زائر من قسم الفيات ، طالب مساعدة في بيجو 504

**lasthell** · 24-03-2011 09:57 AM

من القاهره فى واحد اسمه الحاج اسماعيل ده عنده مخازن كبيره جدا مليانه قطع غيار و عربيات تقطيع و حاجات استيراد ... اى حاجه تلاقيها عنده من ال (ا) الى ال(ى) دة فى الطوابق - الطابق الثالث

**tiger45** · 24-03-2011 10:56 AM

مشكور يا باشا

**MASERATI** · 24-03-2011 03:20 PM

المشاركة الأصلية كتبت بواسطة lasthell

من القاهره فى واحد اسمه الحاج اسماعيل ده عنده مخازن كبيره جدا مليانه قطع غيار و عربيات تقطيع و حاجات استيراد ... اى حاجه تلاقيها عنده من ال (ا) الى ال(ى) دة فى الطوابق - الطابق الثالث

السلام عليكم و رحمة الله و بركاته

ألف شكر يا باشا على المعلومات النار دى.

بس, أصل المشكلة أنى مش من القاهرة, فكنت عاوز أسأل, هو (الطوابق) دى, حى فى القاهرة و لا ايه و فين بالظبط ؟؟؟

**sterio_504ever** · 25-03-2011 06:23 PM

المشاركة الأصلية كتبت بواسطة amrelsaqqa

اختلفت الاراء
ناس قالت بيتحط بين عمود الاسبراتير والحلقة المغناطيسية
بس انا لما حطيته حطيته بين الحساس الاحمر نفسه وارضية الاسبراتير
يعنى يتحط في قاعدة الحساس قبل ما يركب في الاسبراتير

لأنى لقيته زي معجون الحرارة بالظبط والحساس ده جواه في ترنزستورات وحاجات بتسخن وقاعدته المونيوم فقلت يبقى اكيد ده مكانها بحيث تتزنق في الوسط ما بين الحساس وجسم الاسبراتير

طب متبصلى عليه كده و شوفه شكله عامل ايه يعنى سايح ولا لا

**amrelsaqqa** · 01-04-2011 12:59 AM

المشاركة الأصلية كتبت بواسطة sterio_504ever

طب متبصلى عليه كده و شوفه شكله عامل ايه يعنى سايح ولا لا

نسيت ابصلك معلش
هبقى انزل ابص بكرة واقوللك

**amrelsaqqa** · 01-04-2011 01:01 AM

النهاردة كان يوم حافل بالاعمال
الكربراتير عندى بايظ وبيشرب بنزين بيعمل في الصفيحة 60 كيلو :(

نزلت رحت شبين الصبح واشتريت كربراتير جديد صغير باب واحد صينى بـ 275 انا عارف ان ممكن اجيبه بأقل من كدة من مصر او بورسعيد
بس قلت تمن المشوار واشترى راحتى

رجعت البيت على العصر وعازم انى هركبه بنفسى
وانا في طريقى قابلت الميكانيكى فـ وريتهوله وعجبه وقاللى كويس بس انا مش فاضى النهاردة تعالى لى السبت ( قلت في عقلى ومين قاللك انى هركبه عندك )

اصل الموضوع كله 4 مسامير يعنى وخرطوم البنزين وسلك الاكسراتير هفك القديم واركب الجديد مكانه وخلصت على كدة

المهم كنت محتاج مسامير ، رحت للراجل بتاع المسامير وبالصدفة قابلت الميكانيكى تانى ففهم انى هركبه بنفسى
وشكله ادانى عين بقى من ساعتها
روحت البيت
وقفت العربية نصها في الجراج وبعدين مش عارف ايه اللى حصل كدة لقيت العربية نزلت على المنزل والباب مفتوح فالباب صد في العمود :( اللى في الجراج

طكككك
شديت الهاند بسرعة ودورت وعشقت اولانى وطلعت لقدام ونزلت الهاند والعربية دخلت تانى لجوة والباب ساب العمود

اجى بقى اقفل الباب مبقاش يقفل
الباب ما بقاش يبات في مكانه اصلا
اتعفرتت طبعا وكنت خايف لايبقى حوار كبير
العربية بقى شكلها زفت وسايقها والباب مفتوح وماسكه بإيدى وكل ده لا كان على البال ولا ع الخاطر اصلا

رحت لسمكرى جنبى بس بصراحة استاذ ظبطه في ساعة ونص بين المغرب والعشاء ولدع منى 60 جنيه انا ما صدقت انه اتصلح ما رضيتش افاصل معاه واديتله ال60 جنيه ورجعت على العشاء كدة
صليت وبرضه عازم انى هركب الكربراتير الجديد

فكيت القديم ولقيت في مسمار قافش في الصامولة واضطريت انشره وخد منى وقت
وركبت الجديد والمسامير الجديدة
وتركيب الاكسراتير خد منى وقت لأنه مش زي القديم

دورت العربية طبعا مش هتدور على طول ف اتكيت على المارش بتاع 10 ثوانى لحد ما دارت

دارت كويس والسلانسيه مظبوط لوحده قلت الحمد لله
اجرب ازود بنزين
العربية تتخنق وهى واقفة
قلت يانهار ابيض امال لما همشى هيحصل ايه
طلعت اجرب

الدواسة تقيلة جدا تحسسك بالبطء واول ما تكبس بنزين حتى لو في اول الغيار العربية تتكتم وتقطع

خفت طبعا وقلت ايه بقى ده هو ده الفرق بين الباب الواحد والبابين ولا ايه ؟

طلعت شديت جامد لقيتها بتفوق على السرعة العالية

وقفت وقعدت اظبط فيها
عليت الكهربة شوية لقيتها بتعلى من غير ما تكركر ( رغم انها كانت بتكركر مع القديم )

فضلت اعلى في الكهربة ولقيت خرطوم الفاكيوم ادفانس اللى بين الكربراتير والاسبراتير مش راكب
ركبته

طلعت جربت لقيتها فاقت شوية بس الدواسة تقيلة
وقفت تانى خفيت السوستة شوية بتاعت الاكسراتير وشحمت السلك

اجرب بقى

العربية بقت طلقة
وبقت اسرع من الاول
بتجمع و بتجيب 90 بسرعة على طريق زراعى وفيه مطبات وفي مسافة قليلة

ان شاء الله انا متفاءل بالاستهلاك ع الجديد وهـعبى التانك بكرة وابدأ احسبلها وان شاء الله بقى نشوف ارقام زي 180 و 200 كيلو في ال20 لتر

هبقى انزل صور الكربراتير الجديد قبل وبعد التركيب

والحمد لله لحد دلوقتى كدة فل اوى بلا 2 باب بلا هباب :d

**MASERATI** · 01-04-2011 04:11 AM

المشاركة الأصلية كتبت بواسطة amrelsaqqa

النهاردة كان يوم حافل بالاعمال
الكربراتير عندى بايظ وبيشرب بنزين بيعمل في الصفيحة 60 كيلو :(

نزلت رحت شبين الصبح واشتريت كربراتير جديد صغير باب واحد صينى بـ 275 انا عارف ان ممكن اجيبه بأقل من كدة من مصر او بورسعيد
بس قلت تمن المشوار واشترى راحتى.............................

:d

السلام عليكم و رحمة الله و بركاته

ألف مبروك يا باشا و ربنا يكرمك بالكاربيراتير الجديد و ان شاء الله العربية تعمل 350معاك كم فى الصفيحة.

و ماتنساش ترفعلنا صور الكاربيراتير الجديد, يمكن الواحد يفكر و يجيبه.

أنا الكاربيراتير اللى عندى -الحمد لله و ما شاء الله- بيعمل 200كم فى الصفيحة تقريبا, أنا كنت روحت امبارح اسكندرية و رجعت من عالطريق الدولى الساحلى يعنى بتاع 500كم و العربية تقريبا أخدت بتاع 50 لتر.

و لازم تقيم لنا تجميع و سحب العربية بقى عامل ازاى مح الكاربيراتير الجديد.

بالتوفيق يا باشا.