يا باشا سالم مش سليم هههههههه
والله يا حماعة مش هتصدقوا اني برتاح في العربية بشكل غريب... حتى البولونيز
ايه كمان يا ربي.....
عندي حالة نفسية كده أو عضوية مش عارف... بس تركيزي مش سهل وبتشتت بسرعة جداً لأني دماغي بيبقى فيها مليون حاجة مع بعض ف مش بعرف أركز في موضوع واحد لفترة طويلة (يقال انه ده اسمه adhd للناس اللي ليهم في العلاج النفسي)... ف لما بحب اركز في حاجة.. بانزل الف بالعربية... السواقة بتفصل نص دماغي تقريباً ف بتخليني اركز في اللي انا بعمله
زمان أيام الخطوبة وخناقات التليفون... كنت بنزل اسوق عشان اعرف اتخانق.. وليا كام مخبأ كده ع النيل بلف الف وبعدين لما اتعب اروحلهم اقعد شوية اشرب كباية الشاي وامشي
كمان بخاف جداً العربية تتسرق وانا نايم فيها.. ف من سنتين كده كان شغلي ف وسط البلد.. ف كنت متفق مع الغفير بتاع المتحف الزراعي اني بطلع كوبري اكتوبر وعلى ما الزحمة تخلص وانزل ببقى هموت وانام.. ف بروح قدام باب المتحف اديله اللي فيه النصيب واركن قدامه واشغل ام كلثوم وانام... هو يتكيف وانا انام مطمن على حاجتي عشان لابتوب الشغل وحاجتي بتبقى في العربية... نفس الكلام مع واحد بيركن عربيات في الزمالك اسمه عشماوي للناس اللي حافظة الزمالك ومخابئها.. والواد بتاع الشاي اللي ف شارع المنتزه في الزمالك برضه... كل دول كانوا حراسي وانا نايم
وانا في الجامعة كنت بنظم حفلات روك وميتال مع صحابي... ف كان ساعات بيبقى عندنا حفلات وناس بتنزل من بيوتها لابسة حاجات وتروح الشغل لابسة حاجات.. ف في فترة كانت فعلاً عربيتي اوضة تغيير ملابس.. وكان عادي جداً انك تركب عربيتي تلاقي فيها غيارات وهدوم مش بتاعتي (انا شخصياً في جاكتتين شتوي رايحين مني الله اعلم هما فين)
موضوع حلاقة الدقن عملته قبل كده... بس بمكنة عادي موس... وع الناشف واديله.. كان يوم فالنتين ونسيت احلق الصبح ف حلقت وانا سايق على كوبري اكتوبر
عربيتي كمان صيدلية... لازم تلاقي فيها مسكنات كتييير عشان انا عندي صداع نصفي مزمن من وانا عندي 8 سنين وعجز الطب عن علاجة... ومراهم حروق عشان كان اكشن طبيعي انه الردياتير يضرب ف وشي
اممممم ايه كمان؟ عربيتي ف يوم اتعملت زنزانة حجز واترمى في الشنطة واحد حرامي متكتف.
مش فاكر حاجة تاني دلوقتي بس أكيد هفتكر واقولكوا.. ولو قالش قولولي اسكت
المفضلات