مبادرة استثمر ولو 100 جنيه وحافظ على اقتصاد بلدك

**Egyzizo** · 10-02-2011 01:05 PM

أنا عندى من زمان دفتر توفير من البوسطة اسمه دفتر الاستثمار وكنت ناسيه .. وهو حاجة كده زى صناديق الاستثمار بتاعة البنوك .. لو رحت زودت عليه ، يبقى قمت بالغرض فى خدمة الاقتصاد ، واللا فيه آلية تانية؟ لأن بصراحة الدفتر ده هو العلاقة الوحيدة بينى وبين البورصة اللى ماعرفش عنها أى حاجة.

**alaa99991111** · 10-02-2011 01:17 PM

انا محتار لاني جديد و معرفش حاجة عن الاسهم والبورصة

**Bonanza** · 10-02-2011 01:17 PM

لو كل واحد مفكتش الدفتر او لو ماسترديش فلوسه في الوقت ده يبقي بيساهم في ثبات الاقتصاد و لو زودت يبقي بتساهم في محاولة انقاذه
دفتر التوفير ده بيتم استثمار فلوسك اللي انت حاطتها فيه في البورصة في صناديق الاستثمار و عشان كده بتلاقي زيادة في المبلغ بتاعك مع كل سنة حتي لو كان الزيداة بسيطة

**Egyzizo** · 10-02-2011 01:24 PM

على البركــة ، شكراً على الإفادة.
هانزل أزود السبت ان شاء الله.

hh · 10-02-2011 01:28 PM

الله يكرمك يا باشمهندس أحمد كمال. انت بتديني أمل ان لسة فيه في البلد ناس بتعرف تفكر مش بتردد كلام وخلاص. و ده ينطبق على كل الموضوعات المطروحة حاليا مش بس موضوع البورصة ده.

بالنسبة لموضوع البورصة ده انا بقالي يومين بحول أفهم نفس كلامك ده للناس اللي أعرفها. لو أشتريت في البورصة انت بتساعد صاحب الأسهم اللي بتشتريها بس. و لا بتفرق في أقتصاد البلد و لا حتى في الشركات اللي انت بتشتري أسهمها. و بالتالي لو انت كدة كدة حتساعد أفراد يبقى أقتراحات حضرتك عشرة على عشرة.

**yasserelsayad** · 10-02-2011 01:46 PM

بس موضوع الـ 100 جنيه دا مش مينفعش تقريبا
وبعدين مصريف التكويد فى البورصة تقريبا فى حدود 250 او 300 جنيه وفين الشركة دى اللى هتتعب نفسها وتكودك بـ 300 جنيه عشان ان تستثمر 100 جنيه ؟؟؟

**zago** · 10-02-2011 01:55 PM

المشاركة الأصلية كتبت بواسطة yasserelsayad

بس موضوع الـ 100 جنيه دا مش مينفعش تقريبا
وبعدين مصريف التكويد فى البورصة تقريبا فى حدود 250 او 300 جنيه وفين الشركة دى اللى هتتعب نفسها وتكودك بـ 300 جنيه عشان ان تستثمر 100 جنيه ؟؟؟

مين قال كده ؟
التكويد ببلاش

**amir** · 10-02-2011 02:47 PM

المشاركة الأصلية كتبت بواسطة أحمد كمال

بلاش يا جدعان

ده مش انقاذ للبلد .... ده انقاذ للمغامرين من المضاربين و كبار رجال الاعمال

الاولى بيك بال 100 جنيه دي تنزل تشتري اتنين كيلو برتقال و يوسفي من الفكهاني اللي على ناصية الشارع و تطلب سندوتشين ديليفيري و تتقل ايدك في التيبس و تغسل عربيتك في البنزينة و تشتري اي حاجة انت محتاجها من البقال (مش السوبر ماركت الضخم) اللي تحت بيتكم ...... و كده تبقى عملت تنشيط لحركة النقود في مصر .......

ده علي اساس ان البورصه مش اداه استثمار متاحه للناس و رجال الاعمال زيها زي اي بنك؟!!

ليه الهجوم الشرس و التشفي في مصيبه اخواتك سواء في المنتدي او في البلد ممن يتعاملون في البورصه؟

واضح من متابعتي للموضوع ده ان خبرتك مش قويه في البورصه و انا نفسي لازلت باتعلم كل يوم فيها حاجه جديده مع ان بقالي فتره مش قليله ابدا

مقترح حضرتك الخاص بشراء سلع لتدوير الاقتصاد هو مقترح جانبه الصواب لأنه هيصب في خانه الاستهلاك مش الانتاج و ياريته كان استهلاك محلي بحت بالعكس ده معظمها سلع مستورده اللهم الا الفاكهه و الخضار

و التركيز علي الاستهلاك دون الانتاج هيعلي التضخم

المشاركة الأصلية كتبت بواسطة أحمد كمال

و لو كنت ميسور الحال و وظيفتك لم تتأثر بالازمة

حاول تشغل الاعمال "الترفيهية" اللي تعطلت بسبب الازمة

انزل اشتري ملابس ليك او لزوجتك او اولادك

انزل فسح اولادك في اي مكان ترفيهي

صلح عربيتك لو فيها عطل او محتاجة سمكرة حتى لو خبطة اي كلام ......

نفذ اصلاحات منزلية كنت محتاج تنفذها من زمان ..... سباكة نجارة نقاشة .... الخ

حرك البلد ........ لو كل واحد طلع من جيبه و حط في جيب التاني عن طريق شراء سلعة او خدمة العجلة هتدور تاني .......

مقترح استهلاكي بحت مش انتاجي و علشان تقوم اي اقتصاد لازم تدور عجله الصناعه

و الصناعه يعني مصانع

و المصانع بتحتاج تمويل لتغطيه التكاليف و زياده الطاقه الانتاجيه و التوسع

لو تعرف بس حجم الخساره المتوقعه في سعر الاسهم و تأثير ده علي الميزانيه الربع سنويه هيكون ازاي !!!

الشركات بتتأثر بسعر سهمها طبعا و مش بس فكره اسهم الخزينه

الموضوع واسع قوي قوي و فيه مجال للكلام كبير لو حد حب يعرف

و ببساطه دور في النت عن البورصه و الموضوع يتفهم

ده احنا قبل الازمه دي كنا بنطالب كمتعاملين بتحديد نسب تعامل الاجانب و توضيح هياكل الملكيه بصفه دوريه

و لاسباب كتير منها ان مش تسمح للاجانب (و دول بسهوله انهم يكونو صهاينه مثلا) انهم يدخلو البورصه و في غفله من الناس يبدءو الاستيلاء علي اقتصادك الوطني متمثل في الشركات نفسها و اسهمها المتداوله في السوق

ولا ناسيين ان السهم بالاساس يعني نصيب من الشركه!!!

شفت بقي الخطوره ان الاسهم سعرها ينزل و تبقي متاحه علي الشاشه باسعار بخسه لكل من هب و دب؟!!

المشاركة الأصلية كتبت بواسطة أحمد كمال

مفيش علاقة بين انخفاض سعر السهم و اغلاق المصنع ......

انا اشتري سلعة من المصنع

احسن ما اشتري سهم في المصنع

و لو المصنع باع كويس

هيزدهر ..... و مش هيمشي حد و هيقبض الناس ..... الخ ..... و السهم هيرجع تاني يغلى ......

يا فرحتي بمصنع سعر سهمه مرتفع ارتفاع غير طبيعي بسبب تهافت المشترين ....... بس هو في نفس الوقت مش بيبيع اصلا !!!!

اشتري السلعة اولى من شراءك للسهم ........

في علاقه و علاقه قويه و ارجو منك و من باقي الاخوه الاعضاء التأكد من الكلام و الاراء قبل المشاركه بيه مع الاعضاء و خصوصا انت بالذات يا ابو حميد لأنك تعد بالنسبالي و اظن بالنسبه لاعضاء كتير من الناس ذات الاراء القويه الصائبه

و ارجو تقبل الكلام بصدر رحب لأن مشاركه الناس من عدمه في دخول البورصه لن تمثل لي طوق النجاه من خساره فادحه سواء في يومي 26 و 27 يناير او مع بدء فتح التداول بس هو الواحد فعلا و علشان عارف الكارثه علي الاقتصاد القومي هتكون ابعادها ايه مش زعلان علي الفلوس اللي تم خسارتها علي قدر زعله من اللي ممكن الوضع ده يؤدي ليه بعد كده!!

**أحمد كمال** · 10-02-2011 04:12 PM

انا مش متشفي في حد خالص يا أمير باشا ..... و ربنا العالم بنيتي

اولا ... كل المطلوب من اصحاب الأسهم الصبر و عدم البيع دلوقتي ...... المضارب بقى اللي بيركب الموجة و بيشتري و يبيع عالمكشوف (يعني ربا) و مضطر يبيع فورا لأن حسابه مكشوف و لازم يسدد .... يستاهل اللي يجراله اصلا .......

ثانيا ......انا متشفي في رجال الاعمال الانتهازيين اللي ما تهمهمش مصلحة البلد و عايزين يصفوا اسهمهم و يسيبوها تولع ..... اكيد انا مش متشفي في واحد شقيان و مشغل القرشين اللي حيلته

ثالثا .... موضوع تدوير الاقتصاد مش استهلاكي بحت و لا حاجة

اولا مش كل حاجة مستوردة

ثانيا مش كله سلع .... فيه خدمات ..... يعني اما تغسل عربيتك في محطة البنزين دي خدمات

ثالثا استهلاك بدون انتاج ازاي؟ ماهو انا اما استهلك سلعة غيري بينتجها عشان انا باستهلكها ..... و اللي انا باقدمه - سواء سلعة او خدمة - غيري بيستهلكه و تبقى العجلة ماشية

يعني اما انا - مثلا - اصلح حيطة في الشقة عندي

جبت صنايعي == اشتريت خدمة
اشتريت جبس و اسمنت و بوية === اشتريت سلعة مصنعة محليا و شغلت تاجر القطاعي اللي باع لي اللي بدوره شغل تاجر الجملة و المصنع و في النص فيه ميت واحد كسبان من اول العتال اللي شال البضاعة مرورا بالعربية النقل اللي حملت من المصنع للتاجر و المحل و اللي نقل لي المونة الخ الخ الخ

فين بقى استهلاك بدون انتاج ؟؟؟؟؟؟؟

اما انزل اشتري ملابس ليا او لزوجتي او لاولادي ؟؟؟؟؟ مش شغلت مصنع ملابس و عربيات نقل و مخزن و محل و ايجار المحل اتدفع و و و و ؟؟؟؟؟

و اما السهم يرخص ..... هياثر في ميزانية الشركة سلبا كخسارة محاسبية فقط

يعني مثال عملي : فودافون جروب خسرت محاسبيا سنة 2004 حوالي 45 مليار جنيه استرليني ..... يعني ميزانيتها كانت خسرانة 45 مليار استرليني ..... ليه؟ عشان قبلها بخمس سنين كانت اشترت مجموعة شركات المانية و المجموعة دي قيمت السمعة بتاعتها بحوالي 50 مليار استرليني .... و القواعد المحاسبية العامة في بريطانيا GAAP UK تقول ان لازم تعمل amortization للسمعة في 5 سنين

هل معنى كده ان فودافون العالمية كانت خسرانة ؟؟؟؟ لأ !!!1

ال cash flow فضل زي ما هو

ال revenue فضل زي ما هو

و وزعوا كوبونات محترمة جداً في سنتها و وزعوا ارباح على الموظفين......

اذن يوجد بالفعل تأثير سلبي لانخفاض سعر السهم على الميزانية ..... و لكن ان لم يكن مصحوبا بانخفاض فعلي في الايرادات و المبيعات هيبقى تأثير دفتري فقط لا يؤثر على المصنع و لا يسبب في قفله و لا ارتفاع سعر السلعة !!

تقبل احترامي .... انا عارف طبعا ان خبرتي في البورصة مش كبيرة .... بس انا باتكلم ان تدوير الاقتصاد و تدوير حركة البيع و الشراء هو اللي هيقضي عالكساد و يمنع حدوث أزمة سيولة

-

الموضوع: مبادرة استثمر ولو 100 جنيه وحافظ على اقتصاد بلدك

LinkBack

أدوات الموضوع

عرض

-

-

-

-

-

-

المواضيع المتشابهه

مبادرة من الاعضاء تتماشي مع مبادرة الادارة

ازاي استثمر مبلغ بسيط

هل تشجع صناعة بلدك ؟ وما هي شروطك لتشجيع صناعة بلدك؟؟

الكلمات الدلالية لهذا الموضوع

المفضلات

المفضلات

ضوابط المشاركة