بعد الثورة ..كيف نبنى دولة مصر من جديد

**wawoo** · 05-02-2011 10:25 AM

لا يخفى على احد الاحداث الجارية و التى عصفت باقتصاد مصر و سياسية مصر و قدرة مصر ..انها مرحلة المخاض و مرحلة الولادة اللتى دائما ما تكون مؤملة و لها ظروفها ...

و لكن دعونا نفكر بهدوء حتى نبنى مصر من جديد مصر حديثة لها مؤسسات قوية لا تسمح مرة اخرى لمراكز القوى بان تسيطر على الحكم و تقمع الحريات و تنهب ثروات مصر

بناء هذة المؤسسات سيحتاج راى كل حكماء و مفكرين و مثقفين مصر لانة يسحدد مستقبل هذا البلد لعقود قادمة

ما هى التحديات التى ستواجة بناء هذة المؤسسات ..ولا يخفى على احد التحديات الخارجية و الاعداء المتربصون بمصير مصر و يسعون بكل قوتهم الى تحيد قومة مصر و استاناسها لمصلحهم الخاصة

هذة الحقبة تحتاج تكتف الجميع ابناء مصر و ذلك لبناء المؤسسات المحايدة و قوية التى سوف تكون قادرة على حماية الحريات و تحقق الديمقراطية الحقيقية و تمنع اى طغيان او استبدد مرة اخر ...

دعونا نفكر بهدوء عن كيفية تنفيذ ذلك من المرحلة الحالية و لكن ياريت نتجنب الجدال الحالى الخاص بمن مع او ضد الثورة الان

**human** · 05-02-2011 12:49 PM

اصلا انت فى الدرك الاسفل
اتوقع ان فلوس مصريين هتستثمر فى مصر وموضوع الخيال العلمى بتاع الاستثمار الاجنبى هيجى بالراحه
انا عايز مصريين شرفاء مش عايز اجانب يهربوا ويبيعوا البلد اول منعطف

كمان كل حاجه لازم تبقى شفافه ارض المتر بنص جنيه ماينفعش توصل لل 7 الاف جنيه مبنيه

**احمد ابراهيم** · 05-02-2011 01:31 PM

بسم الله الرحمن الرحيم

لك كل التحية على الموضوع الرائع و فعلا كنت بفكر ازاى الموضوع ده يتعمل

الفكرة اللى فكرت فيها

ان يتم عمل لجان من مختلف المجالات على ان تكون هذه اللجان من الشباب

لجنة من الشباب تقوم بدراسة الموارد الموجودة فى المنطقة المقيمين فيها و ما حولها و تقرير ما يجدوه من الموارد مستغلة بشكل جيد او غير مستغلة او مهدرة و كيفية الاستفادة من هذه الموارد و يتم تقديثم هذه الدراسة الى الجهة المختصة وزارة المالية مع وجود مجموعة لتمثيل هذه الدراسة و توضيحها و مناقشتها مع المسؤولين طبعا كل مجموعة تمثل منطقة معينة و خصوصا المناطق الغير راقية و بعد ذلك يمكن اختزال المناطق القريبة و تكوين مناطق اكبر لتقليل عدد الدراسات و التشتييت بين الاهداف

يتم عمل دراسة من شباب خريجى كلية الحقوق لدراسة بنود الدستور الحالى و وضع النقاط المراد تغييرها او تعديلها و دراسة تبعات هذه التغيرات او التعديلات و تقديمها للجه المختصة مع وجود شباب لتمثيل هذه الدراسة و مناقشتها مع المسؤولين

و هكذا فى كل المجالات

ملحوظة مهمة : اللى يعرف طريق ازاى نوصل لحد من المسؤولين عشان نوصلهم الدراسات دى و كمان عشان هيبقى فى دراسات ميدانية و هنحتاج لتصريحات ان لزم الامر لو حد يعرف يا ريت يقول على الطريق

**احمد ابراهيم** · 05-02-2011 05:19 PM

محدش عنده افكار و لا ايه يا رجالة

انا عن نفسى اتصلت باصحابى اللى فى المنطقة عندى و هقولهم على الفكرة اللى عرضتها و ربنا يسهل و نقدر نعمل حاجة

يا ريت اللى عنده افكار يقولها و يشارك
مينفعش نقعد نتفرج و نبقى ملناش دور فى بناء بلدنا

**mazagngi2000** · 05-02-2011 05:24 PM

هتتبنى لوحدها بس يمشى الاول

**SHNORY** · 05-02-2011 05:34 PM

نبدا نغير ثقافات الشعب من جديد
نحاول نقضي علي ظواهر الغلاء بالمقاطعه السلميه
لما سلعه تغلي منشتريهاش
نحاول نقضي علي ظواهر الفهلوه والرشوه والغش
وهي فعلا زي ما مزجانجي قال حتبتدي لوحدها

**ams** · 05-02-2011 05:47 PM

هاحرق نفسى فى شغلى و دراستى
بس كده

**Ralliart** · 05-02-2011 05:50 PM

-أهم حاجه نزرع اكلنا ودي اخطر حاجه في مصر لان لو حد من بلد ارياف هيشوف الناس كلها بتبور الاراضي الزراعيه وتبني عليها ودي ثروه حقيقيه بتضيع ومخلينا نستورد قمح من كل دول العالم

- لا يمكن من النهارده ادي لحد رشوه ولو غلطت وخدت مخالفه ادفعها حتى لو ممكن ادفع رشوه او اجيب واسطه لان دي من اخطر الحاجات اللي كانت بتواجه الناس

- زي ما قال شنوري باشا اللي يغلي حاجه نقاطعها لحد ما يتربى واولها العربيات

- من اهم الحاجات اللي هتحدد مستقبل البلد هي الانتخابات الجايه ودي لازم متتزورش من حرامية الحزب اللي خاربينها والمفروض تتعمل لجان شعبيه زي اللي معموله حالياً بس اكتر تنظيماً ومش بأسلحه لاننا مش بلطجيه ونقف قدام اي لجنه انتخابيه لمنع البلطجيه والمزورين والصناديق المزوره ومرافقتها لحد الفرز

- ولسه في افكار كتير هتتولد من الشباب اللي تسبب في التغيير ده