ذكريــــات أول يــوم شـــــغل ..... احكولى تجاربكو

**Dr_Mido** · 29-03-2008 07:09 PM

نصيحه شخصيه
متحاوليش لبسك يبقى اوفر قوى دة شغل يعنى محتاج لبس متناسب مع الشغل لانى للاسف بشوف ناس اول يوم رايحه فرح مش شغل ودة بيتاخد عليها و الميكب كمان
طبعا انا مش من حقى ااقلك كدة بس بجد الكلام دة بيفرق جامد فى الحكم المبدئى على الشخص واللى بيتغير بس بصعوبه

**ramyfawzy** · 30-03-2008 07:29 AM

اهم حاجة يا اونا انك تاخدي الامور ببساطة ومتخافيش بالعكس لازم تجمدي قلبك
في الاول هتحسي برهبة ومكان جديد وناس جديدة ومعاملة مختلفة
بس ان شاء الله هتتعودي
من 5 سنين اشتغلت في مدينة الانتاج الاعلامي واول يوم رحت فيه المدينة في 6 اكتوبر وقفت قدام المدخل وقلت لا ياعم انا مروح ده مشوار رهيب
وبعدين قلت ده انا وصلت وعيب قوي اني مادخلش ولازم اكمل
ودخلت المكان وطبعا شفت ناس واجهزة غريبة اول مرة اشوفها بس جمدت قلبي واشتغلت واتعودت بمرور الوقت على المشوار والشغل والمشاكل وكل الحاجات اللى بقابلها كل يوم
الخلاصة : جمدي قلبك (واشربي ماونتن ديو)
وتوكلي على الله

رامي (ابو احمد)

**Noha.M** · 30-03-2008 09:08 AM

انا براسلكم من موقعي هذا من المكتب

لسه الناس مجتش اوى و انا نازلة مع بتوع اللبن عشان خفت تروح عليه نومة لو نمت تانى

ملبستش اوفر اوى زى ما نصحتوني و قابلنى مهندس واحد من ال departmemt بتاعى و و هو لحد دلوقتى

شخصية محترمة

سنوافيكم بباقي الاخبار فى ساعات قليلة

**Chicco** · 30-03-2008 09:11 AM

بالتوفيق يا نهى إن شاء الله

**hamdy** · 30-03-2008 09:44 AM

المشاركة الأصلية كتبت بواسطة onna

دة انا مش خايفة .. انا مرعوبة والله ..

انا مشكلتى عامة حتى وقت الدراسة انى بحب اعمل الحاجة ببطء جدا و مظبووووطة جداااا .. خايفة

ياخدو عني انطباع بالغباء او التكاسل.. بجد مخى عمال يودي و يجيب فى مليوون حاجة

هل مطلوب منك و انت لسه داخل على شركة متعرفش ايه نظامها انك تبقي فاهم و قاري عنها و عن نشاطها من قبل ما اروحهاا؟

بصي يا سيتي لو انتي في شركة بترول نشاطها الاساسي الانتاج اكيد بيدوكي دورة تعرفي فيها نظام الشركة الاول وو ضعها الاقتصادي
وعمتا ربنا معاكي وربنا مع كل السباب و يشتغلو زي ما انا و انتم اشتغلنا
وشكلك كده هتبقي يا في ادارة المشروعات يا ادارة الاستكشاف وسلميلي علي البريمة :D

**Noha.M** · 30-03-2008 09:47 AM

المشاركة الأصلية كتبت بواسطة hamdy

بصي يا سيتي لو انتي في شركة بترول نشاطها الاساسي الانتاج اكيد بيدوكي دورة تعرفي فيها نظام الشركة الاول وو ضعها الاقتصادي
وعمتا ربنا معاكي وربنا مع كل السباب و يشتغلو زي ما انا و انتم اشتغلنا
وشكلك كده هتبقي يا في ادارة المشروعات يا ادارة الاستكشاف وسلميلي علي البريمة :D

لسه مديري ماجاش اصلا و انا قاعدة بشرب شاى و الناس عمالة تبرقلى مش عارفة ليه !!!:D

لسه مقابلتش حتى حد يقولى هعمل ايه او وضعى ايه

و ادىىى اااعدة:p:p

**hamdy** · 30-03-2008 10:06 AM

غالبا طالما شركتك في المعادي يا نهي يبقا صدقيني مش هتعملي حاجة لان تلات اربع الشركات العدد في اللمون للاسف

**Ayman_Abdullah** · 30-03-2008 10:23 AM

أحذرى من المديرات الستات
هيطلعوا عينك
انا اى شركة أشتغلت فيها لازم بتكون العلاقة بيت المديرة و الموظفة علاقة tom &jerry
:D

**TaoTao** · 31-03-2008 12:51 AM

طيب بما إن لسة مافيش تكليف بأعمال ، وبما إن السادة الزملاء قالوا كل النصائح، أحب احكيلكوا عن أول اختبار عملي في الشغل من 5 سنوات بالظبط
المديرة (واحدة ست بس أفضل من كل من تعاملت معهم من المديرين الرجال) قالتلي سيادة اللوا فلان جهازه جديد ومطلوب ينزله سيستم جديد (طبعاً قالتلي سيستم بدل ويندوز من قبيل الحفلطة العلمية) هاتعرف؟
بصيت بكبرياء وقلتلها "طبعاً"، قالتلي إنه محتاج برامج كذا وكذا وإن طبيعة شغلة مش عارف ايه (وكان شغال ويندوز 98 وهانعمل ترقية لـ ويندوز 2000)
المهم نزلت السيستم، والبرامج المطلوبة زي ال Office ومن باب الاحتياط Acrobat Reader والموضوع ما أخدش وقت وقلتلها كله تمام.
تاني يوم السيد العضو المنتدب بعت يطلبني على وجه السرعة (طبعاً ماكنتش متوقع نيشان على تنزيل ويندوز بيتعمل في أي كشك)، وبرجلة في الإدارة والناس ماشية تقول "المهندس الجديد بينزل الويندوز ناقص" !!!!! :)
المهم المديرة سألتني (بشيء من خيبة الأمل لأنها ماكنتش متوقعة فشل ذريع في موضوع تافه زي ده) انت عملت ايه يخصوص مكنة فلان بيه؟ قلتلها نزلت الويندوز 2000 والبرامج اللازمة. قالتلي: "انت نزلته ناقص؟" قلت: "يعني ايه ناقص؟ خدت منه حتة؟ ع العموم أنا استعملت النسخة المرخصة الخاصة بالشركة ولو فيه مشكلة في ال Installation تبقى في النسخة مش انا اللي عاملها" قالتلي: ع العموم انزل للعضو المنتدب وشوف المشكلة اللي حصلت.
نزلت للسيد العضو المندب والراجل بصلي (وهو راجل خبرة يعرف الناس من بصة وكان أول لقاء بيني وبينه) وقاللي "أول يوم ليك ومش عارف تنزل ويندوز يا أستاذ؟!" قلتله بثبات وهدوء وبساطة مع بعض: "أنا نزلت الويندوز وكل البرامج المطلوبة عشان اللوا فلان يشتغل والموضوع أقل من إتي اتسئل عليه، وشغلي مش تنزيل ويندوز المفروض أنا جاي لمهام أعقد من كدة" قاللي: "طب روح شوف فلان بيه بيشتكي من ايه"
أنزل يا حضرات ألاقيه بيشتكي من ايه؟؟ خمنوا كدة ..............

الباشا لما دخلتله سألتي بصوت مكسوف: "الفري سِل فين؟" من غير كلام نزلتله الألعاب وقلت للمديرة ع اللي كان ناقص وماقدرش عمري انسى الموقف ده(بس مارضيتش اقول لحد على الطلبات الخاصة احتراما لمكانة الراجل .. مش عارف كان تصرف صح ولا لأ)
الدروس المستفادة:
1- خطط زي مانت عاوز .. المفاجئات هاتيجي من حيث لا تحتسب
2- الأهم من الشغل .. تحبيظ الشغل
3- مش أي حد ينزل ويندوز :)