لو الظابط دايقك...إشتكيه

**gebreel** · 08-01-2011 01:15 PM

10 / 10 يابو حميد

بجد ربنا يكرمك و لو كل واحد فينا عمل كدة يبقى مش هيعرفوا يعملوا مع اي حد الموضوع ده

فيه لواء في ادارة التفتيش اسمو اللواء محسن عبد الستار الراجل ده اسمع عليه انو حقاني و بيجيب اللي بيعمل مشكلة و بيتنفخ معاه لو معرفتش توصل لحق ولا باطل معاهم اسئل عليه و شوفوا هو فين و رحلوا

انا لما حصل معايا حتة عسكري لا بيفهم اي حاجة كان واقف مستني بنت سعادة البيه قدام المدرسة اللي كنت واقف قدامها و جي جنبي بيطلع على الرصيف اللي عليه تراب و زبالة و عمال يفرك بالعربية لما ردمني و كان و هو بيفرك العربية مش عاوزة تطلع على الرصيف و عمالة تجنح منو ناحية عربيتي اديلو في كلاكسات مفيش اخبطلوا على العربية اضايق قوي و بيقلي فيه ايه و بيبجح رحت نازل من العربية و نزلتو و قلتلوا فين الظابط بتاعك و اسمو ايه و انت في انهي ادارة و كلمتين من دول جاب ورا و الناس هدوني و بتاع المهم اخت نمرة العربية و المكان و القت و كلمت واحد صاحبي والده كان في الشرطة و سألته اعمل ايه قالي اشتكيه عند اللواء محسن عبد الستار ده اللي هيجبلك حقك من الداخلية كلها بس والدي قالي كبر دماغك و حصل خير و بتاع

العسكري ده بقى لما يجي يركن و يلاقيني واقف و مفيش مكان غير جنبي مثلا بقى يروح يركن في شارع تاني

لا لشئ الا اني حسستوا اني فاهم ان البوكس مينفعش انو يطلع الا و فيه ظابط و اني لو اشتكيت هيتنفخ هو و الظابط بتاعو و اكيد الباشا قالوا لم الدور علشان منتنفخش

**hamdy** · 08-01-2011 01:58 PM

المشاركة الأصلية كتبت بواسطة a7med_pharma

السلام عليكم

أنا كنت عملت موضوع من حوالي شهر
إني كنت مع 3 أصحابي ع الصحراوي..وحصل إن في الكمين
نزلونا من العربية..وفتشونا
وكدرونا ربع ساعة ع الأسفلت
وطلعوا إلي في جيوبنا..وفتشوا العربية
المهم
أنا إشتكيت من إلي حصل في موقع وزارة الداخلية
ومكنتش مستني رد الحقيقة
لكن النهاردة
جالي إستدعاء من قسم الشرطة إلي أنا تابع ليه
علشان أسجل أقوالي في محضر رسمي
يعني جابت نتيجة أهه
يعني
لو حد قل أدبه عليك...أو دايقك
ماتقعدش تقول أصل وفصل..وأصل مش هاخد حقي
إشتكيه وإعمل إلي عليك
لكن ماتبقاش سلبي ....وتشتكي خلاص
والله المستعان

ياريت كل الناس تعمل زيك كدا يا دكتور احمد واللهي لو مسبناش حقنا البلد دي هتبقا حاجة تانية

**kono** · 08-01-2011 03:04 PM

انا حصل معايا موقفين امبارح
الاول وانا داخل بورسعيد من منفذ الجميل
كنت انا ومعايا 4 صحابى
وقفنى ملازم اول وقالى الرخص مع انه عدى 3 عربيات قدامى
قولتله كنت متاكد انك هتوقفنى
قرأ الرخص وقالى اركن على جنب
ركنت على جنب ونزلتهله وقولت ممكن يدينى مخالفة لان عندى فاميه وملصقات ( على خفيف )
جه ومعاه عسكرى العسكرى قالى افتح الشنطة بصتله بصة مش ولابد الملازم قالى بعد اذنك افتح الشنطة واشوف التابللوه لو سمحت

قولتله ماشى
سبته يشوف اللى عاوز يشوفه والعسكرى بص فى الشنطة بصة
وبعد ما خلص قولتله انا عاوز اسألك سؤال
قالى اتفضل
قولتله حضرتك كنت بتدور على ايه ؟؟؟؟
قالى مش بدور على حاجة ولسه هيكمل
صحابى بقى اتدخلوا فى الكلام عشان عارفين انى هنيل الدنيا مع الظابط لانى بكره الفئة دى من الناس جدا مع ان ليا قرايب منهم
وواحد قاله لو بتدور على حشيش انا ممكن اجبلك وهزروا شوية ومشينا

الموقف التانى
وانا خارج من منفذ الجميل
ظابط تانى وقفنى تقريبا برضه ولازم اول
وقالى الرخص اديتهاله وقالى لصحابى البطايق
صاحبى فتح الباب ونزل عشان يطلع بطاقته من جيبه اللى ورا
زى ما يكون عمل مصيبة
انت نزلت ليه اركب العربية واركن على جنب
كان فيه صف عربيات واقف
ركنت قدام كانت حته ضلمه
لاقيت الامين بيقولى تعالى اركن ورا فى النور
صحابى نزلوا من العربية وواحد رمى شنطة بلاستيك فيها بواقى اكل
لاقيتمخبر طار عالحته اللى رمى فيها الشنطة وبيدور هو رمى ايه
رجعت بالعربية ورا
لاقيت مخبر تانى بيقولى افتح الشنطة
فتحتها قعد يدور وكان فيها شنطة اللاب وشنطة الورق بيقولى افتح الشنطة دى
قولتله مش فاتح حاجة وهات الظابط بتاعك
الظابط جه قاله بقوله افتح الشنطة مش راضى يا باشا
قاله انت هتستأذنه افتحها انت
اتخنقت اوى انا وواحد صاحبى
وقولناله ازاى ومش ازاى وزعقنا وده مش من حقك
قال بكل برود وتناكة انت مش هتعرفنى شغلى
طب ياعم افرض انفيه حاجات شخصية متعقلة بمراتى
قالى شيلها
بعد شد وجذب كتير
قال انتو مش شايفين اللى بيحصل فى البلد وده شغلى
ومشينا

**zago** · 08-01-2011 04:22 PM

المشاركة الأصلية كتبت بواسطة heshamzaky

زاجو انت يا ابنى مشكلة هههههههههههههههههههه بص أنت مؤدب و الله دى حقيقة لاننى أعرفك شخصيا بس لما حد بينرفزك ممكن تقلب مجنون علية و بسم الله ما شاء الله قوتك البدنية تسمح بذلك أنا عارف دة

انا عندي قاعده معروفه عني بين صحابي
(مش مهم تبقى قوي ..المهم تبقى مجنون )

بس حضرتك فهمت قصدي فعلا
الواحد يبقى مؤدب الى ان يحدث ما يؤدي الى غير ذلك

**A7MED_PHARMA** · 09-01-2011 01:38 AM

وحدث الأتي

............
روحت النهاردة لقسم الشرطة إلي أنا تابع ليه
لقيت غرفة مأمور القسم زحمة جدااااااا,,,فضلت واقف قدامها فترة طويلة
المهم
نائب المأمور جه....نزلت له تحت
ودخلت
الراجل كان عقيد(نجمتين ونسر)...شكله مؤدب أكتر مماينبغي
المهم..فتحنا الكلام..وأنا جاي بخصوص البلاغ إلي أنا كنت مقدمه في ظابط مباحث ع الصحراوي
قالي أه..إتفضل يادكتور أحمد..تشرب حاجة(بمودة حقيقية مش مصطنعة)
وإبتسامة على وشه..مريحة جدااا
وخلصت أقوالي..........وبعد لما خلصت
قولتله:""يعني ينفع كده إلي حصل ..سيادة العقيد""
قالي:""والله يادكتور أنا مش عارف أقولك إيه..عيال كتير بيبوظو شكلنا قدام الناس..تلاقي عيل داخلها علشان يحط الفيميه على عربيته..ويمشي حاطط السلاح على وسطه...وفاكر نفسه أعلى من خلق الله""
قولتله:""حضرتك..ده قالي إرفع إيدك يالاه...وطلع إلي في جيبك يالاه..ووقفني ع الاسفلت وكأني مجرم أو بلطجي""
قالي:""والله يادكتور..مش هقدر أقولك غير حقك عليا..وماتزعلش من واحد زي ده...هتلاقي ناس وحشة..بس صدقني الكويسين أكتر بكتير.والظروف الي البلد فيها الايام ..ظروف صعبة..والكل أعصابه مشدودة..أنا بقالي 3 أيام مابنامش أكتر من ساعتين في اليوم..الكل مشدود والبلد على كف عفريت""
قولتله:"ربنا يكون في عونكم سيادة العقيد..بس الي حصل ده مالوش دعوة بحاجة...أنا شكلي محترم..وبطاقتي ورخصتي مثبوت فيهم إني راجل دكتور..يبقا على الأقل يعاملني زي ماأستحق""
قالي:"" هما واخدين على كده في التفتيش...والطبع بيغلب التطبع..وحقك عليا أنا وماتزعلش""
المهم
كلمتين وكلمتين
ومشيت
ومستني المتابعة................................
بس للأسف
لما رجعت البيت...والوالدة عرفت إني روحت إشتكيت ظابط
بكت بدموع..وحلفت إنها مش قاعدة في البيت لو ماإتنازلتش...ولله الأمر من قبل ومن بعد

بس إتأكدت من حاجة.............
,,,,,,,,,,,,,,,,,,,,,,,,,,,,,,,,,,,
بييجي على الأقسام مفتشين من الداخلية ...يتأكدوا إن الشكاوى بيتم النظر فيها ..وإتأكدت إن الشكوى مابتقعدش أكتر من كام يوم في القسم قبل استدعاء أطرافها..علشان لو المفتش جالهم ولقى شكوى مركونة...بيعتبر إنها إتركنت عن قصد..برشوة مدفوعة من المشكو في حقه
يعني الشكوى مش هتضيع أو هتتركن
على حد تعبير الظابط...قالي الشكاوى مابتتضعش..ودي ورقة وبتلف ولازم توصل..مهما كان المشكو في حقه..هما مالهمش دعوة
وقالي إن الشكاوى البرقية,,,أو عن طريق النت...لها أولوية عن البلاغات اليدوية
وقالي
الظباط الكبار ... مابيسامحوش الظباط الصغيرين إلي بيستغلوا وظيفتهم في المنظرة أو التنطيط على خلق الله..على حد كلام الظابط
والله المستعان

**himaz** · 09-01-2011 02:46 AM

المشاركة الأصلية كتبت بواسطة midooz

بص يا باشا
البلد دي مش بلد إنت تعرف تثبت إيه .. البلد دي بلد إنت تعرف مين ... يعني هوة لو حس للحظة إنك مسنود أو ليك حد هيجيب ورا من أول كلمة .. هيحس ده إزاي .. من طريقتك أو طريقة كلامك و تصرفك .. يعني تعتقد كدة لو واحد إبن لواء في الشرطة وقفوه هوة و إصحابه في الكمين و الأمين قاله إنزل يلا من العربية .. هينزل بكل بساطة !!
هوة حب يعمل نمرة أُدام الظابط عشان ياخد بُنط عنده .. بس لو حس إنه عك الدنيا مع الشخص الغلط هيجيب ورا وقتي بدل متيجي على دماغه و دماغ اللي خلفوه!
بتمنى المحضر ده يجيب نتيجة و لو إني أشك ...

اتفق مع هذا الرائ بشدة

هما فعلا كدة اول ما يحسوا بس بدون اى اثبات اللى قدامهم ده مش هيسكت و مش هيعدى الموضوع وهيكبروا للصبح يجيبوا 50 ورا مش ورا واحد

صدقنى هى البلد ماشية كدة

للاسف حال البلد يحزن

ومش ظباط ولا امناء شرطة فى الغالب هما المشكلة
الشعب كلة مييييييت تولتومييت مليون مشكلة

المشكلة بتاعت مصر تتلخص فى الاتى
كل واحد بيبص على مصلحته وبس مش مهم اى توابع لاى حاجة بيعملها
المهم ان مصلحته فى كدة ولو فى اى لحظة حس ان مصلحته هتبتدى تتدمر او الحوار هيتقلب عليه هيغير مساره فى الحال سواء بالهروب او بالاسف او باى طريقة كانت

احب اقول ان طبعا ولا مجموع ولا جهل البني ادم ولا كلية ولا تعليم يحدد مستوى ادب الشخص
ممكن تكون الحاجات دى ليها تاثير اه بس فى الاخر الشخصية هى الشخصية
ممكن الجاهل ده لو كانت ظروفه وبلده كانت علمته كان يبقى عبقرى
الحمد لله على نعمة العلم
بس اللى اتحرم منها ده مش شرط يكون غير محترم
عادى جدا ياما ناس متعلمة جدا وغير محترمة والعكس صحيح

المشكلة فى كل شخص مش عارف ايه واجباته و ايه حدوده اللى لازم يلتزم بيها و لو ماتحاسبشى عليها فى دنيته هيجى عليه يوم ويتحاسب عليها قدام الله عز وجل

عندك الظابط الغير محترم وما اكثرهم وان كان فيه نسبة ضئيلة تكاد تنعدم محترمة
عندك امناء الشرطة نفس الكلام
عندك السواقين الغراب اللى بتجنن اما اشوف سواء نقل غبى نازل على مطلع دائرى عاكسى بدون اى تحمل للمسئولية وانه ممكن يتسبب فى حادث ويموت ناس ماشية فى طريق فخامته وهكذا وهكذا .......

انا معاك يا دكتور احمد بس للاسف انا مش متوقع اى رد اجابى منهم

بكل بساطة فى المواقف اللى زى دى تبقى بارد و تعرفه انت مين وبتشتغل ايه ولو كتر فى الكلام تعرفه انك مش هتسيبه يعمل او يمشى اللى فى دماغه
ولو قل ادبه قوله اتكلم باحترام عشان اكلمك باحترام

الصنف ده فعلا اغبياء ومش فاهمين كله عندهم شعب مصر المطحون وكان كل الشعب مجرمين

اعمل اللى عليك و كمل فى المحضر و سيب الباقى على اللى خالق كل البشر