الموضوع: انا بقيت حاسس انى فى موقع تابع للحزب الوطنى

المشاركة الأصلية كتبت بواسطة human12

حاسس ان تامر امين موجود فى جميع انحاء المنتدى
حاسس ان كل الناس مره واحده خايفه ان الرئيس يمشى المظاهرات اللى رقنا نشف ان يحصل ان احنا نفتح بقنا بقوا عملا وخونه وكل واحد عنده اجنده
بعد ما كنا متفقين جميعا على انه السبب بقى رفقاء الكفاح اللى فى التحرير هما السبب
فيه ايه؟؟ ايه اللى حصل؟؟ الناس خايفه ؟؟؟ في ايه يا ولاد مصر؟؟؟
ربنا يستر

بس ياريت لو المكان هنا حصله تحول او اختراق من الحزب الوطنى نفهم
يعنى كميه الناس اللى موجوده بتدافع باستماته و موضوع خوف على مصر كل خمس دقايق ده مش طبيعى

ومش المنتدى بس لا كمان كل المواقع بقيت محتله من الناس ديه
حتى الفيسبوك
الدوله ظبطط نفسها والنت قاطعه و الناس نازله تغسل دماغ الناس باسلوب منهجى

الصادم فعلا تحول اراء الكثيرين ممن توسمت فيهم المعرفه و المشكله فى الاستماته فى المهاجمه على شرفاء الوطن

اللهم ارنا الحق حقا وارزقنا اتباعه وارنا الباطل باطل وارزقنا اجتنابه

يعني اي مخالف في راي حضرتك يبقي حزب وطني وتامر امين ومغسول عقلهم
طيب ليه بتعيب عليهم انهم يوصفوا اي مخالف لهم في الراي انه له اجندة وانه قابض
يا ريت نبطل لجهة الاتهامات المتبادلة ونتناقش للافضل مش لمجرد الاتهامات الجوفاء
وانت بنفسك قلت ان معظم المواقع اصبحت تري الان عكس ما تراه هل اصبح من حق الاقلية التي تمثل وجهة نظرك ان تفرض رايها على الاغلبية وتري انها وحدها على صواب
يبقي في الحال دي لما كنا بنعيب على الحزب الوطني انه ديكتاتوري كنا غلطانين

كل ده مش معناه انك وجهة نظرك غلط ومش هوصفك باوصاف تضايقك زي ما انت وصفت الناس المخالفين ليك في الراي
بس بقولك بلاش نتهم بعض

المشاركة الأصلية كتبت بواسطة korkor

انا مش كنت عاوز ارد على الموضوع ده خاصه انك وفى معظم مواضيعك او ردودك مابتشوفش حد رايه صح غيرك ولو زى مانت بتقول حصل غسيل مخ لكل الناس اللى فى المنتدى وانه كله خايف على مصر ليه مش قادر تصدق ان فى ناس فعلا مش طايقه حسنى مبارك ولا الحزب الوطنى ولكن همها مصلحه الوطن مش ال 6 شهور اللى فاضلين له هيعمل فينا اكتر من اللى عمله فى 30 سنه ربنا يرحمنا برحمته ويرفع عنا جميعا البلاء ونبطل نتهم بعض على الفاضى والمليان لمجرد الاختلاف فى الرأى .

للاسف اي حد بيدور على مصلحة البلد اصبح مغسول مخه وعميل للامن والحزب الوطني كاننا قابضين منه

المشاركة الأصلية كتبت بواسطة human12

لازم يرحل عشان تعرف تحاكمه ماينفعش يبقى رئيس سابق

انا ثابت على رايى
المشكله فى اللى بيخاف و فاكر مصر عيله تايهه لازم حد يمسكها من ايدها
المشكله فى اللى مش عنده ثقه ان ولاد مصر قادرين انهم يحموها

الناس فى التحرير ليه المطار مافهوش عسكرى
الناس فى التحرير ليه مافيش عسكرى مرور حتى
الناس فى التحرير ليه مافيش شغل ولا امن؟؟

شفت ان المطالب كل شوية بتزيد ازاي كان من شوية يمشي دلوقت يتحاكم
بص يا اخ طارق مش هايتحاكم لاسباب كتير جدا اهمها ان قيادة الجيش لا يمكن توافق انه يتحاكم لو البلد خربت اكتر ما هي خربانة وصبر الجيش لغاية دلوقت مش معناه انه ميقدرش ينهي كل حاجة في لحظة ويطبق حظر تجول 22 ساعة في اليوم وامريكا وقتها هاتصقف له لانها لو عارضته ممكن يعمل اي حاجة
نحترم الجيش وصبره وحياده حتي الان لكن لا نستفذ الاسد النائم

و زي ما انت قلت مصر مش عيلة تايهة يبقي مش من حق اي واحد دلوقت يقول ان هو لوحده اللى عارف مصلحة البلد لا انا ولا انت ولا الي في التحرير ولا اللى في الاحزاب

وامن ايه الل بتتكلم عنه علي اد ما كنت رافض لسلوك الشرطة قبل 25 يناير علي اد ما دلوقت بعذرهم جوز اختي ظابط مرور نزل يشتغل عادي انضرب عليه نار اكتر من مرة في يوم واحد من حرامية ومن بتوع مكروباس ومن صيع بيثبتوا الناس ويقلبوهم في الشارع ولو على الشغل يغور في داهية بس مقتنع ان ده واجبه تجاه الوطن

مش عايزين نزايد على بعض

المشاركة الأصلية كتبت بواسطة ecybrarian

اما أن تكون معي وموافق تماما على كل ما اراه صحيحا، وإما أن تكون حزب وطني وخائن وعميل ومندس وأمن دولة..أو على أقل تقدير مُغيب ومعمول لك غسيل مخ...اخي العزيز لك كل احترامي وتقديري..بس دا اسلوب ديكتاتوري..في ناس استشهدت من اجل منع الديكتاتورية في مصر...حبا في الله وتقديرا لتضحية الشهداء بلاش الأسلوب دا في الحوار..

هو ده المنطق السائد الان اي مخالف يبقي يا عميل او خاين او له اجندة وبيقبض
قلتها من اسلوب الناس من يوم الخميس احنا بدانا نصنف بعض ودي كارثة وللاسف محدش صدقني

المشاركة الأصلية كتبت بواسطة ahmed.kamel

بلاش بس الرد كدا احنا كولنا اخوات وهو صحيح محدش بيطيق تامر امين ولا الحرب الوطني فضلا عن ان نتوصف ان احنا من خدمه لمجرد ان لينا راي مختلف نحترم فيه راي الاخر بس خلاص يمكن خانه التعبير او حاجة وكلنا اخوات وكولنا في ازمة ......................ياراجل ده زملكاوي متدوقش
انا بهزر طبعا متزعلش يا human

المشكلة ان الكلام ده بيطلع من ناس الواحد بيحترمهم جدا على المستوي الشخصي وعارف انهم هاديين جدا ولم يتوقع ان يكون التكفير المضاد سينتشر بهذه السرعة في المجتمع المصري

المشاركة الأصلية كتبت بواسطة أبو عبدالله

يا جدعان
ده كل الجاليات المصرية في اوروبا وامريكا بجد مش تهويل
كلها مظاهرات انه يمشي
مش عارف ليه احنا اللي بنفهم لوحدنا
يا جدعان وايه اللي يخليني استنى مادام خلاص

الناس زعلانه ان طارق بيقول ان كل واحد مخالف يكون حزب وطني
طيب واشمعنى كل واحد مش حزب وطني يبقى اخوان او خائن او عميل ؟؟؟
يا اخواني فكر شويه
الثورة دي لما تنجح بإذن الله وبعدها بسنين تكتشف انك كنت بتحاربها
غير لما تكون واقف دلوقتي على حياد علشان خايف على البلد
صدقوني فيه فارق كبير انك تحس انك كنت بتحارب مصلحة للبلد
فكر براحه

عارف ليه يا ابو عبد الله الجاليات كلها خارج مصر مش بتعمل كدة ؟
لانهم خارج مصر وعايشين حياة مرفهة ومش فارق معاهم اللى الناس العادية هنا فيه واللى لا يفرق معاهم حرية ولا ديمقراطية وهمه معلى لقمة العيش والشغل اللى ضاع ومش هيرجع قبل سنوات زي بتوع السياحة ولانهم مش بيشوفوا غير الخنزيرة لان ارسالها هو اللى بيوصل

واللى يخليني استني عليه اني اعمل التعديلات الدستورية واللى لا يمكن تتم الا في وجود رئيس وليس مفوض بالرئاسة ويا ريت تقرا الدستور

وانا ضد ان كل واحد فينا يفضل يتهم في التاني عيب احنا كلنا كبار وكتير مننا اتقابلوا وكلنا مصلحة البلد نختلف اه لكن نتهم ونخون مش ناقص غير اننا نكفر بعض
عيب يا اخوانا كلنا كبار وكلنا بنحب مصر مع اختلاف وجهات النظر فيما هو افضل

وانا خرجت من اجل الثورة لما كان الاغلبية ضدها بس دلوقت خايف بعد سنين اندم اني خرجت من بيتي علشانها وبتمني ان العكس يبقي صحيح

المشاركة الأصلية كتبت بواسطة a.saad

مش عارف ليه يا طارق انك لازم تهاجم اى حد قدامك
المنتدى اتقلب كله حزب وطنى ازاى
ومن فين
من القدام
مواقفهم معروفة
الجداد
انا شابف ان اكترهم بيهاجموا الدولة والنظام


اقرا اللينك فى توقيعى وجاوبنى ازاى هيبقى التغيير

للاسف يا احمد زي ما قلت كتير جدا بيوجهوا الاتهامات وخلاص لمجرد ان الراي الاخر مش عاجبهم
فيه ناس عاملة نفسها محللين وبيشرحوا ليه لازم يمشي فورا وهما مش عارفين ولا مادة في الدستور