الموضوع: دماغي وقفت !! ممكن دة يكون ليع علاقة بالتفجيرات الارهابية ؟؟؟!!!!

المشاركة الأصلية كتبت بواسطة fadod

حاضر يا أمير ..أنا هحاول أهدا .ومتشكر على كلامك ..يعني إنت متابع المواضيع وشايف ومن غير قصد فتح مواضيع والله..لما اتفتح موضوع المعايده على المسيحيين والناس قالت لايجوز إن مسلم يعيد على مسيحي والموضوع في الأخر إتقفل كل المسيحيين وأنا كنت واحد منهم دخلنا ..قرأنا وقلنا شكرا ..طالما انتو لقيتو إنه حرام خلاص .وبصراحه لما الاحداث ديه حصلت لقيت إن توقيعي مش فارق كتير البلد بتتغير وتفكير الناس بيتغير هو كمان

شكرا ليك انت و لكل مسيحي و مسلم مصريين شايفيين بعنيهم المخططات الشرسه الجديه في محاولات اثاره الفتنه و الانقسام

اللي زعلني من الموضوع بتاع المعايده ان ما اسهل علي الكلاب اللي بيخططو لتدمير البلد من انتهاز الفرص دي و اثاره روح الفتنه و الخلاف

ماهو الخلاف موجود من زمان و معروف للجميع و الكل عايش جنب التاني و المعامله بكل ود و احترام

يبقي لمصلحه مين بس اثاره الفتنه

للاسف لسه واحد زميلي بيسئلني امبارح بالليل قبل ما اروح تلخص 2010 في كلمات و تقول ايه

كان ردي ان فيها احزانها و افراحها لكن صعب اوصفها بكلمه واحده

لكن كنت بتمني ان 2011 تكون احسن

و لما سمعت الخبر اتصدمت تماما

هل دي فاتحه سنه 2011 بالنسبه لمصر؟

هنبدء السنه باعتدائات و تفجيرات و انقسامات و فتنه بين عنصري الامه المصريه؟!!

بدل ما نخطط و ننفذ مشروعات قوميه و تحسين الخدمات للمواطن المصري و النهوض التام و الشامل للبلد هنقع في حفره الانقسام و الطائفيه؟!!

للاسف الحادثه دي مضطر بعين العقل اقول انها ممكن يكون ليها اثر ايجابي واحد علي قدر ما هي مدمره و سيئه جدا لمصر

اثرها الايجابي الوحيد انها فتحت (و بصفه شديده الوضوح و الشفافيه) و من غير اي مجال للتذويق الدبلوماسي او السياسي

فتحت شباك كبير في حائط مصمت بين المسلمين و المسيحيين يقدرو يطلعو منه علي مكنون صدور كل طرف منهم

و ادي بنفسك شايف في بعض الاعضاء اللي كانو علي خلاف بالنسبه لموضوع المعايده اهم موجودين و بيستنكرو اللي حصل تماما و بيبرؤا بالاسلام عن افعال زي دي

يبقي فعلا ممكن نكون مختلفين في الدين و الفكر

لكننا متفقين علي التحضر و الرقي و نبذ العنف و القتل و ترويع الامنين

يا فادي مش المنتدي هنا بس ده النت كلها مليانه استهجان و استنكار للحادثه الخسيسه دي و من مصريين مسلمين مش مسيحيين

للاسف انا بقول اني شايف ان ده اثر ايجابي للحادثه دي

و المفروض اني مفكرش كده لكن ده اللي جه علي بالي فعلا اوقات الشده بتبين جوهرنا الحقيقي

احنا كلنا جسم واحد و الاطماع و الكراهيه و الاهداف الخارجيه واضحه تماما في العمل الارهابي ده

انا مشاركتش في موضوع العزاء للاخوه المسيحيين

و مش هشارك لحد ما يبقي اسم الموضوع عزاء واجب للمصريين

انا كمان طالني الاذي و الالم كمصري و محدش عزاني

دي بلدنا اللي عايشين فيها و حادثه زي دي ممكن لو تفاقم تأثيرها تفتح المجال لنزاعات و اضطرابات داخليه

و الضحايا ساعتها مش هيكونو بالعشرات ده البلد كلها و اهلها هيكونو ضحايا

محدش عايز يخسر اهله او مراته او اولاده في لمحه عين و بالاسلوب ده و بلا ذنب اقترفوه

انا عايز الاعضاء و الناس كلها يفكرو كويس قوي في الحادثه دي من جواهم

هل يرضو باللي حصل ده او هيفرحو بيه لو كان الهدف جامع بدل كنيسه و في وقت احتفال ديني كمان ؟!!!

مفيش عندي للي عمل كده و الناس اللي وراه غير حاجه واحده لمستها و انا في فتره التجنيد

احنا قد الحرب لو انتو رجاله و بتحاربو فعلا فاحنا قادرين بأذن الله علي اي حد يجرؤ علي مساس شبر واحد من ارض مصر
و جنود مصر قال عنهم الرسول (صلي الله عليه و سلم) : إذا فتح الله عليكم مصر بعدي، فاتخذوا فيها جنداً كثيفاً، فذلك الجند خير أجناد الأرض" قال أبو بكر: ولم ذاك يا رسول الله؟ قال: " إنهم في رباط إلى يوم القيامة. و ده حديث شريف عن الرسول (صلي الله عليه و سلم)

انا حبيت استشهد بيه لسبب انه ذكر جنود مصر و لم يخص مسلم علي مسيحي

يعني احنا فعلا كمصريين لينا خواص معينه من البساله و الرجوله الحقيقيه اللي فعلا بتظهر اوقات الحرب

و احنا فعلا في حاله حرب متخفيه و العدو الصهيوني مش بينام عن الموضوع ده للحظه و موضوع احكام السيطره علي منابع النيل مش تهريج

البهوات بيخططو يموتونا من العطش لو حكم الامر و ساعتها مش هيفرقو بيننا كمصريين مين مسيحي و مين مسلم

هما بس بيستخدمو مسيحي و مسلم لغرض في نفسهم و لما ينتهي الغرض ده و يتحقق هنكون ساعتها مجرد مصريين مطلوب القضاء علينا و احتلالنا

و المطلوب اننا نضيع عليهم الفرص القذره دي قدر الامكان و مش ننجرف ورا مخططات في منتهي الحقاره و الوضاعه و القذاره و مش بتفرق مسيحي عن مسلم لأن كوننا مصريين هو اللي مخلينا هدف

المشاركة الأصلية كتبت بواسطة fadod

أنا بحب مصر أوي وعلشان كده كان توقيعي اللي قبله هو فخري بحمل جنسيتين أولهم المصرية وأنا حاطتها في الاول علشان كده ..يعني ولا أقباط مهجر ولا كلام فارغ ..ذي مالناس عماله تفتي وخلاص . بص حتى التعليقات اللي قبلك وشوف أد إيه الناس مش مستحمله واحد متغرب... بعيد عن البلد حزين ..بيحب دينه ذي أو مصري مسيحي أو مسلم ..لما يعيد على ناس في ليله عيد يلقيهم بيصرخوا على التلفون

كلنا بنحب البلد حتي و ان كنا مضايقين منها في حاجات لكن دي بلدنا و بنعتب عليها لكن بنحبها

و موضوع اقباط المهجر ده موضوع معقد و شائك لانه برضو ذريعه لشحن الخلاف و الفتنه, لكن انت مثل حي و صريح ان مش كل مسيحي هاجر يبقي كخه و عيب و اوعي تنسي انك واجهه مشرفه لكل مسيحي في الخارج

و حاول تسامح و تلتمس العذر و حط في الاعتبار الناس اللي واقفين معاك زي ما انت حاطط الناس اللي مختلفين معاك برضو, الحكمه و العقل يحتمو كده عليك

المشاركة الأصلية كتبت بواسطة fadod

حط نفسك مكاني....وكل واحد هنا علق يحط نفسه مكاني ..و إنت في غربتك و بعيد عن أهلك ...تاني عيد بالمنظر داه ...وقولو لي أعمل إيه

ربنا ما يكتب علي حد انه يكون مكانك
انا حضرت في طفولتي عمل ارهابي مماثل و مش هتقدر شويه حروف تعبر عن موضوع زي ده الله يعينك و يعيننا علي اللي حصل و المستخبي

المشاركة الأصلية كتبت بواسطة fadod

أنا هشيل التوقيع ...ومستني ردكم

مش مسأله التوقيع و الله يا فادي ابدا

المشكله فعلا في الفكر و الرأي اللي وراه

مانت ممكن تكتب اللي عايزه في التوقيع الاهم اللي جوه نفسك و ده للاسف الماده الخصبه الثريه للكلاب اللي عايزين البلد تولع