أخي الكريم أولا أنا برحب بيك في نادي ممتلكي الماتريكس و أتمني ان ربنا يباركلك فيها و يكفيك شرها .... أنا معايا ماتريكس 2005 و عامل بيها 70000 كيلو
لي تعقيب بسيط لو يسمحلي أخي بسام علي الحاجات اللي بتتغير و مواعيد تغيرها ...
فلتر الهواء كل 15000 كيلو
فلتر البنزين كل 30000 كيلو
فلتر التكييف علي حسب حالته
فلتر الزيت كل ما تيجي تغير الزيت
طقم السيور و سير الكاتينه كل 60000 كيلو
البوجيهات كل 30000 كيلو
زيت الفتيس كل 30000 كيلو
يستحسن انك تستخدم زيت شل ألترا اللي بيعد لحد 10000 كيلو لانه زيت تخليقي و أحسن من الزيت المعدني بتاع ال 5000 كيلو و أفضل كتير للموتور ...
كبالن العربيه كويسين جدا و أنا عامل 70000 كيلو و لسه الحمد لله الكبالن بصحتهم بس نصيحه حاول تحافظ عليهم و خصوصا في الملفات و التحويدات لان جسم العربيه كبير و وزنها تقيل جدا و لو ماهتمتش بالموضوع ده الكبالن مش هاتستحمل ...
العربيه الحمد لله تقريبا بدون أي مشاكل معايا من ساعة ماجبتها اللا بس شوية حاجات بسيطه يعني تربيطات عفشه و ضبط زوايا يعني الحاجات العاديه اللي بتتعمل في أي عربيه ... بالنسبه للموتور الحمد لله لحد دلوقتي الزيت مش بينقص جرام واحد و الشكمان لسه بينزل ميه (مع اني مستختدم سيء !!!)
صوت العربيه العالي ماتقلقش منه لان أصلا الموتور اللي فيها و هو من طراز ( g4ed Alpha 2 ) معروف بصوته العالي ده غير تقل العربيه بيأثر في صوت الموتور ده غير ان الموتور قريب منك أوي ( تقريبا علي حجرك !! )
لما تيجي تدور العربيه الصبح أول مره هاتسمع شويه طقطقه من دقيقه لمده أقصاها 5 دقايق حسب درجة حرارة الجو ده أمر طبيعي جدا و ما تقلقش منه و الغير طبيعي ان الطقطقه دي تستمر معاك اليوم كله ...
معدلات الأمان في العربيه هايله جدا ...دعامات الصلب التخينه جدا اللي في الأبواب و التابلوه بتوفر قفص حمايه فولاذي بيحميك من كل الاتجاهات... الفرامل رغم انها مش ABS اللا انها قويه و هاتستجيب معاك من أخف دوسه بس لازم تكشف علي الفرامل باستمرار عشان تفضل في أحسن حالتها و خد بالك العربيه هاتغير معاك تيل أمامي بسرعه بسبب وزنها برده يعني التيل لما يقول أنا راجل أوي أوي مش هايعد أكتر من 30000 كيلو و أنا بغير التيل كل 20 أو 25 ألف كيلو علي أقصي تقدير ...
حاول تكون حنين علي دواسة البنزين لان كل ما دلعتها و مشتها بالراحه خالص و سبتها تشيل نفسها بنفسها بالراحه هاتفرق معاك جامد في استهلاك البنزين .
الفينيش التركي بصراحه أنا ماعرفش أخباره ايه بس أنا شايف انه مش وحش أبدا و أكيد مهما كان أحسن ميت مره من الفينيش المصري ...
و لو احتجت أي مساعده في أي حاجه , أي مشكله , فيوز ضرب و مش عارف مكانه , حاجه مش شغاله و مش عارف ليه , أي مشكله من أي نوع ابقي بس قوللي و احنا كلنا ان شاء الله هانساعدك علي أد ما نقدر ... خللي بالك منها عشان خطري !!!
المفضلات