدا والعربية لا تعود إلى سابق عهدها إلا أن تبرد تماما.. المهم يا سادة يا كرام.. مع بنزين 90 تعرضت لنفس الموقف والعربية فيها أربعة أنفار غيرى .. والسحب لم يتأثر والعربية لا سقفت ولا صفرت ولا غنت ظلموه.. ده معناه إيه؟؟ فى رأيى الضعيف .. مع إنى مش متخصص... إن ظبطة العربية الموجودة دلوقت وخصوصا الكهرباء وخلط البنزين بالهواء وتوقيت إشعال البوجيهات كله متظبط على بنزين 90 وليس 92.. علشان كده بقول الجهاز فيه حاجة مش مفهومة ومش مظبوطة علشان معرفش يشخص فى عربيتى أنا على الأقل إن البرنامج الموجود ده مظبط على 90 مثلا وليس 92.. أو ربما يكون فعلا غير معاير كما قلت سابقا والخطأ بين الواقع والمفترض فى الجهاز هو الفرق بين 90 و 92 وجاء الأمر مصادفة ليس إلا..

بالنسبة لإستهلاك البنزين لسه ماحسبتوش.. بس بالنسبة لى حتى لو فضل الإستهلاك كما هو ف بنزين 90 افضل على الأقل من ناحية السحب وعدم التسقيف.. فيه حاجة أخيرة مهمة جدا كنت هنسى اقول لكم عليها... صوت الموتور العالى .. بقى أهدأ بعض الشئ ولكن مازال صوته عالى فى سرعات معينة.. كنت قلت لكم قبل كده إنى هكتب موضوع مخصوص عن صوت الموتور وقمت ببعض التجارب البسيطة كده هتوضح ليه صوت الموتور عالى ,, لكن للأسف الشديد لم أتمكن من كتابة الموضوع حتى الأن بسبب ظروف صحية بالأساس ثم بعض الظروف الأسرية.. أوعدكم إنى هكتبه فى أقرب فرصه وبرضه هتلاقوا فيه بعض المفاجأت ..

ياريت ترجعوا هنا تانى بعد يوم ولا إثنين أقول لكم على معدل إستهلاك بنزين 90..

ملاحظة أخيرة ليس لها علاقة بالبنزين...
دى كانت أول مرة أركب 3 أشخاص ورا فى الكنبة وللأسف الشديد .. العربية هبطت جامد جدا مع العلم أن متوسط وزن الواحد فيهم 75 كجم ولأول مرة أحس إن أنا "مدلوق" على ورا ومش شايف قدامى.. والمطب الصناعى الوحيد اللى كان فى طريقى وكان فى التجمع الخامس فشلت السيارة بجدارة فى إجتيازه وحكت من تحت فيه ده غير أن الطوب والحاجات البسيطة اللى كانت العربية بتمشى عليها كنت بحس بيها جدا .. بجد أتعكننت واتنرفزت جدا .. أمال لو الشنطة مليانة ولا اللى ركبوا دول كانوا من الأوزان المصرية المعتادة على المحشى والكشرى والمكرونة كانت العربية حصل فيها إيه؟؟

فى أمان الله
السلام عليكم ورحمة الله وبركاته

إخلاء مسؤلية

أنا قمت بتجربة بنزين 90 على سيارتى ولا أضمن لأى شخص أن يحصل على نفس النتائج التى حصلت عليها إذا أستخدم بنزين 90 فى سيارته.. فأنا لست مسؤلا عن أى خلل يحدث فى سيارة شخص ما إذا قام بإستخدام بنزين 90 بناءا على مداخلتى هذه وليتحمل هو أى عواقب جراء إستخدامه لبنزين 90 دون تحميلى أى عتاب أو لوم أو مسؤلية