انواع التعليق الخلفى 3

تعليق مستقل و دة بتبقى فيه كل عجلة منفصلة تماما عن العجلة التانية و دة كويس فى حالة السير على ارض غير مستوية لان كل عجلة بتاخد مطب بتبقى معزولة عن العجلة التانية و بالتالى تاثير المطب بيبقى محصور على العجلة دى و كمان فى الثبات لان تغير وضعية العجلة اللى اخدت المطب بالنسبة للطريق مبتغيرش وضعية العجلة التانية بالنسبة للطريق...

النظام دة عيبة انه بيبقى معقد شوية لان بيبقى فيه اذرع توصيل او مقصلت للتحكم فى زاوية ميل العجلات اثناء الملفات للمحافظة على افضل وضعية للاطار على الطريق... فى احوال كتير بيبقى السوست و المساعدين الخلفية فى النظام دة بتبقى ماكفرسون زى الامامية و احيانا بيبقى فيه ميزان لزيادة الثبات



التعليق الغير مستقل و دة بتبقى فيه العجلتين الخلفيتين مربوطين ببعض بشكل مباشر من خلال جسم الكورونا او من خلال بار حديد صلب... النظام دة بسيط من ناحية التكوين و الصيانة و طبعا تكلفة الانتاج... و لو بنتكلم فى ارض مستوية تماما النظام دة حيوفر اعلى تماسك للعجلات الخلفية مع الطريق لان دائما و ابدا حتبقى العجلات الخلفية عاملة زاوية قائمة مع الطريق و كامل سطح مداس الاطار ملامس للطريق

المشكلة فى النظام دة فى الطرق الغير ممهدة... كل مطب بتاخدة عجلة حينتقل الى العجلة التانية بالتالى حيقلل من الشعور بالراحة داخل السيارة اضافة الى تغير زاوية العجلة المقابلة للعجلة اللى اخدت المطب بالتالى بيقلل الثبات كمان اضافة الى ضخامة الوزن الغير منبوض فى حالة وجود كورونا فى النظام دة



التعليق شبة المستقل و دة بيبقى فيه اتصال بين العجلتين الخلفيتين بس مش بشكل مباشر من خلال وجود دفرنسية خلفى... الديفرنسية دة بيربط برضة بين العجلتين الخلفيتين بس بيسمح ببعض الاستقلال فى حركة العجلات... بالتالى مستوى الراحة فيه اعلى من التعليق المستقل و تكلفة انتاجة و صيانتة اقل من التعليق المستقل... طبعا دة يعنى انة اتقل فى الوزن من التعليق المستقل و اقل منة راحة



و هنا احب اوضح ان اللانوس و الفكترا و الكورسا و الميجان و اللوجان و الجولف القديم فيها تعليق خلفى شبة مستقل عشان انا شايف الناس اختلط عليها الامر شوية فى الحتة دى... كمان وجود كبالن خلفية هو الفيصل فى تحديد اذا كانت العربية ذات الجر الخلفى فيها تعليق مستقل ولا لا... مش كل عربية فيها كورونا خلفية تبقى بتعليق غير مستقل لان الكورونا شغلها السماح للعجلات الخلفية بالدوران بسرعات مختلفة... اذا كان خارج من الكورونا كبالن يبقى التعليق الخلفى مستقل... اما اذا كانت الكورنا خارج منها اعمدة دفع داخل غلاف صلب يبقى التعليق غير مستقل

MMamdouh