الموضوع: عيوب الفتيس الاوتوماتيك فى النوبيرا؟

المشاركة الأصلية كتبت بواسطة roky

ماتأخذونيش في الكلام يا جماعة قصدكم ايه بان الاتوماتيك سحبه اقل من المانوال في الطيبيعي ؟

و ماذا تعنون بـ بالسحب هنا ... أذا كان قصدكم تسارع العربية يعني ف كده المفروض يكون الاتوماتك هو الحل الامثل للتسارع لانه لا عمره هايحرق ع الغيار عشان يشد .. و لا عمره هايسقط غيار عشان ياخد غرزة من واحد .. و لاعمره هايغير علي RPM قليل و العربية تسقف منه ... ألا انه من الممكن ان يكون بيستهلك بنزين زيادة شوية عشان يحاول يضبط سرعة العربية مع الغيار الحالي ...
فالطبيعي لو عربيتين واقفين في أشارة (بأعتبار ان عندنا أشارات في مصر) واحدة مانوال و التانية اتوماتيك، و الاشارة فتحت .. سواق الاتوماتك ممكن يغطس دوالسة البنزين و العربية تقوم طايرة مرة و احدة ... اما بتاع المانوال لو عمل عفريت مايحصله بنفس السرعة لانه لازم برضك بيضيع وقت و لو صغير في نقل الغيارات ... مع الاخذ في الاعتبار ان الاتوماتك بينقل عند الـ RPM المضبوط بالميلي .. مش زي سواق المانوال بياخد الموضوع بالاحساس و الخبرة

و ياريت يا اهل العلم و المعرفة تنوروني و تفهموني قصدكم ايه، و تصححوني لو انا غلطان

و اليكم مني احلي هدية بمناسبة الاوكازيونات .. أي تي شيرت ع العربية بسبعتاشر و نص ... و تعالي بص

معلش انت فاهم الموضوع بالعكس... اى عربية نزلت بفتيس مانيوال و فتيس اوتوماتك حتلاقى المانيوال تسارعها احسن... و لو جبت العربيتين دول فى الحالة بتاعت الاشارة اللى انت ذكرتها العربية المانيوال حتاكل عيش على فقا العربية الاوتوماتك للصبح

طيب عرفنا ان المانيوال اسرع.... ليه بقى اسرع؟؟

الفرق بين الفتيسين فى موضوع السحب بيجى من حاجتين... نظام نقل الحركة من الموتور الى الفتيس و نسب نقلات الفتيس نفسة... و حنشرح الفرق بالتفصيل...

فى العربيات المانيوال بيبقى نقل الحركة من المكنة للفتيس عن طريق مجموعة الدبرياج اللى بتعتمد على الاحتكاك الميكانيكى بين الفلام و الاسطوانة و الدسك... فى العربيات الاوتوماتك بيبقى نقل الحركة معتمد على ضغط و اندفاع الزيت اللى بيولدة الtorque converter

نتيجة للاختلاف دة بيحصل فرق فى حجم الطاقة المهدرة بين المكنة و الفتيس... فى نظام الدبرياج الميكانيكى بيبقى تقريبا الهدر فى الطاقة قليل جدا و يمكن تجاهلة فى حالة التعشيق الكامل (السواق شايل رجلة من على دواسة الدبرياج) فى حين ان الtorque converter بيحصل فيه هدر اكبر للطاقة المنقولة نتيجة عدم وجود اتصال ميكانيكى مباشر بين المكنة و الفتيس

معنى الكلام دة ان فى الطلعة من ثبات نظام الدبرياج الميكانيكى يقدر ينقل كامل طاقة المكنة الى الفتيس بدون اى هدر يذكر بالتالى تقدر تستغل كل الطاقة دى فى التسارع و الانطلاق بقوة

بالنسبة للاوتوماتك حتبقى الطلعة اضعف نتيجة هدر الطاقة اثناء توليد الضغط المطلوب فى الtorque convert و دة بيظهر بسهولة فى الفرق الواضح بين استجابة لفات الموتور و سرعة العربية عند الضغط بقوة على دواسة البنزين (لو دة حصل فى عربية مانيوال بتبقى العربية فيها مشكلة تفويت فى الدبرياج)

كدة عرفنا الجزئية بتاعت نقل الحركة.... ندخل على نسب التروس

الفتيسات المانيوال معظمها حاليا 5 نقلات... و الاوتوماتك 4 (انا مش بتكلم عن الفتيسات الحديثة ال5 نقلات او الفتيسات الCVT)

معنى كدة ان لو العربيتين سرعتهم القصةى 200 كيلو يبقى لازم التسارع المطلوب للوصول للسرعة دى يقوم بية 5 تروس فى العربية المانيوال فى حين ان نفس الشغلة دى بتقوم بيها 4 نقلات فقط فى الاوتوماتك... دة معناه ان كل نقلة لازم توصل بالعربية لسرعة اعلى فى الاوتوماتك عن المانيوال و بالتالى نقلات الفتيس الاوتوماتك بتبقى روحها طويلة و دة بيخللى التسارع ياخد وقت اطول

معنى الكلام دة ان الفتيس الاوتوماتك لا حيعرف ينقل كامل قدرة المحرك الى الفتيس فى الطلعة ولا حيعرف يجارى التسارع بتاع الفتيس المانيوال اللى روح نقلاتة قصيرة (بعض الناس بتسمية فتيس حامى) و بالتالى السباق بين عربيتين (نفس العربية طبعا) واحدة بفتيس عادة و واحدة بفتيس اوتوماتك محسوم تماما للمانيوال

الميزة الوحيدة للفتيس الاوتوماتك هى زمن النقل من نقلة للتانية و دة بيبقى اقل من الفتيس المانيوال طبعا بس لو اللى راكب المانيوال راجل فاهم هو بيعمل ايه حيقلل الزمن دة قدر الامكان و ينقل من نقلة للتانية فى كسر من الثانية و بالتالى يقلل الفرق بين زمن النقل للفتيسين... و مع وجود الميزتين السابق ذكرهم حيكون الحسم للفتيس المانيوال

قصة توقيت النقل فى المانيوال مش قضية... احنا بنفترض ان اللى راكب المانيوال عارف هو بيعمل ايه و بيسوق ازاى

فى الوقت الحالى فيه بعض المصنعين بينزلوا عربيات بفتيس اوتوماتك 5 نقلات و دة الهدف منة معالجة مشكلة طول النقلات فى الفتيس العادى ابو 4 نقلات... بس طبعا ما تزال مشكلة الtorque converter موجودة

البعض الاخر لجاء الى الفتيس الCVT و دة فتيس مفيش فيه نقلات اصلا بالتالى لا فية وقت بيضيع بين النقلات ولا نسب فتيس اساسا و هنا الفتيس دة بيتفوق على المانيوال فى التسارع و بتفضل فقط ميزة الطلعة للفتيس المانيوال لان الفتيس الCVT فيه torque converter برضة

MMamdouh

الفتيس دة مفيهوش تروس اساسا... الفتيس عبارة عن بكرتين بينهم سير و قطر البكرتين بيتغير حسب ظروف التشغيل

دى لينك لطريقة عملة:

HowStuffWorks "How CVTs Work"

و دى فيديوهات توضيحية:

YouTube - mini-CVT

YouTube - Dodge CVT Animation

و دة فيديو لعربية فيها الفتيس دة و هى بتتسارع:

YouTube - 2009 Nissan Altima 0-60 MPH - CVT in Drive

YouTube - 2008 Nissan Altima Coupe 3.5 CVT 0-60 Launch

MMamdouh