الموضوع: هل تثق فى وعود الرئيس مبارك بتنفيذ المطالب ام لا تثق في وعودة ؟؟

اقولكم علي حاجه من غير زعل و حساسيه؟!

انا غلبت اتكلم و اتكلم مع بعض الاعضاء هنا

مش معني كده اني يئست من توصيل الفكره

اكيد الغلط من عندي في طريقه التوصيل

فانا ان شاء الله هنزل اتكلم مع الناس اللي في التحرير مباشره مش كلهم طبعا بس اللي فعلا نازل و هو عارف نازل ليه

و لما يتلاقي اصحاب نفس الافكار ساعتها هتكون قدرات توصيل الفكره اكتر و الكلام يكون حتي اوضح

لكن اعذروني مش قادر اتكلم و اناقش الوجدان الجمعي لاعضاء كتير قوي هنا بحترم بعضهم و كلامه و ارائه و البعض الاخر مش قادر اوصل للاسباب الحقيقيه لمواقفه الحاليه من الثوره و بقول اسبابه الحقيقيه علشان لو هو مصدق و مقتنع بالاسباب اللي بيكتبها هنا و يشارك بيها في مواقفه تجاه الثوره يبقي ده شخص لا يمكنني انا النقاش معاه بالاساس

الثوره بيقوم بيها مجموعه صغيره من الناس لا يرضو بالوضع الحالي و بيتمردو علي النظام الحالي

لكن دايما بيكون عددهم اقليه بالنسبه للباقي

و اللي بيحدد نجاح الثوره او انقلابها الي تهم خيانه عظمي و اعدام هو موقف الباقيين

و من هنا تتمحور اهميه دور كل واحد فينا من ورا الكيبورد

لو كلامك بيأيد الثوره و يشجعها فلا خلاف

لو كلامك بيحاول يموت الثوره و يخمدها قبل ما الشعب كله يتبناها يبقي السؤال اللي بيفرض نفسه هنا

هل ده نابع من مصلحه معينه مباشره كانت او غير مباشره مع النظام القائم؟

هل لأنك مخدوع في النظام الحالي فمتبني مواقف ضد الثوره مع علمك بأهميتها؟

هل الخوف من التغيير و بالذات المجهول هو المحرك و الدافع ليك؟

يا جماعه ده ثوره الظباط الاحرار نفسها لحد النهارده ليها فريق بيكرهها و معارض ليها!!!

شوفو بقالها كام سنه فاتت و عدت و كل سنه احتفال بيها و تأييد ليها من ابناء الثوره دي

ياتري هل كان الشعب المصري وقت حدوثها كله مؤيد ليها و عن اقتناع؟
ولا كان في ناس كتير زيي و زيكم و قاعدين يعددو مزاياها و مزايا النظام المنتهي وقتها؟؟

بصراحه لو كان الملك مأمن مبني ماسبيرو وقتها كويس كان زماننا مسمعناش عنها كثوره اصلا

كان زمانها بقت عباره عن سطر واحد في كتب التاريخ

سطر زي سطر السيد الرئيس اللواء محمد نجيب الراجل اللي كان عايز يسلم السلطه للشعب و يقيم دوله مؤسسات و كان مصيره الاقامه الجبريه و توفي في المستشفي و لم يتاح ليه التحدث مع العامه او الصحافه او الاعلام ابدا نهائي
كان الخوف منه هو مجرد كلام يطلع منه يوضح فيه ما جري وقتها و يقلب فئات الشعب اللي اجهزه الاعلام الرسميه غسلت دماغها بالكامل و بشده و سرعه بافلام و اغاني و تصريحات وقتها

كان ضروري جدا لنجاح الثوره دي هو اقناع الشعب بأهميتها و قد كان بالفعل

لأن لو حصل العكس كان زمان السطر المكتوب في كتب التاريخ هو محاوله انقلاب و تم اعدام المخطط ليها "اللواء محمد نجيب رحمه الله للتوضيح"

هو ده حالنا النهارده بس مع وجود فارق مهم و في منتهي الخطوره

الثوره المره دي قايمه من افراد الشعب و شبابه بالاساس

ملو الفساد المستشري و اثر علي حياتهم اليوميه و في جميع المجالات

يبقي المطلوب من النظام القائم تقليب الناس عليهم ان استطاع

ياتري النت مرجعتش ليه مع انه كان مطلب من مطالب الرئيس الامريكي نفسه

النت رجعت لما النظام لقي انه مش قادر يفرق الثوره و يوئدها بالبلطجه الماديه

ففتح جبهه علي الفضاء الالكتروني و بث سمومه في عقول الناس نفسها اللي ساهمت في قيام و نجاح الثوره

و خلي الناس منقسمه علي نفسها و في حيره من موقفها الشخصي كمان

و تضحيه النظام بمعظم رجاله الكبار هو اصدق دليل علي شراسته في سبيل حمايه بقائه

لانه لو صادق في قرار الرحيل و ترك الساحه للشباب كان عملها بالفعل

الا انه عنده اجنده سريه الا ان نقاطها ليست عسيره الاستنتاج

ممكن مش عايز يمشي بطريقه مخزيه
يمكن مش عايز يتحاسب
يمكن مش ناوي يسلم و يرجع ينقض علي الشباب و الناس بكل قسوه

نفس القسوه و الشراسه اللي خلت مجموعه من الحيوانات (ليسو ببشر مثلي و مثلكم يا مشرفين فبلاش ايقاف) خلتهم يضربو بالرصاص الحي في مشاهد كمشاهد الاعدام رميا بالرصاص الشباب الاعزل و منهم من فتح صدره بنفسه كشهيد الاسكندريه في وجه بنادقهم و لم يقتلوه حينها بل قتلوه حين كان يتراجع لاقرانه!!!

حيوانات مش بشر

حيوانات قتلو طفل في رفح من ظهره و بطلقتين في جسده البريء الصغير

ما ذنب طفل بريء

و في ظهره يعني كان بييجري مذعور من اشباه البشر اللي شاف بعينيه البرئتين مدي حيوانيتهم

و انطلق يجري خائفا مذعورا و اكيد نظرا لصغر سنه كان مذعور ذعر رهيب و خائف و مش بعيد كمان كان بيعيط و مش شايف هو بيجري فين

اهو الدموع اللي كانت اخر حاجه خرجت منه قبل روحه الطاهره ما تفيض من جسده الدموع دي لو كانت اتحطت في بحر من نجاسه و قذاره البشريه جمعاء كانت حولتها لنار و طهرت البحر ده من ادناسه

حد يقولي لما الريس حفيده مات الشعب بالكامل و فعلا الناس كلها حتي اشد كارهيه قدرو يلاقو في قلوبهم مكان للتعاطف مع مصيبه الرئيس و ابن الرئيس في حفيد السيد الرئيس

فين بقي احساسكم بطفل صغير مذعور و خائف زي ما كان الشهيد الفلسطيني الطفل محمد الدره بيغتال و هو بيحتمي مذعورا في احضان ابيه

فاكرين المنظر و فاكرين الغضب تجاه الحيوانات الصهاينه وقتها؟

ولا نفس الاحساس حتي مش هطلب احساس اكتر منه لان العدو كان صهيوني اللي قتل الطفل محمد الدره انما في رفح كان مش بني ادم اصلا

ولا علشان محدش شاف المنظر زي ما شفناه و شافه العالم اجمع وقت استشاد محمد الدره؟!

انا بعين الخيال شايف الطفل المصري ده
شايفه ببرائه الاطفال و عقله الصغير لا يعي ما يحدث امام عينيه البرئتين

شايفه بيجري خايف بيدور علي امه او ابيه يحتمي في حضنهم

حتي دي العدو الصهيوني سمح بيها للطفل محمد الدره

و الحيوانات اللي ضربوه رصاصتين و هو بيجري في ضهره حرموه منها

مات في حضن الاسفلت

جرب و انت نازل اشغالك و مصالحك اللي مليت الدنيا عويل و صراخ عليها جرب تقلع الجزمه و الشراب و تدوس برجلك الحافيه علي الاسفلت
شوف اخر حاجه حسها ذاك الطفل قبل وفاته
مكنش حضن امه و ابوه
كان الاسفلت الناشف ده و مش برجله لا ده بوشه و خده

يا جدعان ملعون ابو الفلوس و العيشه نفسها لو هنوافق علي افعال نظام في قسوه نظام النازي نفسه

لو هتعدم و اتسجن و اعتقل

في حاجات في الدنيا لا تسوي الحياه بعدها

و الناس اللي في التحرير دول واقفين للاهداف دي و اهداف اكتر كمان

يبقي لعنه الله علي الاب اللي يعمل في ولاده و احفادهم كده

و لعنه الله علي وزير الداخليه الاثم و رجاله الغير مستحقين للقب رجال اللي ايديهم امتدت علي الناس و الاطفال اللي المفروض يحموهم و عملو فيهم كده

يا جماعه اللي خايف علي الحياه احب اقوله

كتب عليكم القتال و هو كره لكم صدق الله العظيم

ربنا عارف ان في قراره انفسنا القتال مكروه لدينا كبشر

و علشان كده اجر الشهيد عظيم

اللي فيكو راضي يموت علي سريره بعد سنين طويله من دلوقتي هو حر

بس هيعيش في نفس المزله و الهوان و كل ما يفتكر الفظائع و الجرائم و الدم المسال مش هيسامح نفسه ابدا

و هيتمني الموت من شده الندم انه لو رجع بيه الزمن لكان زمانه في ميدان التحرير

انتو احرار انا نازل اكلم الناس في ميدان التحرير

هما موقفهم صريح جدا

شوفو انتو بقي ايه موقفكم

و كل واحد براحته

و احب اقولكم علي اغنيه الهبت مشاعري و قتلت في الخوف و الجبن جت علي لسان المتظاهرين و دون صراخ و علو صوت

بالعكس و علي بلاطه كانو بيغنو

الجبان جبان و الجدع جدع

الجبان جبان و الجدع جدع

الجبان جبان و الجدع جدع