الموضوع: مــا هــو رأيــكم فى الأستـــــرا إنجــــوى؟

الخلاصة أن الأوبل أسترا لما تقارنها تقارنها بفولكس فاجن جولف لأن الغرض الأساسي لما أوبل نزلتها هاتش باك فقط وليست سيدان أنها تنافس جولف وبالنسبة لسعر الجولف يبقي سعرها رائع.
ثانيا:بالنسبة للجودة فمن سنة2000 وأوبل خطت خطوات واسعة في المجال دة وقالت أنها اتغلبت على مشاكل الجودة(reliability)في سيارتها الجديدة والكلام دة أكيد هيبان حقيقتة في حدود سنة أو اتنين على الأكتر.
أما بالنسبة لأكتر ميزة فيها:هي ثباتها العالي الاسترا دي بجد عفشتها جامدة وأنت على 180كم/ساعة متحسش بشئ فعلا عفشتها روعة
كمان:السيارة من جوة رياضية من الدرجة الأولى كراسي ممكن حد يقول عليها ضيقة بس مستواها منخفض وروعة
بس:الفتيس المانيوال هو أحسن فتيس طبعا من ناحية التسارع.وفي كمان فتيس مانيوال 6سرعات بس مش عارف ممكن تجيبة اسبيشيال أوردر ولا لأ؟

كل عام و انتم بخير

بخصوص كلام استاذ omar_megane

*السيفيك ثباتها اعلى من الاسترا و اوسع من جوة بمراحل من الاسترا
- هو من ناحية الوسع انا جربت مقعد السائق في العربيتين و كانت الاسترا اريح و اوسع انا كان الفرق بالنسبة لي واضح لأن وزني ثقيل . وبخصوص الثبات من الواضح ان حضرتك جربتها فا ياريت حضرتك تقول رأيك فيها لأني انشاء الله ناوي اشتريها

*انا بضايق اوى من كلمة دى اوبل يعنى المانى المفروض الالمانى يعنى بى ام او مرسيدس مش اى حاجة تانية .
- و بخصوص الجزء ده انا مش فاهم يعني اية فعلا مش الماني هي و الفولكس هما مش الماني فعلا ولا اية ؟؟؟ هو طبعا مينفعش اقارنها لا ببي ام ولا مرسيدس و لو فكرت اني اقارنها بيهم يبقا انا بضحك علي نفسي وثانيا الاوبل بكام و المرسيدس بكام بما ان المقارنة في مصر بالاسعار !!!

*سمعة الالمانى انو بيعمر انما الاوبل مبيعمرش
- انا عمي معاه عربية اوبل كادت 87 (اللي شبة الدايو ريسر) والاسترا تعتبر امتداد ليها والعربية عاشت معاه زي الفل من الزيرو متركنتش غير من سنة ودة بسبب ندرة قطع الغيار و انا معاية الفيكترا 2001 و هي المشاكل اللي كانت فيها بسبب تقفيل مصر و انا في رأيي الشخصي ان السبب الرئيسي في قصة مشاكل الاوبل التقفيل المصري انما اللي اعرفهم معاهم الالماني مش بيشتكو من حاجة

المهم شكرا لأهتمامكم جميعا و افادكم الله و يا ريت يا استاذ omar_megane او استاذ
bimmeraddict اللي جرب منكم العربية يقول اية مميزاتها و عيوبها

اولا بالنسبة لرد الاستاذ مسعود
انا مجربتش الاسترا علشان افيد حضرتك انما انا بقول اللى بسمعه ولاحظته فمثلا فى رأى حضرتك القعدة بتاعت الاسترا احسن من السيفيك واوسع انما بالنسبة للمساحة الخلفية فما رأى حضرتك؟؟
بالنسبة للثبات انا جبت بالسيفيك 150 وكأنى على 40 فى الاكسيل انما الاسترا انا مجربتهاش بس انا متأكد ان ثباتها جيد جدا بس برده السيفيك تتفوق فى الثبات
الاوبل و الفولكس طبعا المانى وانا ماقولتش عكس كده انما قصدى انها مش بمستوى كلمة المانى اللى فى دماغنا اللى هيه سيارة معمرة جدا و مفهاش اى مشاكل زى البى ام والمرسيدس وانا عارف ان فيه فرق كبير فى السعر.على العموم انا مش من معارضين الاوبل او الفولكس بل العكس انا بحبهم جدا انما لمايبقى سعرهم معقول مش مبالغ فيه ودى اراء
اما بخصوص الاوبل مابتعمرش فده بدليل تقييمات اغلب المواقع على الانترنت ومش كلامى لوحدى وزى ما الاوبل عاشت من 86 فيه غيرها يابانى سواء كرولا او سيفيك ولسة عايش وزى الفل برده.اما بقى التقفيل المصرى هوه السبب ولا لأ فحضرتك ادرى منى علشان كان مع حضرتك العربية انما اللى اسمعه ان فى موديلات كتيرة كان الفريون بيهرب من التكيف بسبب سوء تصميم دائرة التكيف اللى بتخلى المواسير تسخن فمعتقدش ده ليه علاقة بمصر بل من المانيا شخصيا وحتى لو التقفيل المصرى كان سبب فى مشاكل فده ميمنعش ان الشركة الام مسئولة عن ده لأن الكواليتى كونترول مش جيد.
بالنسبة لتعليق الاستاذ Crypton X
احنا مختلفين فقط فى الازواق يعنى حضرتك بتفضل العربية تبقى Compact هاتشباك عن السيدان حتى لو كان ده على حساب الموتور انما انا بصراحة لو كنت شاب وعايز سرعة وكده كنت حجيب السيفيك برده لأن انا فى رأيى مش مهم حجم العربية طول ما هى قوية وسهلة فى السواقة وثابتة
فى نهاية الامر كنت اتمنى انى افيد حضرتك يا استاذ مسعود انما انا مجربتش الاسترا قبل كده بس اصحابى كتير جربوها وبيشكروا فيها و بيعيبوا برده فى التقفيل المصرى ومن يدرى ربما تكون الجديدة التقفيل الالمانى احسن بكتير من سابقتها
و اخر الامر حضرتك تصلى استخارة وتتتوكل على الله وتشترى الللى يريح حضرتك

بالنسبة لموضوع المقارنة بين السفيك والاسترا:

انا تابعت الحوارات السابقة و عاوز اوضح بعض الحقائق:

انا عندي استرا انجوي هاتشباك 2007 بقالها معايا 7شهور واظن ان دي فترة كفاية لتجربة السيارة
بس عاوز اوضح بعض النقاط:

- بالنسبة لموضوع قياس القدرة الحصانية فهناك مبدأين لقياسها
1- قياس قدرة الموتور نظريا في المعمل (الفراغ) القوة الصافية غير المهدر منها - المدرسة الاسيوية
2- قياس قدرة الموتور الحقيقية مع دراسة تاثير عوامل الاحتكاك و المقاومة و الوزن الثابت و المتحرك - القوة الناتجة
بعد احتساب كل العوامل مجتمعة تركيب المحرك في السيارة - المدرسة الاوروبية و الامريكية
والدليل علي ذلك عزم الدوارن torque اعلى دائما لمصلحة الاوروبي

وهذا ليس معناة انا هذا افضل من ذاك انما هوا كود standards

بس المهم منخلطش ابو قرش مع ابو قرشين و نفهم منرديدش وخلاص

وبعدين موضوع الهورس باور دا لية طرق حساب رياضية كثيرة مختلفة النسب صحيحة مع تثبيت الطريقة مع جميع النسب
يعني من الاخر فكك من موضوع الهورس باور دا - (مالوش لازمة)


- بالنسبة لموضوع رياضية دي امور بتدخل فيها امور كثيرة
- الشكل الخارجي الشاب - الحجم المدمج - هاتشباك - احساس ان السيارة ذات اغراض شخصية
- التجهيزات زي جنوط - وضعية مقاعد - نوع مقاعد - فتحة سقف - تجهيزات ساوند 000000000الخ
- تكنولوجيا السرعة : التكنولوجي في النقل للسرعات - نمط التحويل للطابع الرياضي

- بالنسبة لسعر السيارة انه مبالغ فية انا جبتها وكونت بسمع الموضوع دا برضو بس الموضوع دا تلاش تماما بعد التجربة

1- العربية دي سعرها عيب انه تتقيم بشوية اكسسوري و كماليات - سعرها في التكنولوجيا اللي فيها
بتحسها في كل حاجة في العربية من اول تكنولوجيا الموتور والفتيس لغاية زجاج السيارة الكهربة الذكي حساس عشان ميقفلش علي ايدك
و مفتاح العربية سمارت كي

2- التكنولوجي العالي في الفتيس - مش اوتوماتيك عادي ولا استيبترونيك - من حيث التكامل التام بين المانيوال والاوتوماتيك
في نفس الوقت (عزم المانيوال وانطلاقة مع سلاسة الاوتوماتيك ونعومتة) مختلف فعلا -تكنولوجي خاص بالاسترا ميش موجود في الفيكترا

3- العربية النسخة الاساسية فيها 1600 سي سي الي بتنزل في مصر متورها متفصل عليها غير السيفيك 1800/2000 سي سي

4- موضوع التسارع البطئ دا غير وارد بالمرة - عيب يتقال اساسا :) - وبعدين السبورت مود بيخلي العربية عربية تانية من حيس التسارع

5- موضوع الوسع دا يعتمد علي احتياجك من السيارة هية واسعة من الامام و عادية في الكنيبة - مناسبة جدا

علي العموم دا كن مداخلة و لو حد عاوز تفصيل اكتر يوقلي

ملاحظة : 1- بالنسبة لموضوع البي ام والمرسيديس , العربيات دي غالية مش عشان مبتعطلش بالعكس دي عربيات حساسة جدا ومصاريفها كتير
بس غالية عشان التكنولوجي اللي فيها علي جميع المستويات

2- انا عارف ان الكلام دا ميش هايعجب بعض الناس , البي ام الفئة الاولي و الجولف اللي منزلها التوكيل تعبانة و مفهاش نص
التكنولوجي اللي في الاسترا انجوي و GTC انا عاينتهم بنفسي بس دا مشكلة التوكيلات الجربانة اللي بتنزل العربيات ومسترخصة
وبتبيع براند غالي علي الفاضي

واسف علي الاطالة

السلام عليكم ورحمة الله وبركاته
اولا مبروك يا استاذ zabadoo على الاسترا وربنا يباركلك فيها وياريت تبقى تعملنا تقييم ليها
بالنسبة لموضوع الhorsepower فانا مش عارف حضرتك جبت الكلام ده منين القدرة الحصانية دى حاجة standard فى العالم كله ومالهاش علاقة باروبى ولا يابانى ولا صينى انما اكيد اللى حضرتك تقصده هوة الnet و الgross ودى اللى بتفرق فى العربية والموضوع ده تم مناقشته قبل كده
اما موضوع العربية رياضية ولا لأ فتم الاتفاق ان ده اختلاف فى الاذواق والمقاييس من فرد لأخر
نيجى للمهم وهو المقارنة ةبين الهوندا والاسترا واحب اقول انى اكيد حاكون متحيز لعربيتى زى ماحضرتك اكيد بتفضل سيارتك انما الاختلاف فى الرأى لا يفسد للود قضية:
اول حاجة الهورسباور وده بتتفوق فيه الهوندا ب125 حصان فى حين الاسترا 105
مش مهم فكك من الهورسباور زى ماحضرتك بتقول نيجى للtorque برده تتفوق السيفيك 153@4200 مقابل 150@3900 للاسترا
مش مهم فكك من torque نيجى للتسارع تتفوق الهوندا فى زمن اقل من 12 ثانية فى حين الاسترا 12.3 للمانويل فما بالك بالاوتو
مش مهم فكك من الاسراع نيجى للmaximum speed تتفوق الهوندا ب197 للأوتو فى حين الاسترا حوالى 185 وده اللى قريته فى كذا site
فأنا بصراحة مش عارف ايه معنى التكنولوجى عند حضرتك بس اللى اعرفه ان موضوع الازاز ده موجود فى كذا عربية بما فيهم السيفيك فدا مش اعجاز
ثانيا موضوع تكنولوجى engine and transmission فأكيد اوبل على عينى وعلى راسى انما للأسف مفيش مقياس لتكنولوجيا العربية يعنى مفيش حاجة اسمها technology meter مثلا فبالتالى الوسيلة الوحيدة للمقارنة فى الموضوع ده بيكون اداء العربية اللى بنشعر بيه وهوة ده اللى بتمثله الارقام اللى كتبتها فوق من تسارع و عزم الخ... فبالتالى لو حنتكلم على التكنولوجيا حنلاقى السيفيك تتفوق لأنها استطاعت ان توفر موتور قادر على جر سيارة بهذا الحجم لتعطى اداء افضل من سيارة اخرى فى نصف حجمها ده غير طبعا الاستهلاك الاقل فى البنزين ونفس الوضع فى ناقل الحركة.وده بجانب ان مواتير هوندا واخدة جوايز من افضل 10 محركات فى العالم انما عمرنا ماسمعنا اوبل بتاخد حاجة زى دى بس طبعا دى محركات غير اللى بنتكلم عليها.
موضوع موتور متفصل على العربية فالهوندا جاية من اليابان كده ومعمول حساب كل حاجة واكيد الناس دول مش بيهزره واكيد التوكيل مسقطش المواتير دى عنده فالنقطة دى غريبة واول مرة اسمعها وحتى لو كان فى حاجة زى كده فلو حيدى الاداء ده بدون مشاكل فأهلا وسهلا ويبقى العربية خير وبركة انما الحقيقة المرة ان الاوروبى هوة اللى فيه الموضوع بتاع التلفيق واكبر دليل الباسات والفكترا اللى هما سحبهم مش جامد ومش ماشى مع البودى فبالتالى العيب ده فى اوبل مش هوندا
انا مقلتش خالص تسارع الاسترا بطىء والا ابقى غلطان انما قلت انه اقل من السيفيك
موضوع الوسع تتفوق فيه السيفيك بغض النظر عن احتياجات اى حد لأنى انا اكتفى بقول ما اعرفه واللى مهتم بالنقطة دى ياخد باله منها انما اللى مش فارق معاه الوسع خلاص يبقى النقطة دى مش مهمة بالنسبة له
بالنسبة لأخر كلام حضرتك قلته فأنا لسة مش فاهم معنى التكنولوجى وازاى حد يعرف يقيسها انا من اللى قريته ان التكنولوجى فى اعتقاد حضرتك هيه الاوبشنز والكماليات انما الحقيقة ان البى ام والمرسيدس فيهم تكنولوجى من نوع اخر وهيه الموتور وناقل الحركة ووسائل امان وراحة مبتكرة ومالهاش مثيل فى العالم يعنى مرسيدس بتعمل براءات اختراع كل فترة وفى مقولة شهيرة انك لو عايز تعرف شكل العربيات كمان عشر سنين وحيكون فيها ايه شوف الs-class بتاعت السنة دى
انا طبعا رأيى البى ام والجولف يتفوقوا على الاسترا وده كلام الناس بره ومالهوش علاقة بالتوكيلات لأن البى فئة والاوبل والفولكس دول فئة ولا وجه للمقارنة وبصراحة اللى يركب بى ام هوا اللى يعرف الموضوع ده كويس
اخيرا وليس اخرا اكيد الاسترا تتفوق على السيفيك فى الاوبشنز والكماليات ودى حاجة مش بسيطة انما قد تؤخذ كبديل عن فرق الموتور والاداء مثلا
انما واللى فى رائيى الاهم هوا ان السيفيك من العربيات اللى عاشت وعمرت فى مصر واثبتت كفائتها وقلة اعطالها وده سبب تهافت الشباب على الموديلات القديمة انما الاسترا كما قلت سابقا يوجد بها اعطال كثيرة والله اعلم قد تكون الاعطال بسبب انها كانت بتتقفل فى مصر واتحلت الان.
انا اسف اذا كنت طولت وياريت حضرتك تكتب لنا تقييم عن الاوبل لأنى نفسى اعرف ايه نظامها من احد ملاكها