الموضوع: البنزين مرة كمان وكمان

المشاركة الأصلية كتبت بواسطة adel418

من خلال قرائتى لتجربة الأستاذ مصطفى قررت التجربة والسير على نهجة فكان الأتى
1- بالفعل احسست ان صوت الموتور اصبح اهدأ قليلا
2- سحب السيارة كان كما هو بلا تعديل
3- المىحظة الثالثة والأهم فى التجربة كانت كما قال الأستاذ محمد فى تجربتة ان السيارة لا تدور من اول مرة - انا حدث معى شىء جديد وهو لما قمت بتموين السيارة من جديد ببنزين 92 فؤجئت بأن السيارة توقفف محركها فأستغربت من الموقف فقمت بأدارتها من جديد وتوقفت فأدرتها للمرة الثالثة مع الضغط على دواسة البنزين فدارت بشكل جيد واستنتجت ان بنزين 90 بة رواسب ممكن تكون عاملا فى سد الرشاشات -
لذلك قررت الا امون بنزين 90 مرة ثانية

الأخ الفاضل عادل
شكرا لك على مشاركتك لنا تجربتك..
تجربتك وتجربة الأخ كوكى جون من قبل وتجربتى توضح إن كل سيارة بختك يابو بخيت.. يعنى مفيش طريقة ممنهجة وخطوات ثابتة يمكن إتباعها فى كل السيارات لتلافى عيب معين.. فانت وحظك بقى.. وعلشان كده أنا كتبت فى أول مداخلة لى فى هذا الموضوع إن أى حد عايز يجرب بنزين 90 فعليه أن يجربه على مسؤليته الشخصية.. معلومة أخيرة... كنت قرأت قبل كده على إحدى صفحات المنتدى إن بنزين 90 أنضف من بنزين 80 وبنزين 92 أنضف من الإثنين دى معلومة خاطئة تماما.. فممكن أوى إن بنزين 92 يكون أسوء من 80 و 90 لو فيه شوائب أو رواسب.. فالفرق بين الثلاثة أنواع يكمن فى رقم الأوكتين فقط وليسه له علاقة بالرواسب والشوائب..
وشكرا
والسلام عليكم

المشاركة الأصلية كتبت بواسطة ziabassem

أعتقد أن ضبط التاكيهات بيكون لأحد أو بعض أو كل الأسباب التالية :
1) ارتفاع صوت المحرك
2) أرتفاع حرارة المحرك
3) ارتفاع استهلاك البنزين

أرجو مراجعة دليل تشغيل السيارة (المانيوال) اللي بيجي مع العربية .. والإفادة إذا كان فيه حاجة بتتكلم عن ضبط التاكيهات من عدمه .

الثلاث أسباب موجودة عندى وبلغت عليها فى صيانة الألف فى مركز صيانة القطامية بس الكومبيوتر إبن الإيه قال كل شئ تمام وأنا اللى بيتهيألى.. والراجل الجهبذ بتاع ظبط الزوايا اللى جرب العربية معايا لما سألته على صوت الموتور اللى زاد خصوصا بعد الصيانة قال لى ده طبيعى جدا والصوت هيهدأ لوحده لإن السبب فى الشكمان لإن الشكمان فيه مادة معينة وهى السبب فى الصوت ده ومع الوقت المادة دى مش عارف هيحصل فيها إيه كده والصوت هيهدأ وكله يبقى تمام.. ليه حق يسرح بيا ماهو شايف قصاده طرشجى مش صاحب عربية دافع فيها دم قلبه.. لما رحت مركز إسكندرية الميكانيكى قال لى تفسير مقنع شوية وقال إن عمة الموتور صغيرة ولما تقرص عليه الصوت بيعلى وصوت المتسوبيشى عموما عالى... المهم كلامه فعلا فيه كثير من الصحة.. بس اللى ما يعرفهوش ميكانيكى إسكندرية ولا فنى ضبط الزوايا فى مركز القطامية إن صوت الموتور العالى يرجع بالأساس لوجود عيب تصميمى فى السيارة.. ليس فى المحرك نفسه ولكن فى أحد مكونات السيارة وهذا العيب يؤدى إلى ظهور ما يسمى بظاهرة الرنين التى تتسبب فى سماع صوت الموتور البشع اللى كلنا بنسمعه خصوصا عند 120 كم/ساعة.. هاكتب لكم الموضوع بالتفصيل الممل لما ألاقى وقت إن شاء الله تعالى.. وأى مهندس فى الشركة حتى لو فى خط الإنتاج والتجميع نفسه أو حتى من الشركة الأم فى الصين يجى ويتفضل وهاثبت له الموضوع ده عملى على أى سيارة إف ثرى سواء بتاعتى أو من الشركة أو أى عربية ماشية فى الشارع..
أخيرا أنا أتأكدت النهارده بعد ما فولت بنزين 90 لتانى مرة من إن موضوع ضبط التاكيهات ده ممكن جدا يكون سبب رئيسى فى أستهلاك البنزين.. عايزين تعرفوا إزاى .. المداخلة القادمة إن شاء الله تعالى..

المشاركة الأصلية كتبت بواسطة ziabassem

فيه نقطة عاوزين نفكر فيها بصوت عالي شوية .. وهي تحتمل الصواب أو الخطأ .

مش ممكن علشان لسه العربية معداش عليها 5 سنين أو ممشيتش كيلومترات كتيرة فمش حتبان مشكلة الحرارة دي بشكل كبير لأن كفاءة دورة التبريد لسه في عزها زي ما بيقولوا .. أقصد مش زي العربيات القديمة يعني (الردياتير لسه سالك - الكفاءة العالية لمنظومة التبريد - عدم وجود تسريب أو ترسيبات في منظومة التبريد بصفة عامة ..إلخ) .

وبالتالي مش حتبان مشكلة سخونة للعربية .. ومن خلال متابعتي معتقدتش أن في حد من ملاك العربية اشتكى من سخونة السيارة بشكل مش عادي .

وأنا اتفق مع حضرتك أن في أسباب أخرى قد تؤدي إلى زيادة استهلاك البنزين زي الرشاشات أو نوع أكثر كفاءة من البوجيهات أو ضبط خلوص سن البوجيهات (أرجو تصحيح المعلومة لو كانت خطأ).

بس مش حنخسر حاجة لو حد راح الصيانة في التوكيل أو مركز متخصص لضبط التاكيهات .. ونشوف النظام أيه .

الأخ الفاضل باسم
حقيقى أنا ممتن جدا لك ولمشاركتك الفعالة ومحاولة إيجاد تفسير منطقى لإستهلاك البنزين.. وإن شاء الله هنوصل له ..
على فكرة أنا أشتكيت وبلغت فى صيانة الألف بالذات إن العربية لما تقف شوية فى إشارة مثلا ولا الحاجة المروحة تفضل تشتغل وتفصل بدون توقف إلا أن أطلع على الطريق السريع واسير بسرعة وعندها تبدأ حرارة الموتور فى الإنخفاض نتيجة إستقبال العربية لتيار الهواء البارد المستمر.. وأفضل معدلات أداء السيارة تكون دائما فى أول اليوم عند بداية القيادة... أما فيما بعد وبعد أن تأخذ السيارة سخونتها المعتادة يقل الأداء بدرجة قليلة ويقل تماما لما أتزنق فى أشارة ولا حادثة ولا سفلتة طريق..
برضه أفكرك إن الكومبيوتر فى صيانة الألف وصيانة الخمس ألاف قال كله تمام .. الصراحة مقدرش ألوم فى دى لا مهندس ولا صنايعى بس أقدر ألومهم على على حاجة تانية مفكروش فيه خالص وهى ضبط التاكيهات اللى لازم تتظبط.. زى المانيوال ما بيقول.. وده تفصيله فى المداخلة القادمة..
والسلام عليكم

المشاركة الأصلية كتبت بواسطة ziabassem

ده لينك لمانيوال العربية .. مش عارف هو اللي موجود مع حضرتك ولا لآه
http://www.byd.com/downloads/user_ma...ser_manual.pdf

لما تفتح اللينك استنى شوية عقبال ما يحمل علشان هو ملف pdf

اللي يهمنا في كلامنا ده هو بداية من ص 176 .. وبالأخص أعتقد ص 181 (بند 4) ، وص 182 (بند 19 ، 20) .. اللي ذاكر فيهم عمل فحص على الكرنك ومدى ظبطته وكذلك فحص خلوص التاكيهات .

أنا على فكرة مش متخصص ولا مهندس ميكانيكا .. بس الموضوع ده قتل بحثاً في أحد المنتديات مع زملاء أفاضل متخصصين أكثر مني .. وحبيت أنقل المعلومة التي خلصنا إليها في ضرورة ضبط التاكيهات للمساعدة في انخفاض صوت الموتور بالإضافة طبعاً لانخفاض استهلاك البنزين .

الأخ الفاضل باسم
السلام عليكم
عندك حق تماما.. فالبند 20 بيقول لازم ضبط تاكيهات بعد أول ثلاث ألاف كم.. وطبعا عارفين إنه ممكن نحتاج ضبط التاكيهات
لما يكون هناك سبب زى صوت عالى أو سخونة أو ضعف سحب أو زيادة إستهلاك بنزين.. إلخ
المشكلة فى سيارتى بخصوص إستهلاك البنزين قد تكمن بشكل أساسى فى ضبط التاكيهات وذلك بعد تجربتى بنزين 90 من ناحية وبعد ما فولت بنزين 90 تانى النهارده..

النهارده حسبت معدل إستهلاك البنزين لقيته 220 كم /الصفيحة.. يعنى رجعنا زى الأول تقريبا .. الشئ الوحيد اللى إتغير المرة دى هى السرعة المنتظمة اللى مشيت بيها فى الفترة اللى فاتت.. وهى 90-100 كم/ساعة مع إنى لما كنت ماشى 120-160 الإستهلاك كان أقل والسحب أفضل كمان ..طيب حد يعرف ليه؟؟

أقول لكم معلومة بسيطة بخصوص حركة كده كان بيعملها لى الميكانيكى اللى بتعامل معاه بخصوص سيارتى القديمة.. وأرجو من الإخوة ذوى الخبرة يفيدونا فى الموضوع بس الموضوع ده مجرب على سيارتى القديمة.. الراجل الميكانيكى عارف كويس المشاوير اللى بمشيها وكنت باشتكى من إستهلاك البنزين شوية .. فقال لى أنا هافتح لك التاكيهات سنة بسيطة أوى .. وبرضه ظبط الكهرباء بطريقة معينة وقال لى التظبيط ده ينفع معاك قوى على السرعات العالية (بالنسبة للعربية القديمة طبعا) ومش هياكل معاك بنزين والعربية هيبقى سحبها حلو كمان.. بس فى السرعات المنخفضة والإشارات والكلام ده هتحرق معاك جامد ومش هتبقى إقتصادية خالص.. المهم إن العربية فعلا مظبوطة بالشكل ده لغاية دلوقت وبتعمل على الأقل 240 كم وكتير 260 فى الصفيحة مع إن السيارة موديل 1985 ونظام كاربراتير مش حقن إلكترونى

لو ربطنا ملاحظة الأخ باسم بخصوص ضبط التاكيهات فى الكتالوج مع ملاحظة إن العربية ماشية افضل مع بنزين 90 من بنزين 92 مع ملاحظة إن الإستهلاك بيزيد فى السرعات الأقل ويعتدل فى السرعات العالية نسنتنج من كده إن التاكيهات فى العربية عندى مفتوحة وعايزة ضبط.... صح ولا إيه.؟؟؟

ياريت أعرف رأيكم وياريت لو حد عنده خبرة يفيدنا بدل ما الواحد عمال يعك كده..

والسلام عليكم