الموضوع: كنت أملك 504 (مرفق بالصور )

والله يا باشا انا كمان غيرت من 90 الى 80
و على فكرة ال 504 اصلا المفروض يتحطلها 80 لان الضغط بتاعها فى البساتم 7.5:1
( و ال 90 بينحط للمواتير اللى ضغطها 9:1 و ال80 بينحط للمواتير اللى ضغطها 8:1 يعنى بالبلدى كده العربية دى لو عندك حاجة اقل من ال 80 ممكن تحطها)

اولا عيوب ظبط (ليست اعطال):
فاكيد العربية بتاعتك كان الحرق فيها متظبط على 90 . ومادمت غيرت ل80 اكيد لازم تراجع تظبيط الكهرباء(ماهى مش لازم تكون كهربتها زايدة بردك العربية ممكن تكون ماخرة كهرباء)
و بعدين مش شرط ان طالما صوت الموتور واطى يكون ده معناه ان الكهرباء مظبوطة!!! ممكن تكون التاكيهات هى اللى مديالك الشعور المزيف ده.

عيد ظبط التاكيهات (فى هذا الموديل يستحسن تكون التاكيهات مبوشه، فيها مساحة زيادة شوية تقوم صوت الموتور يكون عالى حبه و تسمع تكتة التاكيهات فى السلانسيه) ماهو ممكن صوت العربية يكون واطى عشان الباشا مديقلك ظبط التاكيهات عاشان الصوت يكون انعم ( والنتيجة الموتور يبقى مخنوق و صوته اوطى بس يسخن اسرع و ياكل بنزين اكتر)

والاهم من ده الهوا والبنزين اللى داخلين للكربراتير لان ممكن يكون الدخول غير منتظم و ساعتها تلاقى الاهتزاز بتاع العربية فى السلانسيه بيزيد شوية و يقل شوية. و ده معناه ان الموتور حرقه مش منتظم فالهوا بتاع الكربراتير عايز زبط.

وممكن تلاحظ ان رائحة العادم اللى طالع من الشكمان مختلفة اليومين دول، ركز كده ممكن تحس ان دى مش ريحة بنزين دى ريحة حاجة بتنحرق و كان والعياز بالله العربية فيها حاجة ولعت.
اذا قدرت تميز الرائحة دى فاماتتخضش، الميكانيكى اللى بتصلح عنده لو شاطر اول ما يقف جنب العربية و هى دايرة و يشم الريحة دى يقول " العربية دى حريقها نى"
ياعنى مابتحرقش البنزين كويس و طبعا تاكل بنزين

الكام حاجة اللى قلتهم دول ( ظبط كهرباء، ظبط تاكيهات، ظبط رتم دخول الهوا و النزين الى الكربراتير) مش اى ميكانيكى يعرف يظبطهم. و برغم انها حجات هايفه اوى لكن بتفرق اوى فى اداء العربية و السحب و استهلاك البنزين. و خد بالك دى مش اعطال دا ظبط عشان كده لازم يكون واحد متخصص بيجو

ثانيا الاعطال بقى:
1-الكربراتير حالته تعبانه و مهما عملت فيه و ظبطته تجد العيب يرجع تانى او المحرك ينتظم فترة و بعدين يرجع يتبركل تانى ( كده بالسلامة الكربراتير. يائما بقى تفكه و تخده عند واحد بناع كربراتير)

2- الشكمان ممكن يكون مخروم يبرجلك الربية. و دى سهلة تعرفها. هتلاقى صوته مكتوم. و ازا ما عرفتش، دور العربية و سخنها و بعد كده سيبها فى السلانسيه و انزل و سد الشكمان بايدك( سده بكف ايدك تماما ماتخافش. لو العربية طفت يبقى مافيش خرم. لو العربية ماطفتش يبقى فيه خرم و حتلاحظ ان فيه صوت هوا طالع من حته انتا مش عارفها. تروح لواد بتاع شكمان يلحمهولك او بيغير علبة الشكمان اللى فيها المشكلة لة تعبانة خالص

توضيح الفروق فى الدركسيون بالصور

يا باشا انتا بتقول فيا شعر و بتدينى اكتر من حقى. والله انت اللى كلك زوق
بس احب احكيلك حكايتى الاول
اعرفك انى معايا بيجو من حوالى سنة ونصف، هى اصلا بتاعة الوالد من حوالى 20 سنة
و بعد ما اتعلمت القيادة ( و ده كان فى مكتب تعليم على 128) و امضيت حوالى سنة اخدت فيهم بتاع 4 كورسات تعليم قيادة.
و من الاشياء اللى منساهاش اننى كنت كل كا اخرج مع المدرب بال128 كانت الناس تقعد تكسر عليا و تزنقنى و حركات كدا مش اللى هيا. و يتكرر الموضوع ده فى كل مرة اخرج للتدريب يحصل معايا الموضوع ده بتاع 5 مرات خلال الساعة.

و فى النهاية قررت انى اخد كورس على العربية البيجو ( عشان اصقل مهاراتى على العربية اللى هاسوقها)
رحت الجراج و السايس طلع العربية. قلت له "تعالى وصلنى لغاية المكتب ده قريب. اصل انا عمرى ما سقت العربية دى"
قال " معلش يا بيه اصلى لوحدى انهارده مش هاقدر اسيب الجراج. سمى انتا و اطلع و ربنا يستر"
قلتله " كده يا رجب، بقى اول مرة اركب فيها البتاعة دى و كمان ابقى لوحدى"

ركبت العربية و فرق المساحة و الدركسيون و البدالات و الفتيس.....و العربية كبييييييرة....
حاجة رعب!!!!!
وكان الجراج فى شارع جانبى. و تقدمت بهدوء لاطل ببوز عربيتى على الشارع الرئيسى (شارع طومان باى) و حدث شىء كانت اول مرة اشوفه فى حياتى، فاول ما بوز عربيتى بدا يظهر من الشارع الجانبى، تجمدت كل العربيات ووقفت و لقيت الناس بتبصلى و علامات الترقب على وشها... و مستنينى اعدىىىىى... اللى كانو طول النهار يزنقوا عليا ولا كانى موجود اصلا انهاردة مستنينى لما انا اللى اعدى و اخرج فى الشارع الاول و بعد كده يبقوا يكملوا مشى....
و قلت لنفسى " يا حلاوة، دى العربية دى واضح انها مخيفة بالنسبالهم.... واضح انى حاحب العربية دى و هاكون سايق و انا اعصابى مرتاحة لان مافيش حد هايجرؤ يهزر معايا"
وقد كان. و فضلت سايقها شهور و بعدين رحت امتحن قيادة فى مرور الاميرية ( امتحانهم صعب) حرف s و ركنة بظهرك مابين اربعة اقماع و بجانب الرصيف، و لازم تجيبها بضهرك و من اول مرة
(يعنى لو حاولت تعدل وضع عربيتك عشان تعرف تجيبها بيسقطك، لازم من اول لقطة و بضهرك تركن بحركة واحدة. و طبعا لو لمست اى حاجة بتسقط)

و لقيت ناس بتمتحن بعربيات صغيرة و بتسقط. و اذكر ان كان فى واحد امتحن ب 128 وكانت الدنيا براااااح بالنسبة له. واحد بس اللى جه بعربية كبيرة و كانت شاهين.
و دخلت الامتحان بال504 برنس الليالى،منظر غرييب و تاريخى. و جيت عند الركنة اللى كانت على اد العربية بالظبط و ركنت فى حركة واحدة (بس كانت داخلة ايييه، شحط) و طلعت و فل و اخر حلاوة
و عملوها الوحوش... بس المرة دى كنت معاهم.

المشاركة الأصلية كتبت بواسطة ASD peugeot

اذيك يا دكتور
حضرتك كلامك كله مظبوط انا كنت عاوز اعمل اقتباس لبعض الجمل للتوضيح بس تقريبا كلامك كلع عاوز اقتباس انت كشفت علي العربيه من غير ما تشوفها عرفت المعلومات دي ازاي
المهم
حضرتك فعلا العربيه بتسخن اعلي من النص و ممكن توصل للون الاحمر فبركن علي جنب شويه و بزودها شويه ميه العربيه مش بتقص ميه كتير بس بتبقي مولعه مش عارف هتبرد ازاي
كلام صح لان المفروض دي مش اعطال الموضوع عدم ظبط فعلا
اختصارا للكلام
الاسئله جاوب بأستفاضه(بهزر معاك يا دكتور)
1\كهربه العربيه دلوقتي هاديه جدا ايه الوضع الصح ليها تعلي شويه ولاا توطي زي ما هيه
2\التكاهات العربيه فعلا صوتها ناعم بس مش عارف السبب ايه و فعلا فيه اهتزاز من الموتور للعربيه عندي السلانسيه و هي العربيه و اقفه و العربيه بتسخن زي ما حضرتك بتقول بسبب التاكيهات طيب ايه الحل بالظبط نعلي التاكيهات شويه (مبوشه) يعني ايه و بعد الظبط السخونيه هتروح لانها مشكله جامده عندي اوي
3\يعني ايه الهو بتاع الكربراتير عاوز زبط هو ده ممكن السبب في الاستهلاك العالي مع العلم ان دلوقتي المشي بالعربيه طريقه السواقه يعني هاديه مفيش حرق علي اي غيار
علي فكره انا استفدت كتير من حضرتك و كلامي كله للتوضيح اكثر للي يهمه الموضوع
جزاك الله كل خير

شوف يا سيدى انا مش ميكانيكى، لكن اللى بقولهولك ده عرفته من خلال الاعطال اللى عدت عليا فى ال 504 و لانى احتكيت ببعض الناس يعتبروا خبراء فى البيجو. لهذا هاتلاقينى عندى فكرة كويسة عن الاعطال بس مش كل الاعطال هتلاقينى عارفها بالتفصيل. يعنى ممكن اعطال تجدنى باقول لك على راءس الموضوع عشان انتا تتكلم فيه مع الميكانيكى بتاعك فا ينتبهله و يراجعه فى العربية. و فى اعطال هتلاقينى عارفها بالتفصيل.

فمثلا موضوع الكهربا ده ماعنديش عنه تفاصيل اول و كل اللى اقدر اقولهولك ان العربية لو ماخرة كهربا فده مش كويس فى الحرق. اما لز كهربتها زيادة فده مش مناسب لل80 و ده الميكانيكى هو اللى يقدر يحكم عليه مش انا. ( و اظن انه ممكن يظبط الموضوع ده من خلال الاسبراتير)

اما موضوع التاكيهات، فدهه غالبا التاكيهات عندك محتاجة ظبط. شوف يا سيدى
الواد بيفك وش التاكيهات ( اللى البوجيهات بتكون راكبه فيه) و لما يفكه هتجد حكات كده زى مواسير حديد صغيرة و فيها حاجة كده زى الشلن ( او العشرة صاغ) راكبين فوق بعض و فى مجموعات. مهمة الراجل انه يظبط المسافة اللى مابين القطع دى ( مابين كل شلن و التانى داخل كل مجموعة) عندك ستجد ان المسافة دى تكاد تكون غير موجودة ف الراجل هايفك و يبداء بظبط المسافة بمفتاح كده ( شبه السكينة او المطواة و فيه منه بتاع 5 احجام و تخانات) يدخله بين كل شلن و التانى عشان يقيس بيه المسافة و يوسع و يديق براحته. و المفروض انه هايوسع المسافة فى العموم شوية.
و بعد ما يقوم بالعملية دى حاتجد ان صوت الموتور على و بقى بيتكتك شوية فى السلانسيه ( فيه شبه من صوت العربيات النصف نقل)و ده بردك يعتبر خطوة تانية لها علاقة بظبط الكهرباء لان التاكيهات دى على علاقة بالبوجيهات.

اما موضوع الهواء و البنزين اللى داخلين ال كربراتير ففيه مسمار فى الكربراتير لما بتفتحه او بتقفله بيتحكم فى دخول الهواء الى الكربراتير و بلعبة و تريكة صغيرة جدا لهذا المسمار ممكن العربية تطفى او تبرجل او رتمها يزيد او يقل. و على الميكانيكى انه يضل يحرك المسمار و يستمع الى صوت الموتور لغاية ما يظبطه ( و يستحسن انه مايوطيش رتم العربية اوى... صحيح ده بيوفر بنزين لكن لو الرتم واطى اوى ممكن العربية تطفى منك)
و لهذا قلت لك فى السابق ان الظبط عايز واحد محترف يظبطلك الهوا بحيس تكون واطية فى السلانسيه بس كويسه مظبوطة ماتطفيش.

اسالة سريعة:
غيرت الزيت اخر مرة امتا؟ و بتقلب الزيت كل اد ايه؟ و بتستعمل انهى نوع؟
تعرف تقيس الزيت؟ و بتقيسه امتى؟ و ازاى؟ و العربية دايرة ولا مطفية؟
تعرف ان ده ممكن يكون سبب من اسباب السخونة.....

اخبار الردياتير و دورة المية ايه؟ غسلته؟ طب سلكته؟ هو نحاس ولا الامونية؟ هو الاصلى ولا غيرتوه؟ الغطاء بتاع الرادياتير قديم؟؟
تعرف ان ده ممكن يكون سبب السخونة...

اخبار المية اللى بتحطها ايه؟ و امتا بتحطها و ازاى؟ و هل بتحط مية عادية ولا مياه خضراء؟
و نوعها ايه؟

تعرف ان ده فى الغالب بيكون له دور كبير فى السخونة

والله ياعم ال504 دي عربية حكاية وانا معايا بقالها 5 سنين واحد صاحبي لسه بيعها وندمان علشان جاب جديد بيقولي مش مريحاني زي ال 504 اتمني ان السوق بتاعها يفضل شغااال علي طول وعلي فكرة لونزل منها زيرو زي الهند مابتعمل دلوقتي حتبقا تحفة فعلا واللي معاه 504 والله يراعها حتفضل طول عمرها تديله واللي بيقول ال504 مش بتتروش يبقا غلطان ده شغل فوتوشوب

المشاركة الأصلية كتبت بواسطة eltayar

والله ياعم ال504 دي عربية حكاية وانا معايا بقالها 5 سنين واحد صاحبي لسه بيعها وندمان علشان جاب جديد بيقولي مش مريحاني زي ال 504 اتمني ان السوق بتاعها يفضل شغااال علي طول وعلي فكرة لونزل منها زيرو زي الهند مابتعمل دلوقتي حتبقا تحفة فعلا واللي معاه 504 والله يراعها حتفضل طول عمرها تديله واللي بيقول ال504 مش بتتروش يبقا غلطان ده شغل فوتوشوب

لا مين قال الكلام ده اكيد بتتروش. بس العربية دى محتاجه خط انتاج ينتج قطع غيار نظيفة و بسعر و جودة مناسبة. يعنى انا لو عربيتى فيها باور و تكيف ماسبهاش ابدا

لو قدرت اعمل تعديلات تجعل استخدام الفتيس و الدبرياج مريح اكتر... اسيبها ليه
لو كان ممكن افوقها بموتور جديد لانج مصنوع لل504 و بسعر معقول.. استغنى عن الطيارة دى ليه
لو كان ممكن اصلح عيوب الاهتزاز الموجودة فيها و تمشى بدون ما تترجرج طول الوقت... ابيعها ليه

يا جماعة ال 504 كانت فى وقت من الاوقات السيارة الحلم
لكن للاسف اصبح اقتنائها الان مكلف جدا بالقياس لامكانياتها
( بنزين غالى و قطع غيار تعبانه و الاصلى مش موجود و الاستيراد مضروب و التقليد بايظ..... و كله غالى )