السلام عليكم يا مزداويـــة .
مرضتشى اعدى لما شفت موضوع المازدا من غير ما اعلق احقاقاً للحق .
المازدا عربية ممتازة وهيا فعلا best value for money أحسن قيمة ممكن تاخدها فى مقابل الفلوس اللى دفعتها فيها .
واسمحولى اعلق على العربية نتيجة خبرة سابقة .
بالنسبة للماتور : ماتور ممتاز 1300 بكفائة عالية ... تستطيع من خلاله منافسة مواتير حديثة عن تجربة فى الجرى والتسارع والسحب وتحقيق سرعات عالية بدون ادنى مشاكل وبصوت ماتور ناعم على سرعات عالية ( كنت بجيب بعربيتى السابقة 150 مستريح ومش حاسس بحاجة كماتور واخويا جاب اكتر من كدة بعربيته )
بالنسبة للثبات : ثابتة جداً على السرعات العالية زى ما ذكرت سابقاً فى الجرى بس الكلام ده لو عفشتها سليمة ( اخدت بيها ملفات قبل كدة على كوبرى اكتوبر بسرعة فوق 120 زمااااااااااان بس دى مش حاجة حلوة ومبشجعشى عليها ... بس ثبات كويس ويحتاج لخبرة بس فى التعامل معاه ومعرفة لامكانيات العربية )
بالنسبة للصاج : العربية صاجها جامد مقارنتاً بالعربيات الحديثة يكفى اننى بعتها حوادث بعد دخول سيارة بيجو 504 فىا بسرعة تجاوزت الـ 80 وانا فى حالة التوقف والنتيجة كانت تغيير ثلث خلفى للمازدا وتغيير جنب كامل بشاسيه للبيجو وفى المجمل العربية من واقع الحادثة كان صاجها واساسياتها تستحمل وكله فى الآخر بحفظ الله .
بالنسبة للأستهلاك : استهلاكها جيد كـ 1300 س س مع بنزين 90 ومع العلم انى جربت معاها 80 كام مرة ومكنشى فى ادنى مشكلة الا فى سرعة الأستجابة فقط للتسارع .
قطع الغيار : تعتبر من ارخص قطع الغيار اليابانى ( أسأل مجرب هههههههه ) وقطع غيارها معمرة كمان ... مرة غيرت كوبلن اول ما اشتريتها مستعمل مكملشى 100 جنيه وقعد معايا ونسيته لحد ما انباعت وكان زى الفل .
بالنسبة للتحميل : انا كنت معظم الوقت بركب لوحدى لاكن ساعة الجد كانت بتشيل 5 افراد مفيش مشاكل ولا كانت بتحك ولا حاجة الموضوع موضوع طريقة الطلوع بهدوء على المطب واخويا فى عربيته مرة مش هتصدقنى لو قلتلك اننا كنا 6 افراد بالغين والشنطة كمان مليانة على اخرها بوزن يتجاوز الـ 100 كيلو ورغم كدة محكش يمكن غير مرة واحد ومش جامدة كمان ... المهم العفشة تكون سليمة .
خلاصة الكلام : العربية قعدت معايا سنتين ونصف حرق وجرى وشد وبهدلة وأكتشف فى الآخـــــر ان ماتورها فبريقة من سنة 1982 وأول فتحة فيه كانت على ايدى اللى عايزة قطـعـ ..... ههههههههههه ... وعملت فيها نصف عمرة بس للأسف مرجعتشى زى الأول يمكن عيب فى الميكانيكى الله اعلم .
اصلى كنت واخدها من عقيد جيش وهو كان واخدها من لواء والأتنين مكنوش بيركبوها تقريباً .
فربنا ييسرك الحال وتلاقى عربية بحالة كويسة ومش هتندم ابداً لو لاقيتها بحالة تستحق .
المفضلات